Skip to content

Al lo sa dezyenm lalis

Al lo konteni

Temwen Zeova

Kreol Seselwa

Mon liv zistwar Labib

 ZISTWAR 6

En bon ek en move garson

En bon ek en move garson

REGARD Kaen ek Abel aprezan. Zot in gran. Kaen in vin en fermye. I plant bann sereal, bann fri ek bann legim.

Abel in vin en gardyen mouton. I kontan pran swen avek bann zenn pti mouton. Zot grandi e vin bann gro mouton, alor dan en pti lespas letan Abel i annan en gran troupo mouton pour veye.

En zour Kaen ek Abel ti anmenn en kado pour Bondye. Kaen ti anmenn serten bann keksoz ki i ti plante, e Abel ti anmenn bann meyer mouton ki i ti annan. Zeova ti dakor avek Abel ek son kado, me i pa ti dakor avek Kaen ek son kado. Eski ou konnen akoz?

I pa ti akoz kado Abel ti pli meyer ki pour Kaen. Se akoz Abel ti en bon dimoun. I ti kontan Zeova ek son frer. Me Kaen ti en move dimoun; i pa ti kontan son frer.

Bondye ti demann Kaen pour sanz son fason azir. Kaen pa ti ekout Bondye. I ti vreman ankoler akoz Bondye ti prefer Abel. Alor Kaen ti dir avek Abel: ‘Annou al dan laplenn.’ Kan zot ti tousel dan laplenn i ti tap son frer britalman e i ti mor. Eski sa pa i en keksoz terib pour Kaen fer?

Menm si Abel in mor, Bondye i touzour mazin li. Abel ti en bon dimoun, e Zeova pa zanmen oubliy bann dimoun parey li. En zour Zeova pou fer Abel reviv ankor. Kan i pou reviv, i pa pou bezwen mor ankor, i pou kapab viv pour touzour lo later. Eski pa i pou gou pour konn bann dimoun parey Abel?

Me Bondye pa kontan bann dimoun parey Kaen. Apre ki i ti’n touy son frer, Bondye ti pini li par anvoy li lwen avek son fanmiy. Kan i ti ale, i ti pran enn parmi son bann ser, e fer li vin son madanm.

Apre Kaen ek son madanm ti konmans annan zanfan. Lezot fiy ek garson Adan ek Ev ti marye, e zot osi zot ti annan zanfan. Apre sa, later ti konmans ranpli avek dimoun. Annou vwar en pe lo serten sa bann dimoun.