Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 56

Zosya ti kontan Lalwa Bondye

Zosya ti kontan Lalwa Bondye

Zosya ti vin lerwa Zida ler i ti annan wit an. Sa letan, bann dimoun ti pe pratik mazik e ador zidol. Ler Zosya ti annan 16 an, i ti esey aprann ki mannyer pour ador Zeova dan sa bon fason. Ler i ti annan 20 an, i ti konmans detri bann zidol ek lotel partou Zida. Ler Zosya ti annan 26 an, i ti fer laranzman pour repar tanp Zeova.

Granpret Ilkya ti trouv liv Lalwa Zeova. Petet i ti sa kopi ki Moiz ti ekri. Safann, sekreter lerwa ti anmenn sa liv kot Zosya e i ti konmans lir Lalwa aotvwa. Anmezir Zosya ti pe ekoute, i ti realize ki bann dimoun ti’n dezobei Zeova pour en kantite lannen. Lerwa Zosya ti dir Ilkya: ‘Zeova i vreman ankoler avek nou. Al koz avek li. Zeova pou dir nou sa ki nou devret fer.’ Zeova ti reponn atraver en madanm profet ki apel Oulda. I ti dir: ‘Bann dimoun Zida in kit mwan. Zot pou ganny pini me pa ler Zosya i lerwa, parski i’n abes son lekor.’

Ler Lerwa Zosya ti tann sa mesaz, i ti al kot tanp e rasanble lepep Zida. Apre sa, i ti lir Lalwa Zeova aotvwa pour tou dimoun tande. Zosya ek lepep ti promet pour obei Zeova avek tou zot leker.

Nasyon Zida pa ti’n selebre lafet Lapak pour plizyer lannen. Me ler Zosya ti lir dan Lalwa ki Lapak i devret ganny selebre tou  le lannen, i ti dir sa nasyon: ‘Nou pou selebre Lapak pour Zeova.’ Zosya ti prepare pour ofer en kantite sakrifis e fer laranzman pour en lakoral sante kot tanp. Apre, sa nasyon ti selebre Lapak ek Lafet Dipen san Lelven ki ti dire pour set zour. Sa nasyon pa ti’n selebre Lapak dan sa fason depi lepok Samyel. Zosya ti vreman kontan Lalwa Bondye. Eski ou kontan pour aprann konn Zeova?

“Ou parol i en lalanp pour ekler mon lipye e en lalimyer lo mon semen.”​—Psonm 119:105