APEPRE de an ti’n pase depi ki Babilonn ti ganny atake par bann Med ek bann Pers. Gete ki pe arive aprezan! Wi, bann Izraelit pe kit Babilonn. Konman ki zot in ganny libere? Lekel ki’n les zot ale?

Se Siris, lerwa Pers ki’n fer sa. Byen lontan avan ki Siris ti ne, Zeova ti fer son profet Izai ekrir lo li: ‘Ou pou fer parey ki mon oule ou fer. Bann baro pou reste ouver pour ou atak sa lavil.’ E se li menm Siris ki ti ansarz kan Babilonn ti ganny atake. Bann Med ek bann Pers ti vin dan sa lavil aswar e zot ti antre par bann baro ki ti’n ganny kit ouver.

Me profet Zeova, Izai, ti osi dir ki Siris pou donn lord ki Zerizalenm ek son tanp i ganny konstri ankor. Eski Siris ti donn sa lord? Wi, i ti fer. La sa ki Siris ti dir avek bann Izraelit: ‘Aprezan al Zerizalenm e konstri tanp Zeova, zot Bondye.’ E se sa ki bann Izraelit ti al fer.

Me pa tou Izraelit ki ti an Babilonn ki ti kapab fer sa gran vwayaz pour retourn Zerizalenm. I ti en gran, gran vwayaz ki ti apepre 800 kilomet e en kantite dimoun ti’n tro vye oubyen zot ti malad pour fer sa gran vwayaz. E ti annan lezot rezon akoz serten bann dimoun pa ti ale. Siris ti dir avek bann ki pa ti kapab ale: ‘Donn larzan ek lor e lezot kado bann dimoun ki pe retournen pour konstri Zerizalenm ek son tanp.’

Bann Izraelit ki ti pe retourn Zerizalenm ti ganny en ta kado. Siris ti donn zot bann bol ek bann lakoup ki lerwa Neboukadnetsar ti’n pran dan tanp Zeova kan i ti detri Zerizalenm. Bann dimoun ti annan en kantite keksoz pour anmenn avek zot.

Apre ki zot ti’n vwayaze pour 4 mwan, bann Izraelit ti ariv Zerizalenm zis atan. I ti zis 70 an depi ki sa lavil ti’n ganny detri, e ti napa personn ki ti pe reste dan sa lavil. Menm si aprezan bann Izraelit ti’n retourn dan zot pei, zot ti pou bezwen fer fas avek bann moman difisil, parey nou pou aprann dan lot zistwar.

Izai 44:28; 45:1-4; Ezra 1:1-11.