Skip to content

Al lo konteni

 SAPIT TRWA

Ki plan Bondye pour bann imen?

Ki plan Bondye pour bann imen?

1. Ki plan Bondye pour bann imen?

BONDYE i annan en zoli plan pour bann imen. I ti kree Adan ek Ev, sa premye zonm ek madanm, pour ki zot viv dan en zoli zarden. Son plan ti pour Adan ek Ev fer zanfan, fer later antye vin en paradi e pran swen avek bann zannimo.​—Zenez 1:28; 2:8, 9, 15; vwar Lezot lenformasyon nimero 6.

2. (a) Ki mannyer nou konnen ki Bondye pour akonpli son plan? (b) Ki kalite dimoun Bondye ti anvi viv lo later e pour konbyen letan?

2 Eski ou krwar ki en zour nou pou viv dan en paradi? Zeova i dir nou: “Mon’n dir davans: Mon pou realiz mon plan.” (Izai 46:9-11; 55:11) Nou kapab asire ki i pou akonpli son plan e nanryen pa pou kapab anpes li fer sa. Zeova in dir ki i’n kree later pour en rezon. “I pa’n kree li pour reste vid.” (Izai 45:18) I oule ki dimoun i viv partou lo later. Ki kalite dimoun Bondye ti anvi viv lo later e pour konbyen letan? Labib i dir: “Sa enn ki obei SENYER pou posed [“later,” NWT] kot i pou reste pour touzour.”​Psonm 37:29; Revelasyon 21:3, 4.

3. Vi ki bann imen i tonm malad e mor, ki ou kapab demann ou lekor?

3 Me ozordi bokou dimoun i tonm malad e mor. Dan bokou landrwa, zot lager e touy kanmarad. Sirman sa pa ti dan plan Bondye. Alor, kwa ki’n al mal e akoz? Zis Labib ki annan larepons.

 EN LENNMI BONDYE

4, 5. (a) Lekel ki ti servi en serpan pour koz avek Ev dan zarden Edenn? (b) Ki mannyer en dimoun onnet i kapab vin en voler?

4 Labib i dir nou ki Bondye i annan en lennmi ki “ganny apele Dyab e Satan.” Satan ti servi en serpan pour koz avek Ev dan zarden Edenn. (Revelasyon 12:9; Zenez 3:1) I ti fer konmsi sa serpan ki ti pe koze.​—Vwar Lezot lenformasyon nimero 7.

5 Be lekel ki ti kree Satan oubyen Dyab? Bondye? Non! Me en bon lanz ki ti dan lesyel ler Bondye ti prepar later pour Adan ek Ev ti sanze e vin en move lanz, Dyab. (Zob 38:4, 7) Ki mannyer sa i posib? Be ki mannyer en dimoun onnet i kapab sanze e vin en voler? I pa’n ne konman en voler. Me i konmans anvi bann keksoz ki pa pour li. I kontinyen mazin lo tousala e son move dezir i vin pli for. Apre, ler i ganny en sans, i vol sa bann keksoz. Li menm ki’n sanze e vin en voler.​—Lir Zak 1:13-15; vwar Lezot lenformasyon nimero 8.

6. Ki mannyer en lanz ti vin lennmi Bondye?

6 Sanmenm sa ki ti arive avek sa lanz. Apre ki Zeova ti’n kree Adan ek Ev, i ti dir zot fer zanfan e “ranpli later.” (Zenez 1:27, 28) Petet sa lanz ti dir dan li menm, ‘Tou sa bann dimoun ti kapab ador mwan dan plas Zeova!’ Pli i ti mazin lo la, pli i ti anvi sa ladorasyon ki zis pour Zeova. Sa lanz ti anvi ki bann dimoun i ador li. Alor i ti koz manti e anbet Ev. (Lir Zenez 3:1-5.) Ler i ti fer sa, i ti vin Satan oubyen Dyab, en lennmi Bondye.

7. (a) Akoz Adan ek Ev ti mor? (b) Akoz nou vin vye e mor?

7 Adan ek Ev ti dezobei Bondye e manz sa fri. (Zenez 2:17; 3:6) Zot ti fer pese kont Zeova e pli tar zot ti mor, zis parey Zeova ti’n dir ti pou arive. (Zenez 3:17-19)  Bann zanfan Adan ek Ev ti osi fer pese e alor zot ti mor. (Lir Romen 5:12.) Annou vwar en legzanp ki pou ed nou konpran ki mannyer bann zanfan Adan ek Ev ti osi fer pese. Meton ou pe al fer dipen me ou moul in kabose. Ki mannyer ou dipen pou sorti? I pou annan menm defo ki sa moul, pa i vre? Pareyman, ler Adan ti dezobei Bondye, i ti fer pese. Vi ki nou tou nou bann zanfan Adan, nou tou nou annan sa menm “defo” ki li i ti annan, setadir nou fer pese. Aprezan vi ki nou tou nou fer pese, nou vin vye e mor.​—Romen 3:23; vwar Lezot lenformasyon nimero 9.

8, 9. (a) Ki Satan ti oule fer Adan ek Ev krwar? (b) Akoz Zeova pa ti touy bann rebel toudswit?

8 Ler Satan ti enfliyans Adan ek Ev pour dezobei Bondye, i ti konmans en rebelyon kont Zeova. I ti oule ki Adan ek Ev i krwar ki Zeova i koz manti e ki i en move dirizan ki pa oule sa ki pli bon pour zot. Satan ti pe dir ki bann imen pa bezwen ki Bondye i dir zot ki pour fer e ki Adan ek Ev ti kapab desid lo zot menm kwa ki bon e kwa ki mal. Alor, ki Zeova ti pou fer? I ti’n kapab touy bann rebel e met en lafen avek sa rebelyon. Me eski sa ti pou’n prouve ki Satan ti’n koz manti? Non.

9 Se pour sa ki Zeova pa ti touy bann rebel toudswit. O kontrer, i ti donn bann imen letan pour diriz zot menm. Sa ti pou montre klerman ki Satan i koz manti e ki Zeova i konnen kwa ki pli bon pour bann imen. Nou pou aprann plis lo sa dan Sapit 11. Me ki ou panse lo sa desizyon ki Adan ek Ev ti fer? Eski i ti byen pour zot krwar Satan e dezobei Bondye? Zeova ti’n donn Adan ek Ev tou sa ki zot ti annan. I ti donn zot en lavi parfe, en zoli landrwa reste e en travay ki ti gou pour  zot fer. Me Satan pa ti’n zanmen fer nanryen pour zot. Si ou ti dan zot plas, ki ou ti pou’n fer?

10. Ki desizyon enportan nou tou nou annan pour fer?

10 Ozordi, nou tou nou annan preski menm desizyon pour fer e nou lavi i depan lo sa desizyon. Swa  nou swazir pour obei Zeova konman nou Dirizan e ede prouve ki Satan i koz manti, swa nou swazir Satan konman nou dirizan. (Psonm 73:28; lir Proverb 27:11.) Napa bokou dimoun dan sa lemonn ki obei Bondye. Anfet, pa Bondye ki sef sa lemonn. Me lekel alor ki sef sa lemonn?

LEKEL KI PE DIRIZ SA LEMONN?

Si Satan ti napa tou sa bann rwayonm, eski i ti pou’n kapab ofer zot avek Zezi?

11, 12. (a) Ki Satan ti ofer Zezi e ki sa i montre nou? (b) Ki verse Labib ki montre ki Satan i sef sa lemonn?

11 Zezi ti konn tre byen lekel ki pe vreman diriz sa lemonn. En fwa, Satan “ti montre li tou bann rwayonm dan sa lemonn e zot laglwar.” Apre, Satan ti fer sa promes avek Zezi: “Tousala mon pou donn ou si ou azenou devan mwan e ador mwan.” (Matye 4:8, 9; Lik 4:5, 6) Demann ou lekor, ‘Si Satan ti napa tou sa bann rwayonm, eski i ti pou’n kapab ofer zot avek Zezi?’ Non. Alor sa i montre ki tou bann gouvernman i pour Satan.

12 Me petet sa i fer ou demande: ‘Ki mannyer i posib ki Satan in vin sef sa lemonn? Apre tou, pa Zeova, Bondye Tou Pwisan ki ti kree liniver?’ (Revelasyon 4:11) Wi, Bondye ki ti kree later, me Zezi ti klerman dir ki Satan i “sef sa lemonn.” (Zan 12:31; 14:30; 16:11) Zapot Pol ti apel Satan “bondye sa lemonn.” (2 Korentyen 4:3, 4) Zapot Zan osi ti ekri ki “lemonn antye i anba kontrol Satan.”​—1 Zan 5:19.

KI MANNYER LEMONN SATAN POU GANNY DETRIR?

13. Akoz nou bezwen en nouvo lemonn?

13 Sak zour ki pase sa lemonn i vin pli danzere. Nek nou vwar lager, koripsyon, lipokrizi ek vyolans partou  kote. Malgre tou zefor ki bann imen pe fer, zot pa kapab rezourd sa bann problenm. Me byento Bondye pou detri sa move lemonn pandan lager Armagedon e i pou ranplas li avek en nouvo lemonn kot i pou annan ladrwatir.​—Revelasyon 16:14-16; vwar Lezot lenformasyon nimero 10.

14. Lekel ki Bondye in swazir pour vin Lerwa dan Son Rwayonm? Ki Labib ti predir konsernan Zezi?

14 Zeova in swazir Zezi Kri konman Lerwa Son gouvernman andotmo son Rwayonm ki dan lesyel. I fer plizyer milye lannen depi ki Labib ti predir ki Zezi ti pou diriz konman “Prens Lape” e ki son gouvernman ti pou diriz pour touzour. (Izai 9:6, 7) Zezi ti montre son bann disip konman pour priy pour sa gouvernman ler i ti dir: “Ki ou Rwayonm i vini. Ki ou lavolonte i ganny fer lo later parey dan lesyel.” (Matye 6:10) Dan Sapit 8, nou pou aprann ki mannyer Rwayonm Bondye pou ranplas tou sa bann gouvernman lo later. (Lir Danyel 2:44.) Apre sa, Rwayonm Bondye pou fer later vin en zoli paradi.​—Vwar Lezot lenformasyon nimero 11.

BYENTO I POU ANNAN EN NOUVO LEMONN!

15. Kisisa sa “nouvo later”?

15 Labib i fer sa promes: “Nou pe esper en nouvo lesyel ek en nouvo later kot i pou annan ladrwatir.” (2 Pyer 3:13; Izai 65:17) Parfwa ler Labib i mansyonn “later,” i pe koz lo dimoun ki viv lo later. (Deterononm 32:1) Alor sa “nouvo later” kot i pou annan ladrwatir pe koz lo tou dimoun ki obei Bondye e ganny son benediksyon.

16. Ki zoli kado Bondye pou donn bann ki pou viv dan nouvo lemonn e ki nou bezwen fer pour ganny sa kado?

 16 Zezi ti promet ki bann ki viv dan nouvo lemonn Bondye pou ganny “lavi eternel.” (Mark 10:30) Ki nou bezwen fer pour ganny sa kado? Pour reponn sa kestyon, silvouple lir Zan 3:16 ek Zan 17:3. Aprezan annou vwar ki Labib i dir lo konman lavi pou ete dan Paradi lo later.

17, 18. Ki mannyer nou konnen ki i pou annan lape partou lo later e ki nou pou santi nou an sekirite?

17 Move dimoun, lager, krim ek vyolans pou nepli egziste. I pou nepli annan okenn move dimoun lo later. (Psonm 37:10, 11) Bondye pou “fer lager arete partou lo later.” (Psonm 46:9; Izai 2:4) Later pou ranpli avek dimoun ki kontan e obei Bondye. I pou toultan annan lape.​—Psonm 72:7.

18 Pep Zeova pou santi zot an sekirite. Dan lepase, ler bann Izraelit ti obei Bondye, zot ti an sekirite parski i ti protez zot. (Levitik 25:18, 19) Dan Paradi, i pou napa personn oubyen okenn keksoz ki pou fer nou per. Nou pou toultan santi nou an sekirite!​—Lir Izai 32:18; Mika 4:4.

19. Akoz nou kapab asire ki i pou annan en kantite manze dan nouvo lemonn Bondye?

19 I pou annan en kantite manze. Later pou “prodwi en kantite dible e bann kolin ava kouver avek bann zepi.” (Psonm 72:16) Zeova “nou Bondye [pou] beni nou” e “later [pou] donn son bann rekolt.”​—Psonm 67:6.

20. Ki mannyer nou konnen ki later pou vin en paradi?

20 Later antye pou vin en paradi. Tou dimoun pou annan bann zoli lakaz ek zarden. (Lir Izai 65:21-24;  Revelasyon 11:18.) Later antye pou vin zoli zis parey zarden Edenn ti zoli. Zeova pou toultan donn nou tou sa ki nou bezwen. Labib i dir sa lo Zeova: “Ou ouver ou lanmen e ou satisfer dezir tou kreatir.”​—Psonm 145:16.

21. Ki mannyer nou konnen ki imen ek zannimo pou anpe avek kanmarad?

21 Imen ek zannimo pou anpe avek kanmarad. Bann zannimo pou nepli fer ditor bann imen. Bann pti manrmay pa pou per bann zannimo, menm bann ki danzere konmela.​—Lir Izai 11:6-9; 65:25.

22. Ki Zezi pou fer avek bann dimoun ki malad?

22 Personn pa pou malad. Ler Zezi ti lo later, i ti geri bokou dimoun. (Matye 9:35; Mark 1:40-42; Zan 5:5-9) Me konman Lerwa dan Rwayonm Bondye, Zezi pou geri tou dimoun. I pou napa personn ki pou dir: “Mon malad.”​—Izai 33:24; 35:5, 6.

23. Ki Bondye pou fer pour bann dimoun ki’n mor?

23 Bann dimoun ki’n mor pou reganny lavi. Bondye i promet ki i pou resisit plizyer milyon dimoun ki’n mor. “Dimoun bon konman move pou resisite.”​—Lir Zan 5:28, 29; Akt 24:15.

24. Ki mannyer ou santi konsernan viv dan Paradi?

24 Nou tou nou annan en swa. Nou kapab swazir pour aprann lo Zeova e servi li ouswa nou kapab senpleman fer sa ki nou nou anvi. Si nou swazir pour servi Zeova, nou kapab annan en zoli lavenir. Ler en zonm ti demann Zezi pour mazin li ler i mor, Zezi ti promet li: “Ou pou avek mwan dan Paradi.” (Lik 23:43) Annou aprann plis lo Zezi Kri e lo konman i pou fer bann zoli promes Bondye vin vre.