Skip to content

Al lo konteni

 LEZOT LENFORMASYON

Profesi Danyel i anons larive Mesi

Profesi Danyel i anons larive Mesi

PROFET DANYEL ti viv plis ki 500 zan avan nesans Zezi. Pourtan, Zeova ti devwal lenformasyon avek Danyel ki ti pou fer nou konnen kan Zezi ti pou ganny apwente konman Mesi oubyen Kris. Sa parol ti ganny dir avek Danyel: “Ou devret konnen e konpran ki depi ki lord i sorti pour reetablir  e rebatir Zerizalenm ziska Mesi sa lider, pou annan set semenn, e osi swasannde semenn.”—Danyel 9:25.

Pour konnen egzakteman kan Mesi ti arive, nou bezwen premyerman konnen kan sa peryod letan ki anmenn ver Mesi ti konmanse. Dapre sa profesi, i ti konmans “depi ki lord i sorti pour reetablir e rebatir Zerizalenm.” Kan sa ‘lord ti sorti’? Dapre en ekriven Labib ki ti apel Neemya, sa lord pour rebatir miray otour Zerizalenm ti sorti “dan ventyenm lannen ki Artazekzes ti lerwa.” (Neemya 2:1, 5-8) Bann istoryen i konfirmen ki premye lannen konplet Artazekzes  konman dirizan ti an 474 A.N.L. Alors, 20 tyenm lannen son renny ti an 455 A.N.L. Aprezan nou konnen kan profesi Danyel lo Mesi ti konmans akonpli. Sa ti an 455 A.N.L.

Danyel i endike konbyen letan sa peryod letan ziska Mesi i arive pou dire. Sa profesi i mansyonn “set semenn, e osi swasannde semenn,” ki fer en total 69 semenn. Ki kantite letan sa? Plizyer tradiksyon Labib i fer remarke ki sa pa bann semenn set zour, me i bann semenn lannen. Savedir sak semenn i reprezant set lannen. Bann Zwif ti familye avek sa konsep semenn lannen oubyen en porsyon set lannen. Par egzanp, zot ti obzerv en lannen Saba tou le set an. (Egzod 23:10, 11) Alors, sa 69 semenn profetik i 69 semenn 7 lannen, ki fer en total 483 lannen.

Aprezan nou bezwen zis konte. Si nou kont 483 lannen depi 455 A.N.L., sa pou fer nou ariv lannen 29 N.L. Sa ti egzakteman sa lannen ki Zezi ti batize e vin Mesi! * (Lik 3:1, 2, 21, 22) Pa i remarkab ki mannyer sa profesi in ganny akonpli?

^ par. 2 Depi lannen 455 A.N.L. ziska lannen 1 A.N.L., i fer 454 lannen. Depi lannen 1 A.N.L. ziska lannen 1 N.L. i en lannen (ti napa lannen zero.) Apre depi lannen 1 N.L. ziska lannen 29 N.L., i fer 28 lannen. Ler nou azout sa trwa nimero ansanm, nou ganny en total 483 lannen. Zezi ti mor lannen 33 N.L, pandan swasanndizyenm semenn lannen. (Danyel 9:24, 26) Vwar liv Prêtons attention à la prophétie de Daniel ! sapit 11, ek Étude perspicace des Écritures, Volim 2, paz 899-901 an Angle e Volim 2, paz 995-997 an Franse. Tou le de pibliye par Temwen Zeova.