Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 49

Soley pa ti bouze

Soley pa ti bouze

GET Zozye. I pe dir: ‘Soley, pa bouze!’ E soley pa ti bouze. I ti reste la dan milye lesyel en zournen antye. Zeova ki’n fer sa arive! Me annou vwar akoz ki Zozye ti oule ki soley i kontinyen tape.

Kan sa 5 move lerwa dan pei Kanaan ti konmans lager kont bann Gibeonnit, bann Gibeonnit ti anvoy en zonm demann Zozye led. ‘Vin kot nou vitman!’ i ti dir. ‘Sov nou! Tou bann lerwa dan bann rezyon montanny in vin lager kont ou bann serviter.’

Toudswit Zozye ek tou son bann zonm lager ti ale. Zot ti mars lannwit antye. Kan zot ti ariv Gibeonn, bann solda sa 5 lerwa ti per e zot ti konmans taye. Apre Zeova ti fer bann gran lagrel tonbe sorti dan lesyel, e ti annan plis solda ki ti mor par bann kou lagrel ki bann ki ti’n ganny touye par bann zonm lager Zozye.

Zozye ti vwar ki tre byento soley pou desann. I ti pou fernwar, e en kantite solda sa 5 move lerwa ti pou sove. Se pour sa rezon ki Zozye ti priy Zeova e apre i ti dir: ‘Soley, pa bouze!’ E kan soley ti kontinyen tape, bann Izraelit ti kapab fini ganny sa lager.

Ti annan ankor en kantite move lerwa an Kanaan ki ti ay pep Bondye. Zozye ek son bann larme ti pran 6 an pour lager kont 31 lerwa dan sa pei. Apre ki sa ti’n fini arive, Zozye ti partaz sa pei avek bann tribi ki pa ti ankor ganny en teritwar.

En kantite lannen ti pase, e finalman Zozye ti mor alaz 110 an. Tan ki li ek son bann zanmi ti ankor vivan, bann dimoun ti obei Zeova. Me kan sa bann bon zonm ti mor, bann dimoun ti konmans fer bann move keksoz e zot ti rankontre problenm. Se dan sa moman ki zot ti vreman bezwen led Bondye.

Zozye 10:6-15; 12:7-24; 14:1-5; Ziz 2:8-13.