Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 46

Miray Zeriko

Miray Zeriko

KWA ki pe fer miray Zeriko tonbe? I paret konmsi en gro bonm in tap li. Me dan sa letan zot ti napa bonm; ni menm fizi zot ti napa. I en lot mirak par Zeova! Annou vwar konman ki sa in arive.

Ekoute ki Zeova ti dir avek Zozye: ‘Ou avek ou bann zonm lager zot devret mars otour sa lavil. Mars otour sa lavil enn fwa par zour pour sis zour. Anmenn lars lalyans avek zot. Set pret i devret mars devan lars lalyans e soufle zot tronpet.’

‘Setyenm zour ou devret mars otour lavil set fwa. Apre soufle tronpet pour en bon pe letan, e fer tou dimoun kriy en gran kriye lager. E miray pou tonm aplat ater!’

Zozye ek bann dimoun ti fer sa ki Zeova in demande. Pandan ki zot ti pe marse, tou dimoun ti gard silans. Personn pa ti dir en mo. Sel de keksoz ki ou ti pou kapab tande se son tronpet ek tapaz lipye. Bann lennmi pep Bondye an Zeriko ti bezwen per. Eski ou kapab vwar sa lakord rouz anmare avek sa lafnet? Lafnet lekel sa? Wi, Raab ti fer sa ki sa de espyon ti’n demann li pour fer. Tou son fanmiy ti ansanm avek li dan son lakaz. Zot tou zot ti pe espere.

Finalman, setyenm zour, apre ki zot ti mars otour lavil set fwa, bann tronpet ti soufle, bann zonm lager ti kriye e miray ti tonbe. Apre Zozye ti dir: ‘Touy tou dimoun e bril lavil. Bril tou keksoz. Sov selman bann larzan, lor, kwiv ek feray e met zot dan trezor latant Zeova.’

Zozye ti dir avek sa de espyon: ‘Al dan lakaz Raab, fer li ek tou son fanmiy sorti.’ Raab ek son fanmiy ti ganny sove, zis parey bann espyon ti promet li.

Zozye 6:1-25.