Lanz Gabriyel ti ganny anvoye kot en zenn fiy ki ti apel Mari. I ti dir li ki i pou ganny en pti baba ki pou dirize konman lerwa pour touzour. Sa pti baba, Zezi, ti ne dan en park bef, kot bann berze ti vizit li. Plitar, en zetwal ti gid bann zonm dan Les pour al kot sa pti baba. Nou pou vwar lekel ki ti ed zot pour vwar sa zetwal, e konman Zezi ti ganny sove dan sa lesey pour touy li.

Apre, nou pou vwar Zezi, letan i ti annan 12 an, pe koz avek bann ansennyan dan tanp. Dizwit an plitar Zezi ti ganny batize, e apre sa i ti fer sa travay ki Bondye ti’n anvoy li pour fer lo later, sa travay pres lo rwayonm e ansennyen. Pour ed li dan son travay, Zezi ti swazir 12 zonm e i ti fer zot vin son bann zapot.

Zezi ti osi fer en kantite mirak. I ti nouri plizyer milye dimoun avek selman en pti gin pwason ek en pti gin dipen. I ti geri bann ki ti malad e i ti menm lev bann ki ti’n mor. Finalman, nou pou aprann en kantite keksoz ki ti arive avek Zezi pandan bann dernyen zour son lavi, e konman i ti ganny touye. Zezi ti prese pour apepre 3 an edmi, alor parti 6 i kouver listwar pour apepre plis ki 34 lannen.