Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 6

Wit dimoun i sirviv Deliz

Wit dimoun i sirviv Deliz

Noe, son fanmir ek bann zannimo ti antre dan lars. Zeova ti ferm laport e lapli ti konmans tonbe. Lapli ti tonbe, tonbe, delo ti monte e lars ti konmans flote. Apre en pe letan, later antye ti kouver avek delo. Tou bann move dimoun ki ti an deor lars ti mor. Me Noe ek son fanmir ti sen e sof dan lars. Ou kapab mazinen ki kantite zot ti kontan ki zot ti’n obei Zeova?

Lapli ti tonbe pandan 40 zour ek 40 lannwit, apre i ti arete. Delo ti konmans desann ptitapti. Finalman, sa lars ti rann lapel lo montanny. Me i ti ankor annan en kantite delo partou kote. Alor, Noe ek son fanmir pa ti kapab sorti dan lars deswit.

Delo ti sek dousman dousman. An tou, Noe ek son fanmir ti reste dan lars pour plis ki enn an. Apre sa, Zeova ti dir zot ki zot kapab sorti dans lars e antre dan en nouvo lemonn kot tou bann move dimoun in ganny tire. Zot ti vreman rekonesan anver Zeova akoz i ti’n sov zot e zot ti ofer li en sakrifis pour dir li mersi.

Zeova ti kontan zot sakrifis. I ti promet ki i pa pou zanmen detri tou sa ki lo later ankor dan en deliz. Konman en laprev, i ti fer en larkansyel aparet pour premye fwa. Eski ou’n deza vwar en larkansyel?

Apre Zeova ti demann Noe ek son fanmir pour fer zanfan e ranpli later.

“Noe ti antre dan lars e [dimoun] pa ti pran kont nanryen ziska ki Deliz ti vini e balye zot tou.”​—Matye 24:38, 39