Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 90

Zezi i mor Golgota

Zezi i mor Golgota

Bann sef pret ti anmenn Zezi kot pale gouverner. Pilat ti demann zot: “Ki lakizasyon zot annan kont sa zonm?” Zot ti reponn: ‘I pe dir ki i en lerwa!’ Pilat ti demann Zezi: “Eski ou Lerwa bann Zwif?” Zezi ti reponn: “Mon Rwayonm pa form parti sa lemonn.”

Apre sa, Pilat ti anvoy Zezi kot Erod, dirizan Galile, pour vwar si i ti kapab trouv okenn keksoz kont Zezi. Erod pa ti trouv okenn keksoz kont Zezi alor, i ti reanvoy li kot Pilat. Pilat ti dir bann dimoun: ‘Ni Erod ni mwan pa’n trouv nanryen kont sa zonm. Mon pou les li ale.’ Lafoul ti kriye: ‘Touy li! Touy li!’ Bann solda ti fwet Zezi, kras lo li e tap li. Zot ti met en kouronn pikan lo son latet e boufonn li: “Bonzour, Lerwa bann Zwif!” Pilat ti dir zot ankor en fwa: ‘Mon pa trouv nanryen mal avek sa zonm.’ Me zot ti kriye: “Klout li lo poto!” Alor Pilat ti donn zot Zezi pour ki i ganny met amor.

Zot ti anmenn Zezi dan en landrwa ki apel Golgota. Zot ti klout li lo en poto e apre met sa poto debout. Zezi ti priye: “Papa, pardonn zot, parski zot pa konnen ki zot pe fer.” Dimoun ti boufonn Zezi e dir: ‘Si ou Garson Bondye, sorti anler lo sa poto! Sov ou lekor.’

En bandi akote li ti dir: “Mazin mwan ler ou vin Lerwa.” Zezi ti promet li: “Ou pou avek mwan dan Paradi.” Dan apremidi, pei antye ti dan fernwanr e sa ti dire pour trwa-z-erdtan. Serten disip ti debout o bor poto. Mari, manman Zezi osi ti la. Zezi ti demann Zan pour pran swen avek Mari konmsi i ti son prop manman.

Finalman, Zezi ti dir: “I’n ganny akonplir!” I ti bes son latet anba e i ti mor. Sa menm letan, i ti annan en gran tranblemandter. Apre sa, rido ant landrwa Sen ek Tre Sen dan  tanp ti desir an de. En zofisye larme ti dir: “Vreman sa zonm ti Garson Bondye.”

“Menm si i annan en kantite promes ki Bondye in fer, zot tou zot in vin ‘wi’ atraver Zezi.”​—2 Korentyen 1:20