Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 62

Problenm dan lakour David

Problenm dan lakour David

APRE ki David ti konmans dirize an Zerizalenm, Zeova ti fer son larme ranport en kantite laviktwar lo son bann lennmi. Zeova ti promet pour donn bann Izraelit pei Kanaan. Aprezan, avek led Zeova, tou sa pei ki Zeova ti’n promet zot ti finalman vin pour zot.

David ti en bon sef. I ti kontan Zeova. Premye keksoz ki i ti fer apre ki i ti’n kaptir Zerizalenm se ki i ti anmenn lars lalyans an Zerizalenm. I ti anvi konstri en tanp dan ki i ti pou met lars lalyans ladan.

Kan David ti’n vin pli vye i ti fer en fot grav. David ti konnen ki i ti mal pour pran en keksoz ki ti pour en lot dimoun. Me en zour swar, kan i ti lo twa son pale, i ti vwar en zoli madanm. I ti apel Batseba, e son msye ti enn bann solda David, ki ti apel Ouriya.

David ti telman anvi pran Batseba konman son madanm ki i ti fer anmenn li dan son pale. Msye Batseba ti’n al lager. David ti dormi avek Batseba e plitar i ti dekouver ki i ti pou ganny en pti baba. David ti vreman enkyet, i ti ekrir Yoab sef son larme en let, dan ki i ti dir li met Ouriya devan dan lager afen ki i ganny touye. Kan Ouriya ti’n mor, David ti marye avek Batseba.

Zeova ti vreman ankoler avek David. Alor i ti anvoy son serviter Natann pour dir li konsernan son pese. Ou kapab vwar Natann la pe koz avek David. David ti vreman regrete pour sa ki i ti’n fer, alor Zeova pa ti met li amor. Me Zeova ti dir: ‘Akoz ou’n fer sa bann move keksoz, ou pou ganny en kantite problenm dan ou lakour.’ Ki problenm David ti gannyen?

Premyerman, garson Batseba ti mor. Apre, premye garson David Amnonn ti fer fason ki i ti tousel avek son ser Tamar e la i ti fors li pour dormi avek li. Garson David, Absalonm, ti vreman ankoler akoz sa, ki i ti touy Amnonn. Plitar, Absalonm ti ganny faver bokou dimoun, e i ti fer li menm vin lerwa. Finalman, David ti ranport laviktwar lo Absalonm, ki ti ganny touye. David ti vreman rankontre en kantite problenm.

Antretan, Batseba ti donn nesans en pti garson ki ti apel Salomon. Kan David ti’n vin vye e malad, son garson Adoniya ti esey vin lerwa. Alor David ti demann en pret ki ti apel Tsadok pour vid delwil lo latet Salomon pour montre ki se Salomon ki ti pou vin lerwa. Apre sa David ti mor, alaz 70 an. I ti dirize pour 40 an. Aprezan Salomon ti vin lerwa Izrael.

2 Samyel 11:1-27; 12:1-18; 1 Lerwa 1:1-48.