Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 106

Zot ti ganny large dan prizon

Zot ti ganny large dan prizon

GET sa lanz la pe ouver laport prizon. Sa bann zonm ki i pe les ale i bann zapot Zezi. Annou vwar akoz ki zot in ganny met dan prizon.

Pa bokou letan apre ki lespri sen ti desann lo bann disip Zezi, sa ti arive: Ti en zour apremidi, Pyer ek Zan ti pe al dan tanp an Zerizalenm. La, obor laport ti annan en zonm ki pa ti kapab marse depi son nesans. Toulezour bann dimoun ti met li la obor laport afen ki i ti kapab mandyan larzan bann dimoun ki ti pe al dan tanp. Kan i ti vwar Pyer ek Zan, i ti sipliy zot pour donn li keksoz. Ki sa de zapot ti pou fer?

Zot ti arete e get sa pov zonm. ‘Mon napa larzan,’ Pyer ti dir, ‘me mon pou donn ou sa ki mon annan. Lo non Zezi, leve e marse!’ Pyer ti atrap lanmen sa zonm, e deswit sa zonm ti leve e i ti konmans marse. Kan dimoun ti vwar sa, zot ti etonnen e zot ti vreman kontan sa mirak merveye.

‘Se par lafors Bondye, ki ti lev Zezi dan lanmor, ki nou’n fer sa mirak,’ Pyer ti dir. Pandan ki li avek Zan ti pe koze, serten sef relizye ti vini. Zot ti ankoler akoz Pyer ek Zan ti pe dir avek bann dimoun ki Zezi ti’n leve dan lanmor. Alor bann sef relizye ti atrap zot e met zot dan prizon.

Lannmen, bann sef relizye ti fer en gran renyon. Pyer ek Zan, ansanm avek sa zonm ki zot ti’n geri, ti ganny anmennen. ‘Par ki lafors ki zot in fer sa mirak?’ bann sef relizye ti demande.

Pyer ti dir zot ki par lafors Bondye, ki ti lev Zezi dan lanmor. Bann pret pa ti konnen ki pou fer, akoz zot pa ti kapab dir ki sa mirak pa ti’n arive. Alor zot ti averti bann zapot pour pa koz lo Zezi ankor, e apre zot ti les zot ale.

Anmezir ki bann zour ti pase bann zapot ti kontinyen koz lo Zezi e geri bann ki ti malad. Nouvel lo sa bann mirak ti fann partou. Menm bann dimoun ki ti sorti dan lavil otour Zerizalenm ti anmenn bann dimoun ki ti malad pour bann zapot geri. Sa ti fer bann sef relizye zalou, alor zot ti atrap bann zapot e met zot dan prizon. Me zot pa ti reste dan prizon pour lontan.

Pandan lannwit, lanz Bondye ti ouver laport prizon, parey ou kapab vwar la. Lanz ti dir: ‘Al dan tanp, e kontinyen koz avek bann dimoun.’ Lannmen bomaten, kan bann sef relizye ti anvoy bann zonm sers bann zapot dan prizon, bann zapot ti’n fini ale. Plitar, sa bann zonm ti vwar zot dan tanp pe ansennyen. Sa bann zonm ti anmenn zot kot Lasal Sannedren devan Konsey Zwif.

‘Nou’n donn zot lord pour pa koz lo Zezi ankor,’ bann sef relizye ti dir. ‘Me zot in ranpli Zerizalenm avek zot lansennyman.’ Bann zapot ti reponn: ‘Nou bezwen obeir Bondye konman dirizan plito ki zonm.’ Alor zot ti kontinyen koz lo sa “bon nouvel.” Eski sa pa i en bon legzanp pour nou swiv?