GET sa bann fler ek sa bann fri mir pe pouse lo sa baton, oubyen baget. Sa i baton Aaron. Sa bann fler ek sa bann fri mir in pouse avek baton Aaron dan zis en lannwit! Annou vwar akoz.

Bann Izraelit ti’n vwayaze dan dezer pour en pe letan. Serten parmi bann dimoun pa ti krwar ki Moiz i devret sef, oubyen Aaron ti devret gran pret. Kora ti enn ki mazin koumsa, e osi Datann, Abiram ek 250 sef. Zot tou zot ti vini e dir avek Moiz: ‘Akoz ki ou’n met ou pli o ki larestan nou?’

Moiz ti dir avek Kora ek bann ki ti pe swiv li: ‘Demen bomaten pran bann resipyan dife e met lansan ladan. Apre vin kot tabernak Zeova. Nou pou vwar lekel ki Zeova pou swazir.’

Lannmen Kora ek sa 250 dimoun ki ti pe swiv li ti vin kot tabernak. En kantite lezot ti’n vini pour siport sa bann zonm. Zeova ti vreman ankoler. ‘Sorti kot latant sa bann move zonm,’ Moiz ti dir. ‘Pa tous nanryen ki pour zot.’ Bann dimoun ti ekoute, e zot ti dekile avek latant Kora, Datann ek Abiram.

Apre Moiz ti dir: ‘Par sa ou pou konnen lekel ki Zeova in swazir. Later pou ouver e anval sa bann move zonm.’

Deswit apre ki Moiz ti aret koze, later ti ouver. Latant Kora ek son bann keksoz, Datann ek Abiram ek bann ki ti avek zot ti desann, e later ti ferm lo zot. Kan bann dimoun ti antann bann ki pe desann dan later pe kriye, zot dir: ‘Taye! Later i kapab anval nou osi!’

Kora ek sa 250 dimoun ki ti pe swiv li ti ankor kot tabernak. Alor Zeova ti anvoy dife, e zot tou zot ti ganny brile konpletman. Apre Zeova ti dir avek Eleazar garson Aaron pran resipyan dife sa bann zonm ki’n mor e fer en kouvertir mens pour lotel. Sa kouvertir lotel ti pou ganny servi konman en lavertisman pour bann Izraelit ki personn apard ki Aaron ek son bann garson pa devret azir konman pret pour Zeova.

Me Zeova ti oule fer byen kler ki se Aaron ek son bann garson ki i ti’n swazir konman pret. Alor i ti dir avek Moiz: ‘Fer en sef dan sak tribi Izrael anmenn son baton. Pour tribi Levi, demann Aaron pour anmenn son baton. Apre met sa bann baton dan tabernak devan lars lalyans. Baton sa zonm ki mon’n swazir konman pret pou pous fler.’

Lannmen bomaten kan Moiz ti regarde, baton Aaron ti annan sa bann fler ek bann fri mir pe pouse avek li! Alor eski ou vwar akoz ki Zeova in fer baton Aaron pous fler?

Nonm 16:1-49; 17:1-11; 26:10.