Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 104

Zezi ti retourn dan lesyel

Zezi ti retourn dan lesyel

ANMEZIR ki bann zour ti pase, Zezi ti fer son bann disip vwar li plizyer fwa. En zour, apepre 500 son bann disip ti vwar li. Kan i ti aparet avek zot, eski ou konnen lo kwa ki Zezi ti koze? Rwayonm Bondye. Zeova ti anvoy Zezi lo later pour ansenny lo rwayonm. E i ti kontinyen fer sa menm apre ki i ti’n leve dan lanmor.

Eski ou mazinen kisisa rwayonm Bondye? Wi, rwayonm i gouvernman Bondye dan lesyel, e Zezi i sa Enn ki Bondye in swazir pour vin lerwa. Parey nou’n vwar, Zezi ti montre ki i pou vin en bon lerwa par nouri bann ki ti lafen, geri bann ki ti malad, e menm lev bann ki ti’n mor!

Konman later pou ete, kan Zezi pou dirize konman lerwa dan lesyel pour mil an? Later antye pou vin en zoli paradi. Pou napa lager oubyen krim, ni maladi ni menm lanmor. Nou konnen ki sa i vre akoz Bondye ti’n kree later pour vin en paradi pour dimoun viv ere lo la. Se pour sa ki okonmansman i ti kree zarden Edenn. E Zezi pou fer sir ki sa ki Bondye i anvi arive pou finalman arive.

Letan ti’n arive aprezan pour Zezi retourn dan lesyel. Pour 40 zour Zezi ti fer son bann disip vwar li. Alor, zot ti asire ki i ti vivan ankor. Me avan ki i ti kit son bann disip i ti dir avek zot: ‘Reste an Zerizalenm ziska ki zot resevwar lespri sen.’ Lespri sen i lafors aktif Bondye, ki kapab ganny konpare avek divan, ki pou ed son bann disip pour fer lavolonte Bondye. Finalman, Zezi ti dir: ‘Zot devret koz lo mwan lo later antye.’

Apre ki Zezi ti’n dir sa, en keksoz merveye ti arive. I ti konmans mont dan lesyel, parey ou kapab vwar la dan sa portre. Apre, en nyaz ti kasyet li, e son bann disip pa ti vwar li ankor. Zezi ti al dan lesyel, e i ti konmans dirize lo son bann disip ki ti isi lo later.