Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 97

Zezi ti vin konman lerwa

Zezi ti vin konman lerwa

APRE ki i ti’n geri sa de zonm ki pa ti vwar kler, Zezi ti al kot en pti vilaz ki ti pros avek Zerizalenm. I ti dir avek de son disip: ‘Al dan sa vilaz e zot pou trouv en pti bourik. Delarg li e anmenn li kot mwan.’

Kan zot ti anmenn sa pti bourik kot li, Zezi ti asiz lo li. Apre i ti al Zerizalenm. Kan i ti ariv pre avek sa lavil, en gran lafoul dimoun ti vin zwenn li. Laplipar zot ti tir zot lenz e tal lo semen. Lezot ti koup bann brans palm e tal lo semen, e zot ti kriye: ‘Beni sa lerwa ki’n vin lo non Zeova!’

Lontan an Zerizalenm bann nouvo lerwa ti mont lo en pti bourik pour antre Zerizalenm pour ki bann dimoun ti kapab vwar zot. Se sa ki Zezi ti pe fer. Sa bann dimoun ti pe montre ki zot oule Zezi konman zot lerwa. Me pa tou dimoun ki ti oule li konman lerwa. Nou kapab vwar sa par sa ki ti arive kan Zezi ti al kot tanp.

Kot tanp Zezi ti geri bann dimoun ki pa ti vwar kler ek bann ki pa ti marse. Kan bann zanfan ti vwar sa, zot ti loue Zezi. Me sa ti fer bann pret ankoler, e zot ti dir avek Zezi: ‘Eski ou tande ki sa bann zanfan pe dir?’

‘Wi, mon tande,’ Zezi ti reponn. ‘Eski zot pa’n zanmen lir dan Labib kot i dir: “Dan labous bann zanfan Bondye pou fer sorti louanz?” ’ Alor bann zanfan ti kontinyen loue lerwa ki Bondye ti’n anvoye.

Eski pa nou anvi vin parey sa bann zanfan? Serten dimoun i kapab esey anpes nou koz lo rwayonm Bondye. Me nou pou kontinyen koz avek lezot lo sa bann keksoz merveye ki Zezi pou fer pour bann dimoun.

Pa ti ankor ler pour Zezi konmans dirize konman lerwa kan i ti lo later. Kan sa letan pou arive? Bann disip Zezi ti anvi konnen. Nou pou aprann sa dan sa lot zistwar.