Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i dir?

 SAPIT SIS

Kote nou ale ler nou mor?

Kote nou ale ler nou mor?

1-3. Ki kestyon dimoun i souvan demande konsernan lanmor e ki larepons serten larelizyon i donnen?

LABIB i promet nou ki en zour “i pou nepli annan . . . lanmor.” (Revelasyon 21:4) Dan Sapit 5, nou ti aprann ki ranson i fer li posib pour nou viv pour touzour. Me pour lemoman dimoun i ankor pe mor. (Eklezyast 9:5) Alor enn bann kestyon pli enportan ki nou kapab demande i, Ki arive avek nou ler nou mor?

2 Nou sirtou anvi konn larepons sa kestyon ler en dimoun ki nou kontan i mor. Petet nou anvi konnen: ‘Kote i’n ale? Eski i pe get nou? Eski i kapab ed nou? Eski en zour nou pou vwar li ankor?’

3 Bann larelizyon i reponn sa bann kestyon dan diferan fason. Serten i dir ki si ou en bon dimoun, ou pou al dan lesyel e si ou en move dimoun, ou pou ganny brile dan lanfer. Lezot i dir ki ler ou mor, ou vin en lespri e ou al viv avek ou bann fanmir ki’n fini mor. Lezot ankor i dir ki apre ki ou’n mor e ganny zize, ou pou ne ankor oubyen reganny lavi dan en lot lekor, petet konman en lot dimoun ouswa menm konman en zannimo.

4. Ki bann larelizyon i ansennyen konsernan lanmor?

4 I paret ki bann larelizyon i ansenny bann keksoz ki konpletman diferan avek kanmarad. Me preski zot tou i ansenny menm krwayans. Zot dir ki ler en  dimoun i mor, i annan en keksoz dan li ki kontinyen viv. Eski sa i vre?

KOTE NOU ALE LER NOU MOR?

5, 6. Ki arive avek nou ler nou mor?

5 Zeova i konnen ki arive avek nou ler nou mor e i’n dir nou ki ler en dimoun i mor, son lavi i fini, i nepli egziste okenn par. Lanmor i lekontrer avek lavi. Alor ler en dimoun i mor, lespri oubyen nanm sa dimoun pa kontinyen viv dan en lot landrwa. * Ler nou mor, nou nepli kapab vwar, tande, reflesir oubyen rapel sa ki nou ti fer ler nou ti vivan.

6 Lerwa Salomon ti ekri ki ‘bann mor pa konn nanryen.’ Bann dimoun mor pa kapab ni kontan ni ay okenn keksoz e i “napa ni aktivite, ni rezon, ni konnesans, ni lasazes” dan Latonm. (Lir Eklezyast 9:5, 6, 10.) Dan Psonm 146:4 (NWT), Labib i dir ki ler en dimoun i mor, son ‘bann panse i mor avek li.’

KI ZEZI TI DIR LO LANMOR?

Zeova ti kree bann imen pour viv pour touzour lo later

7. Ki Zezi ti dir lo lanmor?

7 Ler Lazar, en bon zanmi Zezi ti mor, Zezi ti dir son bann disip: “Lazar nou zanmi in tonm dormi.” Me Zezi pa ti pe dir ki Lazar ti pe repoze. Alor Zezi ti dir: “Lazar in mor.” (Zan 11:11-14) Zezi ti konpar lanmor avek ler en dimoun pe dormi. I pa ti dir ki Lazar ti dan lesyel oubyen avek son fanmir ki ti’n deza mor. Osi i pa ti dir ki Lazar ti pe soufer dan lanfer oubyen ki i ti pou ne ankor konman en lot imen ouswa  zannimo. Non, i ti konmsi Lazar ti dan en profon sonmey. I annan lezot verse ki konpar lanmor avek en profon sonmey. Labib i dir ki ler Etyenn ti ganny touye, “i ti tonm dormi dan lanmor.” (Akt 7:60, not) Zapot Pol osi ti ekri ki serten Kretyen ti’n “tonm dormi dan lanmor.”​—1 Korentyen 15:6, not.

8. Ki mannyer nou konnen ki Bondye pa ti kree bann imen pour zot mor?

8 Eski Bondye ti kree Adan ek Ev pour ki avek letan zot mor? Non! Zeova ti kree zot pour viv pour touzour an bonn sante e dan lazwa. Zeova ti kree bann imen  avek sa dezir pour viv pour touzour. (Eklezyast 3:11, NWT) Bann paran pa anvi vwar zot zanfan vin vye e mor e Zeova i santi parey anver nou. Me akoz nou mor si Bondye ti kree nou pour viv pour touzour?

AKOZ NOU MOR?

9. Akoz sa lord ki Zeova ti donn Adan ek Ev ti rezonnab?

9 Dan zarden Edenn, Zeova ti dir avek Adan: “Ou kapab manz tou fri ki dan zarden; me fodre pa ki ou manz fri sa pye ki donn konnesans lebyen ek lemal, akoz zour ki ou manz sa fri, ou pou mor.” (Zenez 2:9, 16, 17) Sa lord kler pa ti difisil pour obei e Zeova ti ganny drwa dir Adan ek Ev kwa ki byen e kwa ki mal. Si zot ti obei Zeova, sa ti pou montre ki zot ti respekte son lotorite. Sa ti pou osi montre ziska ki degre zot ti rekonesan pour tou sa ki i ti’n donn zot.

10, 11. (a) Ki mannyer Satan ti anbet Adan ek Ev? (b) Akoz Adan ek Ev ti napa okenn leskiz pour sa ki zot ti fer?

10 Malerezman, Adan ek Ev ti swazir pour dezobei Zeova. Satan ti dir avek Ev: “Eski Bondye in vreman dir: Ou pa devre manz tou bann fri lo bann pye ki dan zarden?” Ev ti reponn: “Nou kapab manz bann fri lo bann pye ki dan zarden. Me kanta fri sa pye dibwa ki dan milye zarden, Bondye in dir: Pa manz li, pa ni tous li, sankwa ou pou mor.”​—Zenez 3:1-3.

11 Apre Satan ti dir: “Zot pa pou mor. Bondye i konnen ki letan zot pou manz sa fri, zot lizye pou ouver, zot pou vin parey Bondye, e zot pou konn lebyen ek lemal.” (Zenez 3:4-6) Satan ti oule ki Ev i krwar ki i ti kapab desid pour li menm kwa ki bon e kwa ki mal. An menm tan, i ti koz manti lo sa ki ti pou arive si i ti  dezobei. Satan ti dir ki Ev pa ti pou mor, alor Ev ti manz en bout sa fri e apre i ti donn son msye en bout. Adan ek Ev ti konnen ki Zeova ti’n dir zot pa manz sa fri. Ler zot ti manz sa fri, zot ti swazir pour dezobei en lord kler e rezonnab e zot ti montre ki zot ti mank respe pour zot bon Papa ki dan lesyel. Zot ti napa okenn leskiz pour sa ki zot ti fer!

12. Akoz i vreman tris ki Adan ek Ev ti dezobei Zeova?

12 Pa i tris pour mazinen ki nou premye paran ti sitan mank respe pour zot Kreater! Ki mannyer ou ti pou santi si ou ti travay dir pour elve ou garson ek ou fiy e apre zot rebel kont ou e fer konpletman lekontrer avek sa ki ou ti’n demann zot? Pa i ti pou kas ou leker?

Adan ti ganny fer avek lapousyer e i ti revin lapousyer

13. Ki Zeova ti oule dir ler i ti dir “ou pou retourn dan lapousyer”?

13 Ler Adan ek Ev ti dezobei Bondye, zot ti nepli kapab viv pour touzour. Zeova ti’n dir avek Adan: “Ou’n ganny tire dan lapousyer, ou pou retourn dan lapousyer.” (Lir Zenez 3:19.) Sa ti vedir ki Adan ti pou revin lapousyer, konmsi i pa ti’n zanmen egziste. (Zenez 2:7) Apre ki Adan ti fer pese, i ti mor e i ti nepli egziste.

14. Akoz nou mor?

14 Si Adan ek Ev ti’n obei Bondye, zot ti pou ankor vivan ozordi. Me ler zot ti dezobei  li, zot ti fer pese e pli tar zot ti mor. Pese i parey en maladi grav ki nou’n erite avek nou premye paran. Nou tou nou fer pese e sanmenm sa ki nou tou nou mor. (Romen 5:12) Me sa pa ti plan Bondye pour bann imen. Bondye pa ti zanmen anvi ki bann imen i mor e Labib i apel lanmor en “lennmi.”​—1 Korentyen 15:26.

LAVERITE I LIBER NOU

15. Ki mannyer laverite lo lanmor i liber nou?

15 Ler nou aprann laverite lo lanmor, sa i liber nou avek bann fo krwayans. Labib i dir nou ki bann dimoun mor pa pe soufer oubyen dan lapenn. Nou pa kapab koz avek zot e zot pa kapab koz avek nou. Nou pa kapab ed bann dimoun mor e zot pa kapab ed nou. Nou pa devret per zot akoz zot pa kapab fer nou ditor. Par kont, i annan bokou larelizyon ki dir ki bann dimoun mor i vivan kekpar e ki nou kapab ed zot si nou pey bann pret oubyen serten lezot dimoun. Me ler nou konn laverite lo lanmor, nou pa ganny anbete avek sa bann mansonz.

16. Ki mansonz bokou larelizyon i ansennyen konsernan bann dimoun mor?

16 Satan i servi bann fo larelizyon pour anbet dimoun e fer zot krwar ki bann dimoun mor i ankor vivan. Par egzanp, serten larelizyon i dir ki ler nou mor, i annan en keksoz ki sorti dan nou e ki kontinyen viv dan en lot landrwa. Eski ou larelizyon i dir sa oubyen i ansenny sa ki Labib i dir konsernan bann dimoun mor? Satan i koz manti pour fer dimoun aret kontan Zeova.

17. Akoz sa krwayans lo lanfer i ensilte Zeova?

 17 Sa ki bokou larelizyon i ansennyen i sokan. Par egzanp, serten i ansennyen ki bann move dimoun pou ganny brile dan lanfer pour touzour. Sa i ensilte Zeova. I pa ti pou zanmen les dimoun soufer dan sa fason! (Lir 1 Zan 4:8.) Ki mannyer ou ti pou santi si ou ti tande ki en dimoun i pini son zanfan par met son lanmen dan dife? Pa ou ti pou dir ki sa dimoun i vreman kriyel! Eski ou ti pou anvi vin pros avek sa dimoun? Be koumsanmenm ki Satan i oule nou santi konsernan Zeova!

18. Akoz nou pa devret per bann dimoun mor?

18 Serten larelizyon i dir ki ler dimoun i mor, zot vin bann lespri. Zot osi dir ki nou bezwen respekte bann lespri parski zot kapab ed nou e ki nou bezwen per zot akoz zot kapab fer nou ditor. Bokou dimoun i krwar sa mansonz. Zot per bann dimoun mor, alor zot ador zot olye Zeova. Me rapel ki bann dimoun mor nepli egziste e ki zot napa okenn santiman, alor nou pa bezwen per zot. Zeova i nou Kreater. Li ki sa vre Bondye e nou devret ador zis li.​—Revelasyon 4:11.

19. Ki mannyer konn laverite lo lanmor i ed nou?

19 Ler nou konn laverite lo lanmor, nou ganny libere avek sa bann mansonz ki bann larelizyon i ansennyen. Sa i osi ed nou pour konpran bann zoli promes Zeova lo lavi ek lavenir.

20. Ki nou pou aprann dan Sapit 7?

20 En bon pe letan pase, en serviter Bondye ki apel Zob ti demande: “Eski en dimoun mor, i kapab reviv?” (Zob 14:14) Eski i vreman posib pour en dimoun ki’n mor reviv? Larepons ki Bondye i donnen dan Labib i vreman rekonfortan. Nou pou vwar sa dan Sapit 7.

^ par. 5 Serten i krwar ki en nanm ouswa lespri i kontinyen viv apre ki en dimoun in mor. Vwar Lezot lenformasyon nimero 17 ek 18.