Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 16

Izaak ti ganny en madanm

Izaak ti ganny en madanm

ESKI ou konnen lekel sa madanm ki la dan sa portre? I apel Rebeka. E sa zonm ki pe vin rankontre li i apel Izaak. Rebeka pe vin madanm Izaak. Konman ki sa ti arive?

Byen, Papa Izaak, Abraam, ti oule en bon madanm pour son garson. I pa ti oule ki Izaak i marye avek en madanm an Kanaan, akoz sa bann dimoun ti ador bann fo bondye. Alor Abraam ti apel son serviter e dir: ‘Retourn dan sa lavil kot mon bann fanmiy i reste, an Arann, e swazir en madanm pour mon garson Izaak.’

Toudswit serviter Abraam ti pran dis samo e fer sa gran vwayaz. Kan i ti ariv pre avek sa landrwa kot bann fanmiy Abraam ti reste, i ti aret kot en pwi. Ti tar dan apremidi, ler kot bann madanm dan sa lavil ti pou vin sers delo dan sa pwi. Alor serviter Abraam ti fer en lapriyer avek Zeova: ‘Sa madanm ki tir en pe delo pour mwan ek bann samo i sa enn ki ou swazir pour vin madanm Izaak.’

En pti moman apre, Rebeka ti vin sers delo. Kan sa serviter ti demann li en pe delo pour bwar, i ti donn li. Bann samo osi ti swaf e Rebeka ti al donn zot osi en pe delo pour bwar. Sa ti en travay dir akoz bann samo i bwar en kantite delo.

Kan Rebeka ti fini fer sa, serviter Abraam ti demann li konman ki son papa i apele. I ti osi demann li si i kapab pas lannwit kot zot. Rebeka ti dir: ‘Mon papa i apel Betouel, e i annan lasanm pour ou reste avek nou.’ Serviter Abraam ti konnen ki Betouel ti garson Naor, frer Abraam. I ti azenou e remersye Zeova pour gid li kot fanmiy Abraam.

Sa zour swar serviter Abraam ti rakont Betouel ek frer Rebeka Labann akoz ki i ti’n vin la. Zot tou le de zot ti dakor ki Rebeka i al avek li e marye avek Izaak. Ki Rebeka ti dir kan i ti ganny demande pour ale? I ti dir, ‘Wi,’ i oule ale. Alor son lannmen, zot ti mont lo samo e konmans sa gran vwayaz pour retourn an Kanaan.

Kan zot ti arive, ti’n konmans fernwar. Rebeka ti vwar en msye pe marse dan laplenn. Ti Izaak. I ti byen kontan pour vwar Rebeka. Son manman Sara ti’n mor trwa an pase, e i ti ankor dan sagren. Me aprezan Izaak ti kontan Rebeka bokou, e i ti vin ere ankor.

Zenez 24:1-67.