Skip to content

Al lo konteni

 SAPIT SENK

Pli gro kado ki Bondye in donn nou

Pli gro kado ki Bondye in donn nou
  • Ki sa pri Bondye ti peye pour liber bann imen dan pese?

  • Ki mannyer sa pri ti ganny peye?

  • Ki byenfe i kapab anmennen pour ou?

  • Ki mannyer ou kapab montre ou apresye sakrifis Zezi?

1, 2. (a) Kwa ki fer en kado annan en gran valer pour ou personnelman? (b) Akoz nou kapab dir ki sakrifis Zezi i kado pli presye ki ou kapab gannyen?

KI PLI gro kado ou’n deza gannyen? Pa fodre ki en kado i ser pour li enportan. Apre tou, pa larzan ki desid vre valer en kado. Si en kado i fer ou kontan oubyen i en keksoz ki ou ti vreman bezwen, i annan en gran valer pour ou personnelman.

2 Parmi tou sa bann kado ki ou ti a kontan gannyen, i annan en kado ki pli presye ki tou. I en kado ki Bondye in donn tou dimoun. Zeova in donn nou bokou keksoz. Me pli gro kado ki i’n donn nou i sakrifis son Garson Zezi Kri. (Matye 20:28) Parey nou pou vwar dan sa sapit, sa sakrifis i kado pli presye ki ou kapab gannyen. Sa i akoz i kapab donn ou bokou lazwa e i en keksoz ki ou vreman bezwen. Vreman, napa pli bon fason ki Zeova in eksprim son lanmour pour ou ki donn son garson pour mor pour ou.

 KI SA PRI KI TI BEZWEN GANNY PEYE?

3. Ki pri Bondye ti pare pour peye pour sov bann imen? Ki nou bezwen konpran pour nou realize konman sa kado i presye?

3 Sakrifis Zezi ti sa pri ki Zeova ti bezwen peye pour liber oubyen sov bann imen dan pese ek lanmor. (Efezyen 1:7) Pour konpran akoz sa ti neseser, nou bezwen mazin sa ki ti arive dan zarden Edenn. Si zis nou konpran ki Adan ti perdi kan i ti fer pese, nou pou arive konpran akoz sakrifis Zezi i en kado ki sitan presye pour nou.

4. Ki kantite presye lavi parfe ti presye pour Adan?

4 Kan Zeova ti kree Adan, i ti donn li en keksoz vreman presye. Sa se en lavi parfe. Reflesir ki kantite presye sa ti presye pour Adan. Son lekor ek lespri ti parfe, alor i pa ti pou zanmen malad, vye, e mor. Akoz i ti parfe, i ti annan en relasyon spesyal avek Zeova. Labib i dir Adan ti en “garson Bondye.” (Lik 3:38) Alors, Adan ti annan en relasyon pros avek Zeova, zis parey en garson ki pros avek son papa. Zeova ti koz avek son garson lo later. I ti donn Adan bann travay ki gou pour fer e fer li konnen ki i bezwen fer.—Zenez 1:28-30; 2:16, 17.

5. Ki Labib i oule dir kan i dir Adan ti ganny fer dan “resanblans Bondye”?

5 Adan ti ganny fer dan “resanblans Bondye.” (Zenez 1:27) Sa pa vedir ki Adan ti resanble Bondye lo laparans fizik. Parey nou’n vwar dan Sapit 1 sa liv, Zeova i en lespri envizib. (Zan 4:24) Alors Zeova napa en lekor laser ek disan, parey nou. Adan ti ganny fer dan resanblans Bondye dan le sans ki i ti ganny kree avek bann kalite parey Bondye. Par egzanp, lanmour, lasazes, lazistis, ek pwisans. Adan ti parey son Papa dan en lot fason. I ti annan liberte pour swazir sa ki i oule fer. Savedir Adan  pa ti parey en robot ki fer zis sa ki i’n ganny progranmen pour fer. Okontrer i ti kapab fer son prop desizyon e swazir si i pou fer sa ki byen oubyen sa ki mal. Si i ti’n swazir pour obeir Bondye, i ti pou’n viv pour touzour dan Paradi lo later.

6. Ki Adan ti perdi ler i ti dezobei Bondye, e ki mannyer son bann desandans ti ganny afekte?

6 Alors, i kler ki ler Adan ti dezobei Bondye e ganny kondannen amor, sa ti kout li byen ser. Son pese ti kout li lavi parfe avek tou son bann byenfe. (Zenez 3:17-19) Malerezman, pa zis Adan ki ti perdi sa lavi presye, me son bann fitir desandans osi. Parol Bondye i dir: “Pese in antre dan lemonn par en sel zonm [Adan], e pese in anmenn lanmor, e lanmor in pas avek tou dimoun, parski tou dimoun in konmet pese.” (Romen 5:12) Wi, nou tou nou’n erit pese avek Adan. Se pour sa ki Labib i dir i ti “vann” son lekor ek son bann desandans konman lesklav pese ek lanmor. (Romen 7:14) Ti napa okenn lespwar pour Adan ek Ev akoz zot ti swazir volonterman pour dezobei Bondye. Me nou, son bann desandans, eski i annan okenn lespwar pour nou?

7, 8. Pour ki rezon sa pri ti bezwen ganny peye?

7 Zeova ti vin sekour bann imen par donn lavi son garson konman en pri ki i ti bezwen peye. Akoz sa ti neseser? Pour de rezon. Premyerman, en pri i bezwen ganny peye pour liber oubyen reganny en keksoz. I zis parey ler en sonm larzan i bezwen ganny peye pour larg en prizonnyen lager. Dezyenmman, sa pri ti pou bezwen kouver pri sa ki’n perdi. I zis parey ler ou pey domaz ki en dimoun oubyen en keksoz in sibir par aksidan. Par egzanp, si en drayver i tap en dimoun lo  semen, i bezwen pey en sonm larzan lavaler domaz ki sa aksidan in koze.

8 Me eski i posib pour kouver tou sa ki Adan in fer nou perdi e liber nou dan pese ek lanmor? Annou vwar en pe sa pri ki Zeova ti peye e ki byenfe sa i kapab anmennen pour ou.

KI MANNYER ZEOVA TI PEY SA PRI

9. Ki Zeova ti bezwen donnen pour liber bann imen?

9 Vi ki lavi en dimoun parfe ti’n perdi, okenn dimoun enparfe pa ti pou kapab ganny servi pour reganny sa lavi parfe. (Psonm 49:7, 8) Sa ki Zeova ti bezwen donnen ti pou bezwen annan menm valer avek sa ki ti’n perdi. Sa i an akor avek sa prensip dan son Parol konsernan lazistis parfe, ki dir: “Nanm pour nanm.” (Deterononm 19:21) Alors, kwa ki annan menm valer avek sa lavi parfe ki Adan ti perdi? En lot lavi parfe. Se sa ki Zeova ti bezwen donnen pour liber bann imen.—1 Timote 2:6.

10. Ki mannyer Zeova ti pey sa pri?

10 Ki mannyer Zeova ti pey sa pri? I ti pran enn son bann garson spirityel parfe dan lesyel e anvoy lo later. Me Zeova pa ti anvoy nenport lanz. I ti anvoy sa enn ki pli presye pour li, son sel Garson. (1 Zan 4:9, 10) Son Garson ti pare pour kit lesyel, sa landrwa kot i’n toultan reste. (Filipyen 2:7) Parey nou ti vwar dan sapit avan, Zeova ti fer en mirak kan i ti transfer lavi son Garson dan vant Mari. Gras a lespri sen Bondye, Zezi ti ne konman en imen parfe e i pa ti erit pese.—Lik 1:35.

Zeova ti donn son sel Garson konman en sakrifis pour sov nou

11. Ki mannyer i posib pour en sel zonm liber tou sa dimoun?

11 Be en sel zonm i ase pour liber tou sa dimoun? Bon, premyerman ki mannyer tou sa dimoun in vin  peser? Pa bliye ki ler Adan ti fer pese, i ti perdi lavi parfe ki en keksoz vreman presye. Alors i pa ti kapab pas sa avek son bann desandans. Okontrer, i ti kapab pas zis pese ek lanmor avek zot. Zezi, ki Labib i apel li “dernyen Adan,” ti en zonm parfe, e i pa ti zanmen fer pese. (1 Korentyen 15:45) Dan en sans, Zezi ti pran plas Adan pour li vin sov nou. I ti pey sa pri ki pese Adan ti’n koute par sakrifye oubyen donn son lavi parfe, anmenmtan obeir son Papa dan tou keksoz. Dan sa fason, Zezi ti donn en lespwar bann desandans Adan.—Romen 5:19; 1 Korentyen 15:21, 22.

12. Ki soufrans Zezi i prouve?

12 Labib i dekrir an detay soufrans ki Zezi ti pas ladan avan son lanmor. I ti ganny fwete, kloute lo en poto konman en kriminel, e mor en lanmor fer mal lo sa poto. (Zan 19:1, 16-18, 30; “Akoz bann vre Kretyen pa servi lakrwa dan zot Ladorasyon?” anba Lezot lenformasyon) Akoz Zezi ti bezwen soufer koumsa? Dan en lot sapit plitar, nou pou vwar ki Satan ti demande si pou annan okenn serviter Zeova ki pou reste fidel avek li ler zot rankontre difikilte. Zezi ti donn en bon larepons Satan par persevere fidelman kantmenm i ti soufer bokou. Zezi in prouve ki en zonm parfe ki lib pour swazir i kapab reste fidel avek Bondye malgre tou sa ki Satan ti fer. Zeova ti bezwen vreman kontan pour vwar son Garson byenneme reste fidel!—Proverb 27:11.

13. Ki mannyer sa pri pour sov limanite ti ganny peye?

13 Ki mannyer sa pri pour sov bann imen ti ganny peye? Katorzyenm zour mwan Nizan lo kalandriye Zwif lannen 33 N.L., Bondye ti les son Garson parfe ki ti napa okenn pese mor. Dan sa fason, Zezi ti sakrifye son lavi parfe “enn fwa pour tou.” (Ebre 10:10) Trwazyenm zour apre ki Zezi ti mor, Zeova ti resisit li  konman en lespri. Dan lesyel, Zezi ti prezant Bondye valer son lavi konman en zonm parfe, ki i ti’n donn konman sakrifis pour liber bann desandans Adan. (Ebre 9:24) Zeova ti aksepte valer sakrifis Zezi konman sa pri ki i ti bezwen peye pour liber bann imen dan lesklavaz pese ek lanmor.—Romen 3:23, 24.

BYENFE KI SAKRIFIS ZEZI I ANMENNEN POUR OU

14, 15. Ki nou bezwen fer pour ganny ‘pardonnen nou pese’?

14 Kantmenm nou fer pese, nou kapab benefisye bokou avek sakrifis Zezi. Annou vwar serten byenfe ki nou gannyen konmela menm e osi alavenir gras a sa pli gro kado ki Bondye in donn nou.

15 Pardonnen nou pese. Vi ki nou enparfe, nou bezwen vreman lite pour fer sa ki byen. Nou tou nou fer pese swa an parol swa an aksyon. Me nou kapab ganny ‘pardonnen nou pese’ gras a sakrifis Zezi. (Kolosyen 1:13, 14) Selman nou bezwen vreman repantir pour ganny pardonnen. Nou bezwen osi abes nou e sipliy Zeova pour pardonn nou akoz nou lafwa dan sakrifis son Garson.—1 Zan 1:8, 9.

16. Kwa ki fer nou kapab ador Bondye avek en konsyans kler, e ki valer en tel konsyans i annan?

16 En konsyans kler devan Bondye. En konsyans sarze i fasilman fer nou dekouraze e santi nou pa vo nanryen. Me pardon ki nou gannyen gras a sakrifis Zezi, i fer nou kapab ador Zeova avek en konsyans kler kantmenm nou enparfe. (Ebre 9:13, 14) Sa i fer nou santi nou lib pour koz avek Zeova. Alors nou kapab priy li avek konfyans. (Ebre 4:14-16) Ler nou konsyans i kler, nou annan lape lespri, respe pour nou lekor, e nou santi nou pli zwaye.

17. Ki bann benediksyon ki posib akoz Zezi in mor pour nou?

 17 Lespwar pour viv pour touzour lo later. Romen 6:23 i dir: “Rekonpans pour pese i lanmor.” Sa menm verse i azoute: “Me don gratwit ki Bondye i donnen i lavi eternel dan Kris-Zezi nou Senyer.” Dan Sapit 3 sa liv, nou ti koz lo bann benediksyon ki nou pou gannyen dan Paradi isi lo later. (Revelasyon 21:3, 4) Tou sa bann benediksyon, enkli viv pour touzour avek en lasante parfe, i posib akoz Zezi ti mor pour nou. Pour ganny sa bann benediksyon, nou bezwen montre ki nou apresye sa sakrifis.

KONMAN OU KAPAB MONTRE OU LAPRESYASYON?

18. Akoz nou devret rekonesan anver Zeova pour sa kado ki i’n donn nou?

18 Akoz nou devret vreman rekonesan anver Zeova pour sa kado ki i’n donn nou? En kado i annan bokou valer kan sa dimoun ki’n donn ou sa kado in sakrifye son letan, zefor, oubyen larzan. I tous nou ler nou vwar en dimoun eksprim son lanmour senser pour nou atraver en kado. Napa kado pli presye ki sakrifis Zezi, parski Bondye in fer pli gran sakrifis pour kapab donn  nou sa kado. Zan 3:16 i dir: “Bondye in telman kontan lemonn ki i’n donn son sel Garson.” Sa sakrifis i pli gran laprev ki Zeova i kontan nou. I osi laprev ki Zezi i kontan nou, parski i ti pare pour donn son lavi pour nou. (Zan 15:13) Alors sa kado i devret konvenk nou ki Zeova ek son Garson i kontan nou tou endividyelman.—Galat 2:20.

Fer zefor pour konn plis lo Zeova i en fason pour montre ou apresye sa kado ki i’n donn ou

19, 20. Ki mannyer ou montre ou apresye sa kado ki Bondye in donn ou?

19 Be ki mannyer ou kapab montre ou apresye sa kado ki Bondye in donn ou? Premyerman, fer zefor pour konn plis lo Zeova, ki’n donn nou sa kado. (Zan 17:3) Etidye Labib avek led sa liv pou ed ou fer sa. Pli ou konn Zeova, ou lanmour pour li pou vin pli for. An retour, sa lanmour pou fer ou anvi fer li plezir.—1 Zan 5:3.

20 Demontre lafwa dan sakrifis Zezi. Zezi li menm ti dir: “Tou dimoun ki krwar [oubyen demontre lafwa] dan son Garson i ganny lavi eternel.” (Zan 3:36) Ki mannyer nou kapab montre nou krwar dan Zezi? Nou pa zis dir nou krwar. Zak 2:26 i dir: “Lafwa san bann laksyon i mor.” Wi, nou montre ki nou vreman krwar oubyen annan lafwa par nou “laksyon,” par sa ki nou fer. En fason pour montre ki nou vreman krwar dan Zezi, se par fer nou mye pour imit li pa zis dan sa ki nou dir me osi dan sa ki nou fer.—Zan 13:15.

21, 22. (a) Akoz nou devret asiste Repa Senyer tou le zan? (b) Ki Sapit 6 ek 7 pou eksplike?

21 Asiste Repa Senyer ki ganny obzerve tou le zan. Son aswar le 14 Nizan lannen 33 N.L., Zezi ti entrodwir en seremoni spesyal ki Labib i apel “repa Senyer.” (1 Korentyen 11:20; Matye 26:26-28) Sa seremoni i osi  ganny apele Memoryal lanmor Kris. Zezi ti entrodwir li pour ed son bann zapot ek tou vre Kretyen ki vin apre zot rapel ki par son lanmor, i ti donn son lavi konman en sakrifis pour zot. An rapor avek sa seremoni, Zezi ti donn sa lord: “Fer sa an mon memwar.” (Lik 22:19) Ler nou obzerv Memoryal i fer nou rapel konbyen Zeova ek Zezi i kontan nou, ki’n fer zot fourni sa sakrifis. Nou kapab montre nou lapresyasyon pour sakrifis Zezi par asiste Memoryal son lanmor tou le zan. *

22 Sa sakrifis ki Zeova in donn nou i en kado ki vreman annan en gran valer. (2 Korentyen 9:14, 15) Sa kado i kapab benefisye menm bann dimoun ki’n mor. Sapit 6 ek 7 pou eksplike konman.

^ par. 21 Pour plis lenformasyon konsernan lenportans Repa Senyer, vwar “Repa Senyer—en Komemorasyon ki onor Bondye” anba Lezot lenformasyon.