Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 87

Dernyen repa Zezi

Dernyen repa Zezi

Bann Zwif ti selebre Lapak tou le lannen le 14 Nizan. Sa ti fer zot rapel ki mannyer Zeova ti liber bann Izraelit ler zot ti bann lesklav Lezip e anmenn zot dan Later Promiz. Lannen 33, Zezi ek son bann zapot ti selebre Lapak dan en lasanm anler Zerizalenm. A lafen sa repa Zezi ti dir: ‘Enn ant zot pou trai mwan.’ Bann zapot ti soke e zot ti demann Zezi: ‘Lekel?’ Zezi ti dir: “Sa enn ki mon pou donn sa morso dipen.” Apre sa, i ti donn en bout dipen Zida Iskaryot. Deswit Zida ti leve e kit sa lasanm.

Apre, Zezi ti fer lapriyer, i ti kas dipen an morso e i ti donn son bann zapot ki ti ankor la. I ti dir: ‘Manz sa dipen. I reprezant mon lekor ki mon pou donnen pour zot.’ Apre, i ti priy ankor, i ti pran diven e donn son bann zapot. I ti dir: ‘Bwar sa diven. I reprezant mon disan ki mon pou verse pour ki zot pese i ganny pardonnen. Mon promet zot ki zot pou lerwa dan lesyel ansanm avek mwan. Fer sa tou le zan pour montre ki zot pe mazin mwan.’ Bann disip Zezi ti kontinyen zwenn ansanm sa menm dat tou le lannen. Sa renyon i aprezan ganny apele Repa Senyer.

 Apre repa, bann zapot ti konmans dispit pour konnen lekel parmi zot ki pli gran. Me Zezi ti dir zot: ‘Sa enn ki pli gran parmi zot i sa enn ki konsider son lekor konman pli pti.

‘Zot mon bann zanmi. Mon dir zot tou sa ki mon Papa i anvi mon dir zot. Byento mon pou al kot mon Papa dan lesyel. Zot pou reste deryer e dimoun pou konnen ki zot mon disip si zot annan lanmour pour kanmarad. Zot devret kontan kanmarad zis parey mwan mon’n kontan zot.’

Finalman, Zezi ti priye e demann Zeova pour protez son bann disip. I ti demann Zeova pour ed zot travay ansanm dan lape. I ti priy pour non Zeova ganny sanktifye. Apre sa, Zezi ek son bann zapot ti sant kantik pour loue Zeova e apre zot ti ale. I ti’n ariv ler pour Zezi ganny arete.

“Pa bezwen per pti troupo parski zot Papa in deside pour donn zot Rwayonm.”​—Lik 12:32