Skip to content

Al lo konteni

 LESON 19

Sa trwa premye fleo

Sa trwa premye fleo

Bann Izraelit ti ganny forse pour travay dir konman lesklav. Zeova ti anvoy Moiz ek Aaron pour dir Faraon: ‘Les mon pep ale pour ki zot kapab ador mwan dan dezer.’ Byen arogan, Faraon ti dir: ‘Mon pa enterese avek sa ki Zeova i dir e mon pa pou les bann Izraelit ale.’ Apre sa, Faraon ti fer zot travay pli dir ankor. Zeova ti donn Faraon en leson. Ou konnen ki mannyer i ti fer sa? I ti anmenn Dis Fleo lo Lezip. Zeova ti dir Moiz: ‘Faraon pa oule ekout mwan. Bomaten i pou kot Larivyer Nil. Al kot li e i dir li ki tou sa delo dan Larivyer Nil pou vin disan akoz i pa pe les mon pep ale.’ Moiz ti obei e i ti al kot Faraon. Faraon ti pe gete ler Aaron ti tap delo dan Larivyer Nil avek son baton e sa delo ti vin disan. Larivyer ti konmans pi, pwason ti mor e i ti nepli annan delo pour bwar. Kantmenm sa, Faraon pa ti les bann Izraelit ale.

 Set zour pli tar, Zeova ti anvoy Moiz kot Faraon ankor en fwa pour dir li: ‘Si ou pa les mon pep ale, Lezip pou ranpli avek grenwiy.’ Faraon pa ti anvi les bann Izraelit ale, alor Aaron ti lev son baton anler e i ti konmans annan grenwiy partou dan pei. Grenwiy ti partou kote dan lakaz, lo lili e dan zot bol. I ti annan grenwiy partou! Faraon ti demann Moiz pour sipliy Zeova pour aret sa fleo. Faraon ti promet pour les bann Izraelit ale. Alor Zeova ti aret sa fleo e bann Ezipsyen ti anmas bann grenwiy mor e met zot an ta. Sa pei ti konmans pi. Me kantmenm sa, Faraon pa ti les bann Izraelit ale.

Alor, Zeova ti dir Moiz: ‘Aaron i devret tap son baton ater e lapousyer pou vin moustik.’ Deswit i ti annan moustik partou. Serten Ezipsyen ti dir Faraon: ‘Sa fleo i sorti kot Bondye.’ Me kantmenm sa, Faraon pa ti les bann Izraelit ale.

“Mon pou fer sa bann nasyon konn mon pouvwar ek mon pwisans. Konmsa zot pou bezwen konnen ki mon non i [Zeova].”​—Zeremi 16:21