Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 48

Bann Gibeonnit ti malen

Bann Gibeonnit ti malen

EN KANTITE lavil an Kanaan ti pe aprezan met zot pare pour lager kont Izrael. Zot ti mazinen ki zot kapab ranport laviktwar. Me bann dimoun dan lavil Gibeonn pa ti krwar sa. Zot ti krwar ki Bondye pe ed bann Izraelit, e zot pa ti oule lager kont Bondye. Eski ou konnen ki bann Gibeonnit ti fer?

Zot ti deside pour fer bann Izraelit krwar ki zot bann dimoun ki ti sorti dan en pei tre lwen. Alor serten zonm ti met bann lenz desire e bann sandalet ki ti’n ize. Zot ti sarz zot bourik avek bann vye sak, e pran bann vye dipen sek. Apre zot ti al kot Zozye e zot ti dir: ‘Nou sorti dan en pei tre lwen, akoz nou’n antann konsernan zot gran Bondye, Zeova. Nou’n antann konsernan tou sa bann keksoz ki i’n fer pour zot Lezip. Alor nou bann sef in demann nou pour prepar serten manze pour fer en vwayaz e pour vin dir ou: “Nou ou bann serviter. Promet ki ou pa pou lager kont nou.” Ou kapab vwar ki nou lenz in desire atraver sa gran vwayaz e nou dipen in vye e sek.’

Zozye ek lezot bann sef ti krwar bann Gibeonnit. Alor zot ti fer en promes ki zot pa pou lager kont zot. Me trwa zour plitar zot ti aprann ki bann Gibeonnit ti reste dan zalantour.

‘Akoz zot in dir nou ki zot sorti dan en pei vreman lwen?’ Zozye ti demann zot.

Bann Gibeonnit ti reponn: ‘Nou’n fer li akoz nou’n ganny dir ki zot Bondye Zeova in promet pour donn zot Kanaan antye. Alor nou per ki zot touy nou.’ Me bann Izraelit ti gard zot promes, e zot pa ti touy bann Gibeonnit. Plito zot ti fer zot vin zot serviter.

Lerwa Zerizalenm ti ankoler akoz bann Gibeonnit in fer lape avek Izrael. Alor i ti dir avek 4 lezot lerwa: ‘Vin ed mwan pour lager kont Gibeonn.’ E se sa ki sa 5 lerwa ti fer. Eski bann Gibeonnit ti malen pour fer lape avek Izrael, ki aprezan ti fer sa bann lerwa vin lager kont zot? Nou pou vwar.

Zozye 9:1-27; 10:1-5.