Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

En let sorti kot Konsey Direkter

En let sorti kot Konsey Direkter

Ser frer ek ser,

Konman bann adorater Zeova, nou kontan son Parol, Labib. Nou asire ki sa ki Labib i dir i egzakt e ki i annan bann bon konsey pour gid nou. Labib i osi montre nou ki kantite Zeova i kontan bann imen. (Psonm 119:105; Lik 1:3; 1 Zan 4:19) Nou vreman anvi ed lezot dimoun konn sa laverite ki dan Parol Bondye. Pour sa rezon, nou byen kontan pour fer zot ganny sa liv, Leson ki ou kapab aprann dan Labib. Les nou donn zot en pti avangou.

Sa liv in ganny prepare sirtou pour bann zanfan. Me i osi kapab ganny servi pour ed bann adilt ki ti a kontan konn plis lo sa ki Labib i dir. Vi ki Labib i en liv pour tou dimoun, sirman si nou etidye sa bann leson, nou tou nou pou benefisye e sa pou ed nou pour ki nou vreman ere.

Sa liv i rankont listwar fanmir imen depi kreasyon ziska nou letan. Nou’n fer nou posib pour prezant sa bann resi dan en fason kler, senp e dapre lord ki sa bann levennman in arive.

Me sa liv pa zis rakont bann zistwar ki dan Labib. Bann portre dan sa liv e lafason ki i’n ganny ekrir pou fer sa bann zistwar ki dan Labib vin reel e ed nou pli byen konpran santiman sa bann personnaz.

Sa liv i ed nou pour konpran ki Labib i koz lo bann dimoun, serten ti obei Zeova e lezot ti dezobei li. Sa liv pou ed nou aprann en leson atraver zot legzanp. (Romen 15:4; 1 Korentyen 10:6) I annan 14 seksyon dan sa liv. O konmansman sak seksyon, i annan en pti rezimen lo serten leson ki nou kapab aprann.

 Si ou en paran, ou kapab lir en leson avek ou zanfan e koz lo portre ki relye avek sa leson. Apre, zot tou le de zot kapab lir bann verse Labib ki dan sa leson. Ed ou zanfan pour vwar ki mannyer sa ki i lir dan Labib i relye avek sa leson ki dan sa liv. Ou kapab fer parey osi pour ed en adilt konnen sa ki Labib i koz lo la.

Nou swete ki sa liv i ed tou dimoun, zenn konman aze ki annan en leker senser pour aprann bann leson ki dan Parol Bondye e pour met an pratik sa ki zot aprann dan zot lavi. Koumsa, zot osi zot pou kapab ador Bondye e form parti son fanmir ki i kontan.

Zot frer,

Konsey Direkter Temwen Zeova