Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 96

Zezi i swazir Sol

Zezi i swazir Sol

Sol ti ne Tars e i ti en sitwayen Romen. I ti en Farizyen ki ti konn byen Lalwa Zwif e i ti ay bann Kretyen. I ti tir bann Kretyen, zonm konman fanm, dan zot lakaz e met zot dan prizon. I ti menm la pe gete ler en lafoul ki ti ankoler ti saboul Etyenn avek ros.

Me Sol pa ti anvi zis met bann Kretyen Zerizalenm dan prizon. I ti demann granpret pour anvoy li Damas pour ki i kapab aret bann Kretyen laba osi. Ler Sol ti ariv pros avek sa lavil, en sel kou, en lalimyer ti klere toultour li e i ti tonm ater. I ti tann en lavwa ki ti dir: ‘Sol, akoz ou pe persekit mwan?’ Sol ti demande: ‘Lekel ou?’ I ti reponn: ‘Mwan menm Zezi. Al Damas e laba ou a konnen ki ou pou fer.’ Sol ti vin aveg en sel kou e bann zonm ki ti avek li ti bezwen atrap son lanmen e anmenn li dan sa lavil.

Laba Damas, i ti annan en Kretyen fidel ki apel Ananyas. Dan en vizyon, Zezi ti dir li: ‘Al kot lakaz Zida, lo semen Drwat e rod en zonm ki apel Sol.’ Ananyas ti dir: ‘Senyer, mon konn byen sa zonm! I pe met tou ou bann disip dan prizon!’ Me Zezi ti dir: ‘Al kot li. Mon’n swazir Sol pour anons sa bon nouvel avek bokou nasyon.’

Alor Ananyas ti al vwar Sol e i ti dir li: ‘Sol, mon frer, Zezi in anvoy mwan pour ki ou revwar kler.’ Deswit, Sol ti revwar kler. I ti aprann konn Zezi e i ti vin son disip. Sol ti batize e vin en Kretyen. I ti konmans prese dan bann sinagog, ansanm avek lezot Kretyen. Zis mazinen ki mannyer bann Zwif  ti bezwen soke ler zot ti vwar Sol pe ansenny dimoun lo Zezi. Zot ti dir: ‘Pa li menm li sa zonm ki ti abitye atak bann disip Zezi?’

Pour trwa-z-an, Sol ti prese avek bann dimoun Damas. Bann Zwif ti ay Sol e zot ti fer plan pour touy li. Me bann frer ti tann koz lo sa konplo e zot ti ed li sove. Zot ti met li dan en pannyen e fer li desann par en trou dan miray pandan lannwit.

Ler Sol ti al Zerizalenm, i ti esey zwenn bann frer laba me zot ti per li. Alor en disip ki apel Barnabas ti anmenn Sol kot bann zapot e konvenk zot ki Sol ti’n vreman sanze. Avek devouman, Sol ti konmans anons sa bon nouvel ansanm avek kongregasyon Zerizalenm. Pli tar, i ti ganny apele Pol.

“Kris Zezi ti vin dan lemonn pour sov bann ki annan en move lavi e parmi zot, mwan ki pli pir.”​—1 Timote 1:15