Skip to content

Al lo sa dezyenm lalis

Al lo konteni

Temwen Zeova

Kreol Seselwa

“Reste dan lanmour Bondye”

 LEZOT LENFORMASYON

Rezourd dispit dan biznes

Rezourd dispit dan biznes

Parey i ganny rikorde dan 1 Korentyen 6:1-8, zapot Pol i diskit konsernan bann ka ki’n ganny met ankour ki enplik en frer oubyen en ser Kretyen. I ti eksprim dezapwentman vi ki serten Kretyen an Korent ti “oze rod lazistis devan payen.” (Verse 1) Pol ti donn rezon valab akoz en Kretyen pa devret anmenn son frer ankour, me plito i devret rod fason pou rezourd dispit antre zot atraver lenstriksyon ki ganny donnen dan kongregasyon. Annou konsider serten rezon akoz sa konsey enspire in ganny donnen e apre vwar serten sitiasyon kot sa bann konsey pa neseserman aplikab.

Si nou annan en dezakor dan biznes avek en lot Kretyen, premyerman nou bezwen esey rezourd sa problenm pa dan nou fason me dan lafason ki Zeova i oule. (Proverb 14:12) Parey Zezi ti montre, i pli meyer pour rezourd en problenm o pli vit posib avan ler i vin en sitiasyon vreman serye. (Matye 5:23-26) Malerezman, serten Kretyen pa’n reisi kontrol serten problenm, zot in sitan argimante ki finalman zot in bezwen anmenn sa zafer ankour. Pol ti dir: “Pour annan prose antre zot i en defet pour zot.” Akoz? Rezon prensipal se akoz i pa anmenn bon repitasyon lo kongregasyon e osi lo non sa Bondye ki nou pe servi. Nou alor pran aker kestyon zapot Pol: “Akoz zot pa plito siport en pe lenzistis?”​—Verse 7.

Pol ti osi fer resorti ki Bondye in fer en bon laranzman dan kongregasyon pour rezourd bann dispit. Bann ansyen i bann zonm ki saz atraver zot konnesans ki zot annan lo Labib e Pol ti dir ki zot “kapab regle diskisyon antre frer” konsernan “bann zafer dan sa lavi” ler i arive. (Verse 3-5) Zezi ti montre ki dispit ki enplik bann keksoz mal ki vreman serye tel ki kalonmni ek frod, i kapab ganny rezourd atraver trwa metod: premyerman, par fer zefor pour rezourd sa problenm an prive antre bann ki  enplike; dezyenmman, si premye lesey pa’n marse, anmenn enn oubyen de temwen; e trwazyenmman si zot pa reisi, anmenn sa ka devan bann ansyen ki reprezant kongregasyon.​—Matye 18:15-17.

Byensir, bann ansyen pa neseserman bann avoka oubyen biznesmenn e zot pa devret azir dan sa fason. Zot pa etablir bann kondisyon pour rezourd bann dispit ki annan antre bann frer ek ser. Plito, zot rod fason pour ed tou bann ki enplike pour aplik bann prensip Labib e tonm dakor dan en fason amikal. Dan bann ka konplike, zot kapab demann konsey avek sirveyan rezyonal oubyen biro brans Temwen Zeova. Kantmenm sa, i annan bann sitiasyon kot sa konsey Pol pa aplikab. Ki serten sitiasyon?

Dan serten ka, al ankour i kapab en senp formalite oubyen en prosedir legal ki kapab neseser pour met en lafen avek en sitiasyon dan lape san rod ou prop lavantaz. Par egzanp, lakour i kapab sa sel mwayen ki annan pour ganny en sertifika divors, deside avek lekel zanfan pou reste, lekel ki pou pey alimoni, ganny konpansasyon lasirans, ganny konpansasyon ler en lakonpannyen pe faid e konfirm en testaman. I annan osi serten ka kot en frer i kapab santi li oblize servi prosedir legal pour protez son lekor. *

Si bann tel prosedir ankour pa pe ganny fer avek en lespri largiman, sa pa pou pe vyol sa konsey ki zapot Pol ti donnen. * Toudmenm, priyorite en Kretyen se pour sanktifye non Zeova e anmenn lape ek linite dan kongregasyon. Bann disip Kris i ganny rekonnet par lanmour remarkab ki zot annan e “lanmour pa rod son prop lentere.”​—1 Korentyen 13:4, 5; Zan 13:34, 35.

^ par. 2 Dan serten ka, menm si i en pe rar, en Kretyen i kapab komet en lofans serye kont en lot, tel parey labi seksyel, latak vyolan, krim ek lezot ki kapab bokou pli grav. Dan en tel sitiasyon, en Kretyen i kapab vwar li neseser pour raport sa ka avek lotorite, menm si sa ka i kapab ganny anmennen devan lakour.

^ par. 3 Pour plis lenformasyon, vwar Latour Veyer le 15 Mars 1997 paz 17-22 e le 15 Oktob 1991 paz 25-8 tou le de an Angle oubyen Franse.