Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 85

Zezi Ti Ne Dan En Park Bef

Zezi Ti Ne Dan En Park Bef

ESKI ou konnen lekel sa pti baba? Wi, se Zezi. I’n fek ne dan en park bef. Mari pe met Zezi dan en manzwar. En manzwar i en landrwa kot i met manze pour bann bourik ek lezot zannimo vin manze. Me akoz Mari ek Zozef ti la avek bann zannimo? Sa pa en landrwa pour en pti baba ne, pa i vre?

Wi, sa i vre me selman zot ti la dan sa landrwa akoz Sezar Ogis ki ti diriz Ronm ti fer sorti en lalwa ki tou dimoun ti devret retourn dan zot lavil kot zot ti’n ne pour ekrir zot non dan en liv. Zozef ti ne an Betleenm, se pour sa ki i ti bezwen al laba. Me kan li ek Mari ti ariv Betleenm ti napa okenn lasanm pour zot reste. Alor zot ti bezwen vin la avek bann zannimo. E sa menm zour Mari ti ganny Zezi! Me, parey ou kapab vwar, Zezi ti byen.

Eski ou vwar bann berze pe vin vizit Zezi? Sa zour swar zot ti dan laplenn e zot ti pe okip zot mouton, e en lalimyer ti ekler zot. Ti en lanz! Bann berze ti vreman per. Me lanz ti dir avek zot: ‘Pa bezwen per! Mon annan bon nouvel pour zot. Ozordi, an Betleenm, en Senyer, Kris, in ne. I pou sov bann dimoun! Zot pou trouv li anvlope dan en dra e pe alonze dan en manzwar.’ Deswit en kantite lanz ti vini e zot ti konmans loue Bondye. Alor bann berze ti depese pour al vwar Zezi, e zot ti vwar li.

Eski ou konnen akoz Zezi ti spesyal? Eski ou konnen ki i ti ete vreman? Mazinen, ki dan premye zistwar dan sa liv nou ti lir lo premye Garson Bondye. I ti travay avek Zeova pour kree lesyel ek later ek lezot keksoz. Se sa ki Zezi ti ete!

Wi, Zeova ti pran lavi son Garson dan lesyel e met li dan vant Mari. En pti baba ti konmans grandi dan vant Mari zis parey lezot pti baba i grandi dan vant zot manman. Me sa pti baba ti Garson Bondye. Finalman, Zezi ti ne la dan en park bef an Betleenm. Eski ou vwar aprezan akoz bann lanz ti vreman kontan pour dir avek bann dimoun ki Zezi ti’n ne?