Skip to content

Al lo konteni

 ZISTWAR 113

Pol an Ronm

Pol an Ronm

OU VWAR sa lasenn otour lanmen Pol. Get sa solda Romen pe vey li. La, Pol i en prizonnyen an Ronm. I pe espere ziska ki Sezar i deside ki pour fer avek li. Kantmenm i en prizonnyen, bann dimoun ti ganny permisyon pour vizit li.

Trwa zour apre ki Pol ti’n ariv an Ronm i ti ekrir bann sef Zwif pour vin vizit li. En kantite Zwif an Ronm ti vini. Pol ti koz avek zot lo Zezi ek rwayonm Bondye. Serten ti krwar e vin Kretyen, me lezot pa ti krwar.

Pol ti osi koz avek diferan solda ki ti vin vey li. Pour sa de zan ki i ti’n ganny garde konman en prizonnyen, Pol ti koz avek tou dimoun ki i ti kapab. Rezilta, se ki menm fanmiy Sezar ti antann sa bon nouvel lo rwayonm, e serten parmi zot ti vin Kretyen.

Me lekel sa viziter ki la pe ekrir lo latab? Eski ou kapab devinen? Wi, se Timote. Timote osi ti dan prizon akoz i ti koz lo Rwayonm, me aprezan i lib. I’n vin la pour ed Pol. Eski ou konnen ki Timote pe ekrir? Annou vwar.

Eski ou mazin sa de lavil Filip ek Efez dan Zistwar 110? Pol ti ede pour konmans kongregasyon Kretyen dan sa de lavil. Aprezan, letan ki i ti dan prizon, Pol ti ekrir sa bann Kretyen. Sa bann let i dan Labib, e zot apel Efezyen ek Filipyen. Pol ti pe dir Timote ki pour dir avek zot bann zanmi Kretyen an Filip.

Bann Filipyen ti’n azir byen avek Pol. Zot ti’n anvoy en kado pour li la dan prizon, e alor Pol ti pe remersye zot pour sa kado. Epafrodit ti’n vin anmenn sa kado. Me Epafrodit ti tonm malad e i ti pros pour mor. Apre i ti byen ankor e i ti pare pour al kot li. I ti pou anmenn sa let ki sorti kot Pol ek Timote avek li kan i retourn Filip.

Letan ki i ti dan prizon, Pol ti ekrir de lezot let ki nou annan dan Labib. Enn ti pour bann Kretyen ki ti pe reste dan lavil Kolos. Eski ou konnen konman i apele? Kolosyen. Lot ti en let personnel pour en zanmi pros ki ti apel Filemon ki ti osi reste Kolos. Sa let ti konsern serviter Filemon, Onezim.

Onezim ti sov Filemon e al an Ronm. Onezim ti tande ki Pol ti dan prizon an Ronm. I ti vizit Pol, e Pol ti koz avek li. Deswit Onezim osi ti vin en Kretyen. Aprezan, Onezim ti regrete ki i ti’n sove. Eski ou konnen ki Pol ti ekrir dan sa let pour Filemon?

Pol ti demann Filemon pour pardonn Onezim. ‘Mon pe fer li retourn kot ou,’ Pol ti ekrir. ‘Me aprezan i pa zis ou serviter. Me i en bon frer Kretyen.’ Kan Onezim ti retourn an Kolos i ti anmenn avek li sa de let, enn pour bann Kolosyen e lot pour Filemon. Filemon ti vreman kontan pour aprann ki son serviter in vin en Kretyen.

Kan Pol ti ekrir bann Filipyen ek Filemon, i ti annan bann bon nouvel. ‘Mon pe anvoy Timote kot zot,’ Pol ti dir avek bann Filipyen. ‘Me mwan osi mon pou vizit zot tre byento.’ E avek Filemon i ti dir: ‘Prepar en plas pour mwan reste.’

Kan Pol ti ganny large i ti vizit son bann frer ek ser Kretyen dan plizyer landrwa. Me plitar, Pol ti ganny met ankor dan prizon an Ronm. Safwasi i ti konnen ki i ti pou ganny touye. Alor i ti ekrir Timote e demann li pour vin vitman. ‘Mon’n reste fidel avek Bondye,’ Pol ti ekrir, ‘e Bondye pou rekonpans mwan.’ Detrwa lannen plitar apre ki Pol ti ganny touye, Zerizalenm ti ganny detrir ankor, safwasi par bann Romen.

Me i annan plis keksoz ankor dan Labib. Zeova Bondye ti fer zapot Zan ekrir son bann dernyen liv, enkli liv Revelasyon. Sa liv Labib i koz lo lavenir. Annou vwar ki pou arive dan lavenir.