Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 41

Serpan an kwiv

Serpan an kwiv

ESKI sa i parey en vre serpan ki’n anpay en poto? I pa vre. Sa serpan in ganny fer avek kwiv. Zeova in demann Moiz pour met li lo sa poto afen ki bann dimoun i get li e kontinyen viv. Me lezot serpan ki ater zot vre. Zot in mord bann dimoun e fer zot malad. Eski ou konnen akoz?

Akoz bann Izraelit ti koz kont Bondye ek Moiz. Zot ti konplent an dizan: ‘Akoz ou’n retir nou Lezip pour mor dan dezer? Napa manze ni delo isi. E nou nepli kapab manz sa lamann.’

Me lamann ti en bon manze. Par en mirak Zeova ti donn zot. E i ti donn zot delo osi par fer en mirak. Me bann dimoun pa ti rekonesan pour fason ki Bondye ti’n pran swen avek zot. Alor Zeova ti anvoy sa bann serpan anpwazonnen pour pini bann Izraelit. Bann serpan ti mord zot, e en kantite zot ti mor.

Finalman bann dimoun ti vin kot Moiz e dir: ‘Nou’n fer pese, akoz nou’n koz kont Zeova ek ou. Aprezan priy Zeova pour ki i tir sa bann serpan.’

Alor Moiz ti priy pour sa bann dimoun. E Zeova ti demann Moiz pour fer sa serpan an kwiv. I ti demann li pour met sa serpan lo en poto, afen ki nenport dimoun ki ganny morde i devret get sa serpan. Moiz ti fer egzakteman sa ki Bondye ti dir. E bann dimoun ki ti ganny morde ti get sa serpan kwiv e zot ti vin byen ankor.

I annan en leson pour aprann atraver sa. Nou tou, dan en fason nou parey bann Izraelit ki ti ganny morde par sa bann serpan. Nou tou nou dan en kondisyon pour mor. Get toultour ou, ou pou vwar bann dimoun ki’n vin vye, ki malad e bann ki’n mor. Sa i akoz, sa premye zonm ek fanm, Adan ek Ev in tourn kont Zeova, e nou tou nou zot zanfan. Me Zeova in fer en fason afen ki nou kapab viv pour touzour.

Zeova in anvoy son Garson, Zezi Kri lo later. Zezi ti ganny mete lo en poto akoz en kantite dimoun ti krwar ki i pa bon. Me Zeova ti anvoy Zezi pour sov nou. Si nou sers li, si nou swiv li, alor nou pou kapab ganny lavi eternel. Me nou pou aprann plis konsernan sa plitar.

Nonm 21:4-9; Zan 3:14, 15.