Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i dir?

 SAPIT KATORZ

Ou fanmir i kapab ere

Ou fanmir i kapab ere

1, 2. Ki Bondye i anvi pour bann fanmir?

ZEOVA ti marye sa premye koup imen. Labib i dir nou ki i ti kree sa premye madanm e “i ti anmenn li kot sa zonm.” Adan ti telman kontan ki i ti dir: “La aprezan sa enn ki mon lezo e mon laser.” (Zenez 2:22, 23) Sa i montre nou ki Zeova i anvi ki bann dimoun marye i ere.

2 Malerezman, i annan bokou dimoun ki pa’n zanmen annan en lavi fanmir ere. Me dan Labib, i annan bokou prensip ki pou ed tou dimoun dan fanmir pour fer zot par pour ki fanmir i mars byen e ki zot ere ansanm.​—Lik 11:28.

KI BONDYE I EKSPEKTE AVEK BANN MSYE?

3, 4. (a) Ki mannyer en msye i devret tret son madanm? (b) Akoz i enportan pour en msye ek en madanm pardonn kanmarad?

3 Labib i dir ki en bon msye i devret tret son madanm avek lanmour ek respe. Silvouple lir Efezyen 5:25-29. En msye pou toultan tret son madanm avek lanmour. I pou osi protez li, pran swen avek li e i pa pou fer nanryen ki pou fer li ditor.

4 Me ki en msye i devret fer ler son madanm i fer fot? Bann msye i ganny demande pour: “Kontinyen kontan zot madanm e pa bezwen pran lakoler avek zot.” (Kolosyen 3:19) Bann msye, rapel ki zot osi zot fer fot. Si zot oule ki Bondye i pardonn zot, zot  bezwen pardonn zot madanm. (Matye 6:12, 14, 15) Ler tou le de msye ek madanm i pare pour pardonn kanmarad, sa pou ed zot annan en lavi maryaz ki ere.

5. Akoz en msye i devret onor son madanm?

5 Zeova i ekspekte ki en msye i onor son madanm. En msye i devret mazin seryezman lo sa ki son madanm i bezwen. Sa i vreman enportan. Parski Zeova i kapab refize ekout lapriyer en msye si i pa tret byen son madanm. (1 Pyer 3:7) Zeova pa prefer bann msye plis ki bann madanm. Alor, si en msye oubyen madanm i kontan Zeova i annan valer pour li.

6. Ler Labib i dir ki en msye ek en madanm i “en sel,” ki sa i vedir?

6 Zezi ti eksplike ki en msye ek en madanm i “nepli de me en sel.” (Matye 19:6) Zot fidel avek kanmarad e zot pa ti pou zanmen tronp kanmarad. (Proverb 5:15-21; Ebre 13:4) Bann msye ek madanm pa devret mazin zis zot prop lekor e zot devret fer kanmarad plezir dan domenn seksyel. (1 Korentyen 7:3-5) En msye i devret rapel ki “napa en zonm ki’n deza ay son prop lekor, me i nouri li e pran swen avek li.” Alor i devret kontan e seri son madanm. Pli enportan ankor, en madanm i anvi ki son msye i tret li zantiman e avek lanmour.​—Efezyen 5:29.

KI BONDYE I EKSPEKTE AVEK BANN MADANM?

7. Akoz en fanmir i bezwen en sef?

7 Sak fanmir i bezwen annan en sef, en dimoun ki pou gid sa fanmir pour ki zot travay byen ansanm. Dan 1 Korentyen 11:3, Labib i dir: “Kris i sef tou zonm, zonm li i sef madanm e Bondye i sef Kris.”

8. Ki mannyer en madanm i kapab demontre bokou respe pour son msye?

 8 Tou msye i fer fot. Me ler en madanm i siport bann desizyon son msye e travay ansanm avek li volonterman, tou dimoun dan fanmir i benefisye. (1 Pyer 3:1-6) Labib i dir: “En madanm . . . i devret annan en gran respe pour son msye.” (Efezyen 5:33) Eski sa i aplikab si son msye napa menm krwayans ki li? Wi, kantmenm sa i bezwen annan bokou respe pour li. Labib i dir: “Zot bann madanm soumet avek zot msye, koumsa si serten pa obei parol Bondye, san ki zot dir nanryen, zot msye i a kapab ganny persyade pour obei parol Bondye gras a zot kondwit, parski zot pou’n vwar ki zot annan en kondwit pir ek bokou respe.” (1 Pyer 3:1, 2) Bon legzanp en madanm i kapab ed son msye pour konpran e respekte lafwa son madanm.

9. (a) Ki en madanm i devret fer si i pa dakor avek son msye? (b) Ki konsey bann madanm i gannyen dan Tit 2:4, 5?

9 Ki en madanm i kapab fer ler i pa dakor avek son  msye? I devret eksprim son lopinyon avek respe. Par egzanp, Sara ti dir Abraam en keksoz ki Abraam pa ti kontan, me Zeova ti dir li: “Ekout tou sa ki Sara pou dir ou.” (Zenez 21:9-12) I rar ki desizyon final en msye Kretyen pou kont sa ki Labib i dir, alor en madanm i devret siport bann desizyon son msye. (Akt 5:29; Efezyen 5:24) En bon madanm pou pran swen avek son fanmir. (Lir Tit 2:4, 5.) Ler zanfan ek msye en madanm i vwar ki i travay dir pour zot, zot pou annan plis lanmour ek respe pour li.​—Proverb 31:10, 28.

Ki mannyer Sara i en bon legzanp pour bann madanm?

10. Ki Labib i dir konsernan separasyon ek divors?

10 Par ler bann koup i taye pour separe ouswa divorse. Me Labib i dir ki “en madanm marye pa devret separe avek son msye” e ki “en msye pa devret kit son madanm.” (1 Korentyen 7:10, 11) I annan bann sityasyon vreman grav kot bann koup i kapab separe, me sa i en desizyon serye. Ki nou kapab dir lo divors? Labib i montre ki sel rezon valab ki en koup i kapab divorse se si sa msye ouswa sa madanm i fer sèks avek en lot dimoun ki pa son msye ouswa son madanm.​—Matye 19:9.

KI BONDYE I EKSPEKTE AVEK BANN PARAN?

Zezi i en bon legzanp pour sak manm fanmir

11. Kwa ki pli enportan pour bann zanfan?

11 Paran, pas plis letan posib avek ou zanfan. Zot bezwen ou e pli enportan ki tou, zot bezwen ki ou ansenny zot lo Zeova.​—Deterononm 6:4-9.

12. Ki paran i devret fer pour protez zot zanfan?

12 Lemonn Satan pe vin deplizanpli move e i annan serten dimoun ki kapab anvi fer ditor ou  zanfan, menm abiz zot seksyelman. Serten paran i vwar li difisil pour koz lo sa size. Me paran i bezwen koz avek zot zanfan lo sa bann dimoun e montre zot zanfan konman pour protez zot lekor. Paran, ou bezwen protez ou zanfan. *​—1 Pyer 5:8.

13. Ki mannyer paran i devret ansenny zot zanfan?

13 Paran i responsab pour ansenny zot zanfan konman pour konport zot. Ki mannyer ou kapab  ansenny ou zanfan? Zot bezwen ganny formen, me ou pa devret zanmen koriz zot dan en fason dir ouswa brit. (Zeremi 30:11, NWT) Alor pa zanmen koriz ou zanfan ler ou ankoler. Ou pa anvi ki ou parol i parey “en lepe” ki bles zot. (Proverb 12:18) Ed ou zanfan pour konpran akoz ki zot devret obei.​—Efezyen 6:4; Ebre 12:9-11; vwar Lezot lenformasyon nimero 30.

KI BONDYE I EKSPEKTE AVEK BANN ZANFAN?

14, 15. Akoz zanfan i devret obei zot paran?

14 Zezi ti toultan obei son Papa, menm ler i pa ti fasil. (Lik 22:42; Zan 8:28, 29) Zeova i osi ekspekte ki zanfan i obei zot paran.​—Efezyen 6:1-3.

15 Zanfan, menm si ou santi ki i difisil pour obei ou paran, rapel ki ler ou obei, sa i fer tou le de Zeova ek ou paran kontan. *​—Proverb 1:8; 6:20; 23:22-25.

Kwa ki pou ed bann zenn pour reste fidel avek Bondye ler zot ganny tante pour fer sa ki mal?

16. (a) Ki mannyer Satan i esey tant bann zenn pour fer sa ki mal? (b) Akoz i enportan pour swazir bann zanmi ki kontan Zeova?

16 Dyab i kapab servi ou bann zanmi ek lezot zenn pour esey tant ou pour fer sa ki mal. I konnen ki sa kalite presyon i kapab vreman difisil pour reziste. Par egzanp, Dina, fiy Zakob ti annan bann zanmi ki pa ti kontan Zeova. Sa ti fer en kantite problenm pour li ek son fanmir. (Zenez 34:1, 2) Si ou bann zanmi pa kontan Zeova, zot kapab tant ou pour fer en keksoz ki Zeova pa kontan. Sa i kapab fer ou, ou fanmir ek Bondye soufer en kantite. (Proverb 17:21, 25) Sanmenm sa i vreman enportan ki ou fer zanmi  avek bann dimoun ki kontan Zeova.​—1 Korentyen 15:33.

OU FANMIR I KAPAB ERE

17. Ki responsabilite sak dimoun dan fanmir i annan?

17 Ler dimoun dan en fanmir i swiv lenstriksyon Bondye, zot evit bokou problenm ek traka. Alor si ou en msye, kontan ou madanm e tret li avek lanmour. Si ou en madanm, annan respe pour ou msye, soumet avek li e imit legzanp sa madanm ki ganny dekrir dan Proverb 31:10-31. Si ou en paran, ansenny ou zanfan pour kontan Bondye. (Proverb 22:6) Si ou en papa, gid ou fanmir “dan en bon fason.” (1 Timote 3:4, 5; 5:8) Zanfan, obei ou paran. (Kolosyen 3:20) Pa bliye ki tou dimoun dan fanmir i kapab fer en fot, alor abes ou e demann leskiz. Sak manm fanmir i kapab benefisye avek gidans Zeova ki dan Labib.

^ par. 12 Ou kapab ganny plis lenformasyon lo konman pour protez ou zanfan dan sapit 32 dan sa liv Ekout sa Gran Ansennyan, pibliye par Temwen Zeova.

^ par. 15 En zanfan pa oblize obei son paran si son paran i demann li pour fer en keksoz ki kont lalwa Bondye.​—Akt 5:29.