Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 44

Raab ti kasyet de espyon

Raab ti kasyet de espyon

SA BANN zonm i dan problenm. Zot bezwen sove, sankwa zot pou ganny touye. Zot bann espyon Izraelit, e sa madanm ki pe ed zot i apel Raab. Raab i reste la dan en lakaz lo miray lavil Zeriko. Annou vwar akoz sa bann zonm i dan problenm.

Bann Izraelit ti pare pour travers Larivyer Zourden pour al Kanaan. Me avan ki zot fer sa, Zozye ti anvoy de espyon. I ti dir zot: ‘Al get sa pei ek lavil Zeriko.’

Kan sa de espyon ti ariv Zeriko, zot ti al dan lakaz Raab. Me en dimoun ti al dir lerwa Zeriko: ‘De Izraelit in vin isi aswar pour espyonn sa pei.’ Kan lerwa ti tann sa, i ti anvoy bann zonm kot Raab, e zot ti konmann li: ‘Sa de zonm ki dan ou lakaz, fer zot sorti!’ Me Raab ti’n kasyet sa de espyon lo son twa. Alor i ti dir: ‘I vre ki ti annan de zonm ki’n vin dan mon lakaz, me mon pa konnen kote zot sorti. Zot in ale zis ler fernwar ti pe konmans fer, avan ki baro lavil i fermen. Si zot degaze, zot a kapab tyonbo zot!’ Alor sa bann zonm ti tay deryer sa de espyon.

Apre ki zot ti ale, Raab ti degaze i ti al anler lo twa. ‘Mon konnen ki Zeova pou donn zot sa pei,’ i ti dir avek sa de espyon. ‘Nou’n antann konman ki i’n fer sek Lanmer Rouz kan zot ti pe kit Lezip, e konman zot in touy lerwa Sionn ek Og. Mon’n azir byen anver zot, alor promet mwan, silvouple, ki zot pou azir byen anver mwan. Sov mon papa ek mon manman, ek mon bann frer ek ser.’

Sa de espyon ti promet ki zot pou fer sa, me Raab ti bezwen fer en keksoz. ‘Pran sa lakord rouz e anmar li avek ou lafnet,’ sa de espyon ti dir, ‘e rasanble tou ou fanmiy dan ou lakaz ansanm avek ou. E kan nou tou nou retournen pour pran Zeriko, nou pou vwar sa lakord avek ou lafnet e nou pa pou touy personn dan ou lakaz.’ Kan sa de espyon ti retourn kot Zozye, zot ti rakont li tou sa ki’n arive.

Zozye 2:1-24; Ebre 11:31.