Skip to content

Al lo sa dezyenm lalis

Al lo konteni

Temwen Zeova

Kreol Seselwa

Leson ki ou kapab aprann dan Labib

 LESON 63

Lekritir lo miray

Lekritir lo miray

Pli tar, Belsazar ti vin lerwa Babilonn. En zour swar, i ti envit en kantite dimoun enportan pour en lafet. I ti donn lord son bann serviter pour anmenn bann lakoup annor ki Neboukadnezar ti’n pran dan tanp Zeova. Belsazar ek son bann envite ti bwar dan sa bann lakoup e loue zot bann bondye. En sel kou, lanmen en zonm ti aparet e konmans ekri bann keksoz drol lo miray dan lasal a manze.

Belsazar ti per. I ti apel son bann mazisyen e promet zot: ‘Si en dimoun i kapab eksplik sa lekritir, mon pou fer li sa trwazyenm dimoun pli enportan Babilonn.’ Zot ti eseye, me personn pa ti kapab eksplik sa lekritir. Apre larenn ti antre e dir: ‘I annan en zonm ki apel Danyel ki ti abitye eksplik bann keksoz Neboukadnezar. I kapab eksplik ou ki sa lekritir i vedir.’

Danyel ti vin kot lerwa. Belsazar ti dir li: ‘Si ou kapab lir e eksplik sa lekritir, mon pou donn ou en sennon lor e fer ou trwazyenm dimoun pli enportan Babilonn.’ Danyel ti dir: ‘Mon pa oule ou bann kado, me mon pou dir ou ki sa lekritir i vedir. Ou papa Neboukadnezar ti orgeye e Zeova ti abes li. Ou konn byen tou sa ki ti arive avek li, me ou’n mank respe pour Zeova par bwar diven dan sa bann lakoup annor ki ti dan Son tanp. Alor Bondye in ekri sa parol: Mene, Mene, Tekel ek Parsin. Sa i vedir ki bann dimoun Med ek Pers pou defet Babilonn e ou pou nepli lerwa.’

Dimoun ti krwar i ti enposib pour defet Babilonn. Lavil ti ganny proteze par bann gro miray ek en gran larivyer. Me sa menm zour swar, bann Med ek Pers ti atak sa lavil. Lerwa Pers, Siris ti fer delo larivyer pas dan en lot  direksyon pour ki li ek son bann solda i kapab traverse e ariv kot baro sa lavil. Ler zot ti ariv laba, baro ti ouver! Larme ti antre, konkerir lavil e touy lerwa. Apre, Siris ti vin lerwa Babilonn.

Apepre enn an pli tar, Siris ti anonse: ‘Zeova in demann mwan pour rekonstri son tanp Zerizalenm. Nenport dimoun parmi son pep ki ti a kontan al ede, zot kapab ale.’ Alor, zis parey Zeova ti’n promet, en kantite Zwif ti retourn kot zot, 70 an apre ki Zerizalenm ti’n ganny detrir. Siris ti rann sa bann lakoup annor e larzan ek lezot resipyan ki Neboukadnezar ti’n pran dan tanp. Eski ou remarke ki mannyer Zeova ti servi Siris pour ed Son pep?

“I’n tonbe! Gran Babilonn in tonbe. I’n vin en landrwa kot bann demon i reste.”​—Revelasyon 18:2