Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 73

Dernyen bon lerwa Izrael

Dernyen bon lerwa Izrael

YOSIYA ti annan selman 8 an kan i ti vin lerwa sa 2 tribi dan sid Izrael. I ti ankor byen zenn, alor i ti bezwen led bann dimoun ki ti pli vye ki li, pour li kapab diriz sa nasyon.

Setyenm lannen ki i ti pe dirize, Yosiya ti konmans resers Zeova. I ti swiv legzanp bann bon lerwa konman David, Yeosafat ek Izkiya. Kan i ti ankor en zenn garson, Yosiya ti fer en keksoz brav.

Pour en bon pe letan, laplipar bann Izraelit ti vreman move. Zot ti ador bann fo bondye. Zot ti salye bann zidol. Alor Yosiya ek son bann larme ti konmans retir bann fo ladorasyon dan sa pei. Sa ti en gro travay akoz ti annan en kantite dimoun ki ti ador bann fo bondye. Ou kapab vwar Yosiya la ek son bann zonm pe kas bann zidol.

Apre sa, Yosiya ti met trwa zonm ansarz reparasyon tanp Zeova. Zot ti anmas larzan avek bann dimoun e zot ti donn sa bann zonm pour pey sa travay ki ti pou bezwen ganny fer. Letan zot ti pe konstri tanp, gran pret Ilkya ti trouv en keksoz ki ti vreman enportan. Sa ti liv lalwa ki Zeova ti’n fer Moiz ekrir en kantite, kantite letan pase. Sa liv ti’n perdi pour plizyer lannen.

Zot ti anmenn sa liv kot Yosiya, e i ti demann zot pour lir avek li. Anmezir ki Yosiya ti ekoute i ti rekonnet ki bann dimoun pa ti pe gard lalwa Zeova. I ti vreman tris konsernan sa, alor i ti desir son lenz, parey ou kapab vwar la. I ti dir: ‘Zeova i ankoler avek nou, akoz nou zanset pa’n gard son bann lalwa ki’n ganny ekrir dan sa liv.’

Yosiya ti demann gran pret Ilkya pour gete ki Zeova ti pou fer avek zot. Ilkya ti al kot sa madanm ki ti apel Oulda, ki ti en profet, e i ti demann li ki pou arive avek zot. Sa madanm ti donn li sa mesaz ki ti sorti kot Zeova pour anmenn kot Yosiya: ‘Zerizalenm ek tou dimoun pou ganny pini akoz zot in ador bann fo bondye e sa pei in ranpli avek mesanste. Me akoz ou, Yosiya, ou’n fer sa ki byen, sa pinisyon pa pou vin letan ou ankor vivan me apre ki ou’n mor.’

2 Kronik 34:1-28.