DE ZAN ti’n pase, e Zozef ti ankor dan prizon. Sa serviter pa’n mazin li. En zour swar Faraon ti rev de rev vreman spesyal, e i ti sey mazinen ki zot vedir. Eski ou vwar li pe dormi la? Lannmen bomaten Faraon ti apel son bann zonm ki ti malen e i ti rakont zot bann keksoz ki i ti’n reve. Me zot pa ti kapab dir li ki son bann rev i vedir.

Aprezan sa serviter ti finalman mazin Zozef. I ti dir avek Faraon: ‘Kan mon ti dan prizon ti annan en zonm laba ki ti kapab eksplik bann rev.’ Toudswit Faraon ti fer retir Zozef dan prizon.

Faraon ti rakont Zozef son bann rev: ‘Mon ti vwar set bef gra. Apre mon ti vwar set bef meg. E sa bann ki ti meg ti manz sa bann ki ti gra.’

Dan mon dezyenm rev mon ti vwar set zepi sereal plen e mir ki ti pe pouse lo menm tiz. Apre mon ti vwar set zepi sereal sek. Sa set zepi sereal sek ti manz sa set bon zepi sereal.’

Zozef ti dir avek Faraon: ‘Sa de rev i vedir menm keksoz. Sa set bef gra ek sa set bon zepi sereal i vedir set lannen, e sa set bef meg ek sa set zepi sereal sek i vedir ankor set lannen. Pour set an pou annan manze an abondans an Lezip. Apre pou annan set an kot pou annan en pti gin manze ki pou pouse.’

Zozef ti dir avek Faraon: ‘Swazir en zonm ki malen e met li an sarz pour anmas manze pandan sa set bon lannen. Alor bann dimoun pa pou mor lafen pandan sa set move lannen ki pou swiv kan en pti gin manze pou pouse.’

Faraon ti dakor avek sa lide. E i ti swazir Zozef pour anmas manze, e pour stok li. Apre Faraon, Zozef ti vin sa zonm pli enportan an Lezip.

Wit an plitar, pandan lafanmin, Zozef ti vwar serten zonm pe vini. Eski ou konnen lekel zot? Se son 10 gran frer! Zot papa Zakob ti’n anvoy zot Lezip parski ti konmans napa manze an Kanaan. Zozef ti rekonnet zot, me zot, zot pa ti rekonnet li. Eski ou konnen akoz? Se akoz Zozef ti’n grandi e i ti met en diferan kalite lenz.

Zozef ti mazinen ki letan i ti ankor en pti garson i ti rev konsernan son bann frer pe salye li. Eski ou rapel lir sa? Alor Zozef ti konpran ki se Bondye ki’n anvoy li Lezip, e pour en bon rezon. Ki ou krwar Zozef ti fer? Annou vwar.

Zenez 41:1-57; 42:1-8; 50:20.