Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 86

Bann Zonm Ti Ganny Gide Par En Zetwal

Bann Zonm Ti Ganny Gide Par En Zetwal

ESKI ou kapab vwar sa zetwal briyan ki sa zonm pe montre ledwa lo la? Kan zot ti kit Zerizalenm, sa zetwal ti aparet. Sa bann zonm ti sorti dan les, e zot ti etidye bann zetwal. Zot ti krwar ki sa nouvo zetwal ti pe gid zot ver en dimoun enportan.

Kan sa bann zonm ti ariv Zerizalenm zot ti demande: ‘Oli sa pti baba ki pe vin sef bann Zwif?’ “Zwif” i en lot non pour bann Izraelit. ‘Premye fwa ki nou ti vwar son zetwal se letan nou ti dan les,’ sa bann zonm ti dir, ‘e nou’n vin ador li.’

Kan Erod ki ti lerwa Zerizalenm ti antann sa, i ti trakase. I pa ti oule ki en lot lerwa i pran son plas. Alor Erod ti apel bann sef pret e i ti demande: ‘Kote sa nouvo lerwa pou ne?’ Zot ti reponn: ‘Labib ti dir an Betleenm.’

Alor Erod ti apel bann zonm ki ti sorti dan les, e i ti dir: ‘Al rod sa pti baba. Kan zot trouv li, fer mwan konnen. Mon oule al ador li mwan osi.’ Me Erod ti oule trouv sa pti baba pour touy li!

Apre sa zetwal ti al par devan sa bann zonm ziska Betleenm, e i ti aret parlao sa landrwa kot sa pti baba ti ete. Kan sa bann zonm ti antre dan lakaz, zot ti vwar Mari ek Zezi. Zot ti donn Zezi bann kado. Me plitar, dan en rev Zeova ti averti sa bann zonm pour pa retourn kot Erod. Alor zot ti retourn dan zot pei par en lot semen.

Kan Erod ti konnen ki sa bann zonm ki ti sorti dan les ti’n al se zot, i ti vreman ankoler. Alor i ti donn lord pour touy tou bann pti garson an Betleenm ki ti annan 2 an oubyen ki ti par anba 2 an. Me avan ki sa ti ganny fer, dan en rev Zeova ti demann Zozef pour pran son fanmiy e al Lezip. Plitar, kan Zozef ti tande ki Erod ti’n mor, i ti pran Mari ek Zezi e zot ti retourn Nazaret. Se la ki Zezi ti grandi.

Lekel ki ou krwar ti fer sa nouvo zetwal briye? Mazinen, ki sa bann zonm ti al Zerizalenm letan zot ti’n fek vwar sa zetwal. Satan Dyab ti oule touy Garson Bondye, e i ti konnen ki lerwa Erod osi ti oule touy Zezi. Alor Satan ti sa enn ki ti fer sa zetwal briye.

Matye 2:1-23; Mika 5:2.