Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 75

Dyab i teste Zezi

Dyab i teste Zezi

Apre ki Zezi ti’n ganny batize, lespri sen ti anmenn li dan dezer. I pa ti manz nanryen pour karant zour. Alor, i ti vreman lafen. Apre Dyab ti vin tant Zezi e dir: ‘Si ou vreman en garson Bondye, dir sa bann ros vin dipen.’ Me Zezi ti reponn par dir sa ki dan Labib: ‘I’n ganny ekrir ki ou pa bezwen zis manze pour viv me ou bezwen osi ekout tou parol ki Zeova i dir.’

Apre, Dyab ti dir Zezi: ‘Si ou vreman garson Bondye, sorti anler lo tanp e sot anba. I’n ganny ekrir ki Bondye pou anvoy son bann lanz pour tyonbo ou.’ Me ankor en fwa, Zezi ti dir sa ki dan Labib: ‘I’n ganny ekrir ki ou pa devret teste Zeova.’

Apre sa, Satan ti montre Zezi tou bann rwayonm lo later, zot larises ek laglwar e i ti dir: ‘Mon pou donn ou tou sa bann rwayonm ek zot laglwar si ou ador mwan zis en fwa.’ Me Zezi ti dir li: ‘Sorti la Satan! I’n ganny ekrir ki ou devret ador zis Zeova.’

Alor Dyab ti ale e bann lanz ti vin donn Zezi en keksoz pour manze. Depi sa, Zezi ti konmans anons sa bon nouvel lo Rwayonm. Sanmenm sa travay ki i ti ganny anvoye lo later pour fer. Dimoun ti kontan sa ki Zezi ti ansenny zot e zot ti swiv li partou kot i ti ale.

“[Satan] i koz manti parey son labitid, parski i en manter e i papa mansonz.”​—Zan 8:44