Skip to content

Al lo konteni

 LESON 49

En move larenn i ganny pini

En move larenn i ganny pini

Ler Lerwa Aab ti pe get par lafnet son pale Zezreel, i ti vwar plantasyon en zonm ki apel Nabot. Aab ti anvi sa bout later e i ti esey aste li avek Nabot. Me Nabot ti refize vann li sa later akoz i ti kont Lalwa Zeova pour vann later zeritye. Eski Aab ti respekte Nabot akoz i ti anvi fer sa ki byen? Non. Aab ti vreman ankoler. I ti sitan mekontan ki i ti pa manze e i ti zis reste dan son lasanm.

Madanm Aab, move Larenn Zezabel ti dir li: ‘Ou ki lerwa Izrael. Ou kapab pran nenport keksoz ki ou anvi. Mon pou fer ou ganny sa bout later.’ I ti ekri bann ansyen sa lavil pour demann zot pour akiz Nabot ki i’n modi Bondye e pour saboul li avek ros. Bann ansyen ti fer sa ki Zezabel ti’n demann zot. Apre Zezabel ti dir Aab: ‘Nabot in mor. Plantasyon i pour ou.’

Nabot pa ti sa sel dimoun inosan ki Zezabel ti touye. I ti’n deza touy en kantite dimoun ki ti kontan Zeova. I ti ador zidol e fer en kantite lezot move keksoz. Zeova ti vwar tou sa bann move keksoz ki Zezabel ti fer. Ki Zeova ti fer?

Apre ki Aab ti’n mor, son garson Zeoram ti vin lerwa. Zeova ti anvoy en zonm ki ti apel Zeou pour pini Zezabel ek son fanmir.

Zeou ti mont lo son saret e al Zezreel kot Zezabel ti reste. Zeoram ti vin zwenn Zeou lo son saret e demann li: ‘Eski i annan lape ant nou?’ Zeou ti dir: ‘Tan ki ou manman Zezabel pe fer bann move keksoz, i pa pou zanmen annan lape.’ Zeoram ti esey vir son saret pour sove me Zeou ti tir en dart e touy Zeoram.

 Apre, Zeou ti al kot pale Zezabel. Ler Zezabel ti tande ki Zeou ti pe vini, i ti makiye, pennyen e esper li anler kot lafnet. Ler Zeou ti arive, Zezabel ti dir li bonzour dan en fason brit. Zeou ti dir son bann serviter ki ti pe debout akote li: “Zet li anba.” Zot ti pous Zezabel par lafnet e i ti tonm anba e mor.

Apre sa, Zeou ti touy sa 70 garson Aab. I ti pirifye sa pei e tir tou sa ki annan pour fer avek ladorasyon Baal. Eski ou remarke ki Zeova i konn tou keksoz e dan sa moman apropriye i pou pini bann ki fer bann move keksoz?

“Menm ler en dimoun voras i ganny en leritaz, i pa pou ganny beni a lavenir.”​—Proverb 20:21NWT