Skip to content

Al lo konteni

 ZISTWAR 3

Adan ek Ev

Adan ek Ev

KI OU vwar aprezan dan sa portre? Nou vwar dimoun dan sa zarden. Sa i premye zonm ek premye madanm. Lekel ki’n kree zot? Se Bondye. Eski ou konnen konman Bondye i apele? I apel Zeova. Sa zonm ti ganny apele Adan e sa madanm Ev.

Vwala konman Zeova ti kree Adan. I ti pran en pe lapousyer dan later e i ti form en lekor parfe, lekor en zonm. Apre i ti soufle dan nennen sa zonm, e Adan ti vin vivan.

Zeova ti donn Adan en louvraz. I ti dir li donn sak diferan zannimo en non. I tre probab ki Adan ti obzerv sa bann zannimo pour en bon pe letan avan ki i ti donn zot en non apropriye. Letan i ti pe donn bann zannimo zot non, Adan ti remark en keksoz. Eski ou konnen kwa?

I ti remarke ki tou sa bann zannimo ti annan en konpanny. Ti annan papa lelefan ek manman lelefan, papa lyon ek manman lyon. Me li, Adan, i ti tousel. Alor Zeova ti andormi Adan, e i ti pran enn son kot. Avek sa kot, Zeova ti kree en madanm pour Adan, e i ti vin son madanm.

Adan ti vreman kontan. Ev ti vreman kontan pour viv dan sa zoli zarden. Aprezan zot ti kapab annan zanfan e viv ere ansanm.

Zeova ti anvi ki Adan ek Ev i viv pour touzour. I ti anvi ki zot fer later antye vin en zoli paradi parey zarden Edenn. Adan ek Ev ti vreman kontan letan zot ti aprann sa. Eski ou ti pou’n kontan pour ede fer later vin en zoli zarden? Me zot lazwa pa ti dire. Annou vwar akoz.

Psonm 83:18; Zenez 1:26-31; 2:7-25.