Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i dir?

 SAPIT SENK

Ranson i pli gro kado Bondye

Ranson i pli gro kado Bondye

1, 2. (a) Kwa ki fer en kado annan valer pour ou? (b) Akoz ranson i pli gro kado Bondye?

KI SA pli gro kado ki ou’n deza gannyen? En kado pa bezwen kout ser pour li annan valer pour ou. Si en kado i fer ou ere oubyen i en keksoz ki ou vreman bezwen, ou kontan sa kado.

2 Parmi tou bann kado ki Bondye in donn nou, i annan enn ki nou bezwen plis ki okenn lezot keksoz. Sa i sa pli gro kado ki Bondye in donn bann imen. Dan sa sapit, nou pou aprann ki Zeova ti anvoy son Garson Zezi Kri lo later pour donn son lavi konman en ranson pour liber nou pour ki nou kapab viv pour touzour. (Lir Matye 20:28.) Lefet ki Zeova ti anvoy Zezi lo later, sa i prouve ki Zeova i vreman kontan nou.

KISISA RANSON?

3. Akoz bann imen i mor?

3 Ranson i sa mwayen ki Zeova i servi pour liber bann imen avek pese ek lanmor. (Efezyen 1:7) Pour nou konpran akoz ki nou bezwen ranson, nou bezwen konnen ki ti arive plizyer milye lannen pase dan zarden Edenn. Nou premye paran, Adan ek Ev, ti fer pese. Akoz sa, zot ti mor. Nou osi nou mor parski nou’n erit pese avek Adan ek Ev.​—Vwar Lezot lenformasyon nimero 9.

4. Lekel Adan e ki Zeova ti donn li?

 4 Ler Zeova ti kree sa premye zonm Adan, I ti donn li en keksoz vreman presye, sa i en lavi parfe. Adan ti annan en lespri ek lekor parfe. I pa ti pou zanmen tonm malad, vin vye e mor. Vi ki Zeova ti kree Adan, I ti parey en papa pour li. (Lik 3:38) Zeova ti koz avek li souvan. Bondye ti eksplik Adan byen sa ki i ti ekspekte avek li e i ti donn li en travay ki ti gou pour fer.​—Zenez 1:28-30; 2:16, 17.

5. Ki savedir ki Adan ti ganny kree dan resanblans Bondye?

5 Adan ti ganny kree dan resanblans Bondye. (Zenez 1:27) Sa i vedir ki Zeova ti kree Adan avek bann kalite ki li menm i ti annan. Sa ti enkli lanmour, lasazes, lazistis ek pwisans. I ti osi donn Adan liberte pour swazir. Adan pa ti en robot. Bondye ti kree li avek sa abilite pour swazir pour fer sa ki byen ouswa sa ki mal. Si Adan ti’n swazir pour obei Bondye, i ti’n kapab viv pour touzour dan Paradi.

6. Ki Adan ti perdi ler i ti dezobei Bondye? Ki mannyer sa in afekte nou?

6 Ler Adan ti dezobei Bondye e ganny kondannen amor, sa ti kout li byen ser. I ti perdi son lanmitye spesyal avek Zeova, son lavi parfe e sa Paradi kot i ti reste. (Zenez 3:17-19) Adan ek Ev ti swazir pour dezobei Bondye, alor i ti napa okenn lespwar pour zot. Akoz sa ki Adan ti fer, “pese in antre dan lemonn e pese in anmenn lanmor, alor tou dimoun i mor parski tou dimoun in fer pese.” (Romen 5:12) Ler Adan ti fer pese, i ti “vann” son lekor e nou osi e nou’n vin lesklav pese ek lanmor. (Romen 7:14) Alor, eski i annan okenn lespwar pour nou? Wi, i annan.

7, 8. Kisisa en ranson?

 7 Kisisa en ranson? En ranson i enplik de keksoz. Premyerman, en ranson i sa pri ki ganny peye pour liber en dimoun ouswa reaste en keksoz. Dezyenmman, en ranson i sa pri ki kouver lavaler sa ki’n ganny perdi.

8 Napa okenn imen ki kapab pey pri pour kouver domaz ki Adan ti fer ler i ti fer pese e anmenn lanmor lo nou tou. Me Zeova in fer li posib pour liber nou avek pese ek lanmor. Annou vwar ki mannyer Zeova ti pey sa ranson e ki mannyer nou kapab benefisye avek sa ranson.

KI MANNYER ZEOVA TI PEY SA RANSON?

9. Ki mannyer ranson ti ganny peye?

9 Napa personn parmi nou ki ti pou kapab pey sa pri (ranson) pour sa lavi parfe ki Adan in perdi. Akoz non? Parski nou tou nou enparfe. (Psonm 49:7, 8) Sa ranson oubyen pri ki ti bezwen ganny peye ti en lot lavi imen parfe. Sanmenm sa i ganny apele “en ranson ki koresponn.” (1 Timote 2:6, not) Sa ranson ti bezwen annan menm valer avek sa lavi ki Adan ti perdi.

10. Ki Zeova ti fer pour li kapab pey sa ranson?

10 Ki Zeova ti fer pour li kapab pey sa ranson? Zeova ti anvoy son Garson ki i ti pli kontan lo later. Sa Garson, Zezi, ti sa premye keksoz ki Bondye ti kree. (1 Zan 4:9, 10) Zezi ti pare pour kit son Papa ek son landrwa reste dan lesyel. (Filipyen 2:7) Zeova ti anvoy Zezi ki ti dan lesyel lo later kot i ti ne konman en imen parfe san okenn pese.​—Lik 1:35.

Zeova ti donn son Garson byenneme konman en ranson pour nou

11. Ki mannyer en zonm ti kapab pey sa ranson pour tou dimoun?

 11 Ler sa premye zonm Adan ti dezobei Zeova, tou bann imen ti perdi lavi parfe. Eski en lot zonm ti pou kapab redonn sa lavi parfe avek tou bann zanfan Adan? Wi. (Lir Romen 5:19.) Zezi ki pa ti zanmen fer okenn pese ti donn son lavi parfe konman en ranson. (1 Korentyen 15:45) Son lavi parfe ti pou kapab ganny servi pour redonn lavi parfe tou bann desandans Adan.​—1 Korentyen 15:21, 22.

12. Akoz Zezi ti bezwen soufer sa kantite?

12 Labib i dekrir ki kantite soufrans Zezi ti pas atraver. I ti ganny fwete, kloute lo poto e i ti soufer en kantite avan i mor. (Zan 19:1, 16-18, 30) Akoz Zezi ti bezwen soufer sa kantite? Parski Satan ti’n dir ki napa okenn imen ki ti pou reste fidel avek Bondye si i pas atraver bann gro leprev. Zezi ti prouve ki en zonm parfe i kapab reste fidel avek Bondye menm si i bezwen soufer en kantite. Zis mazinen ki kantite Zezi ti fer Zeova fyer!​—Proverb 27:11; vwar Lezot lenformasyon nimero 15.

13. Ki mannyer ranson ti ganny peye?

13 Ki mannyer sa ranson ti ganny peye? Zezi ti prezant son Papa valer son lavi. Le 14 Nizan lannen 33 lo kalandriye Zwif, Zeova ti permet bann lennmi Zezi touy li. (Ebre 10:10) Trwa zour pli tar, Zeova ti redonn Zezi lavi, me safwasi pa konman en imen, me konman en lespri. Pli tar, ler Zezi ti retourn kot son Papa dan lesyel, i ti prezant valer son lavi parfe avek Zeova konman en ranson. Andotmo, i ti donn Zeova son drwa pour viv konman en imen parfe lo later pour ki Zeova i kapab redonn sa lavi parfe bann desandans  Adan. (Ebre 9:24) La ki sa ranson in ganny peye, i posib pour nou ganny libere avek pese ek lanmor.​—Lir Romen 3:23, 24.

KI MANNYER OU KAPAB BENEFISYE AVEK SA RANSON?

14, 15. Ki nou bezwen fer pour nou pese ganny pardonnen?

14 Nou deza pe benefisye avek pli gro kado Bondye. Annou vwar ki mannyer nou pe benefisye la konmela menm e ki mannyer nou pou benefisye a lavenir.

15 Nou bann pese i ganny pardonnen. I difisil pour toultan fer sa ki byen. Nou fer bann fot e par ler nou dir oubyen fer sa ki mal. (Kolosyen 1:13, 14) Ki mannyer nou kapab ganny pardonnen? Nou devret senserman regret sa ki nou’n fer, abes nou e demann Zeova pour pardonn nou. Apre sa, nou kapab asire ki nou pese in ganny pardonnen.​—1 Zan 1:8, 9.

16. Ki nou bezwen fer pour annan en konsyans kler?

16 Nou kapab annan en konsyans kler. Si nou konsyans i fer nou santi ki nou’n fer en keksoz mal, nou kapab santi nou koupab, petet menm dezespere e ki nou napa okenn valer. Me i napa okenn rezon pour nou bes lebra. Si nou sipliy Zeova pour pardonn nou, nou kapab asire ki i pou ekout nou e pardonn nou. (Ebre 9:13, 14) Zeova i oule ki nou koz avek li lo okenn problenm oubyen febles ki nou annan. (Ebre 4:14-16) Koumsa nou kapab annan en konsyans kler devan Bondye.

17. Vi ki Zezi ti mor pour nou, ki benediksyon nou kapab gannyen?

17 Nou annan sa lespwar pour viv pour touzour. “Konsekans pese se lanmor, me sa kado ki Bondye i  donnen se lavi eternel gras a Kris Zezi nou Senyer.” (Romen 6:23) Vi ki Zezi ti mor pour nou, nou kapab viv pour touzour e an bonn sante. (Revelasyon 21:3, 4) Me ki nou bezwen fer pour ganny sa bann benediksyon?

ESKI OU POU DEMONTRE LAFWA DAN SA RANSON?

18. Ki mannyer nou konnen ki Zeova i kontan nou?

18 Zis mazinen ki kantite ou kontan ler en dimoun i donn ou en zoli kado. Napa pli zoli kado ki sa ranson e nou devret vreman rekonesan anver Zeova pour sa kado. Zan 3:16 i dir nou ki “Bondye in telman kontan lemonn ki i’n donn son sel Garson.” Wi, Zeova i telman kontan nou ki i ti donn nou son Garson byenneme. Deplis, nou konnen ki Zezi osi i kontan nou parski i ti pare pour mor pour nou. (Zan 15:13) Sa kado i devret fer ou asire ki Zeova ek Zezi i vreman kontan ou.​—Galat 2:20.

Anmezir ki nou aprann konn Zeova, nou pou vin son zanmi e nou lanmour pour li pou vin pli for

19, 20. (a) Ki mannyer ou kapab vin zanmi Zeova? (b) Ki mannyer ou kapab demontre lafwa dan sa ranson ki Zezi in peye?

19 La ki ou’n aprann ki kantite Zeova i kontan ou, ki mannyer ou kapab vin son zanmi? I pa fasil pour kontan en dimoun ki ou pa konnen. Zan 17:3 i dir ki nou kapab aprann konn Zeova. Anmezir ki ou fer sa, ou lanmour pour li pou vin pli for, ou pou anvi fer sa ki i kontan e ou pou vin son zanmi. Alor kontinyen etidye Labib pour ou aprann plis lo Zeova.​—1 Zan 5:3.

20 Demontre lafwa dan ranson ki Zezi in peye. Labib i dir ki “sa enn ki demontre lafwa dan Garson i ganny lavi eternel.” (Zan 3:36) Ki savedir demontre lafwa? I vedir fer sa ki Zezi ti ansenny nou pour fer. (Zan 13:15) Nou pa kapab zis dir avek nou labous ki nou  krwar dan Zezi. Me pour demontre lafwa dan sa ranson, nou bezwen fer bann keksoz ki montre ki nou annan lafwa. Zak 2:26 i dir: “Lafwa san aksyon . . . i mor.”

21, 22. (a) Akoz nou devret asiste Memoryal lanmor Zezi Kri tou le-z-an? (b) Ki nou pou vwar dan Sapit 6 ek 7?

21 Asiste Memoryal lanmor Kris. Sa zour swar avan Zezi ti mor, i ti ansenny nou ki nou devret selebre en memoryal pour mazin son lanmor. Nou fer sa tou le-z-an e sa i apel Memoryal oubyen “Repa Senyer.” (1 Korentyen 11:20; Matye 26:26-28) Zezi i anvi ki nou rapel ki i ti donn son lavi parfe konman en ranson pour nou. I ti dir: “Kontinyen fer sa pour montre ki zot pe mazin mwan.” (Lir Lik 22:19.) Ler ou asiste Memoryal, ou montre ki ou rekonesan pour sa ranson e sa gran lanmour ki Zeova ek Zezi i annan pour nou.​—Vwar Lezot lenformasyon nimero 16.

22 Napa pli zoli kado ki sa ranson. (2 Korentyen 9:14, 15) Plizyer milyon dimoun ki’n mor pou osi benefisye avek sa ranson. Dan Sapit 6 ek 7, nou pou vwar konman sa i posib.