Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i vreman dir?

 SAPIT KAT

Lekel Zezi Kri?

Lekel Zezi Kri?
  • Ki rol spesyal Zezi ti annan?

  • Kot i ti sorti?

  • Ki kalite dimoun i ti ete?

1, 2. (a) Akoz konn non en dimoun renonmen pa vedir ou vreman konn sa dimoun? (b) Ki dimoun i krwar Zezi i ete?

I ANNAN bokou dimoun renonmen dan lemonn. Serten i renonmen dan zot distrik, lavil, oubyen pei. Lezot i renonmen dan lemonn antye. Me zis konn non en dimoun renonmen pa vedir ou vreman konn sa dimoun. I pa vedir ou konn bann detay lo son lavi pase e ki kalite dimoun i vreman ete.

2 Dimoun partou dan lemonn in tann nonm Zezi Kri, menm si i ti viv lo later apepre 2,000 an pase. Me bokou pa asire ki Zezi ti vreman ete. Serten i dir i ti zis en bon dimoun. Lezot i dir i ti en senp profet. I annan lezot ankor ki krwar Zezi i li menm li Bondye e nou devret ador li. Eski sa i vre?

3. Akoz i enportan pour ou konn laverite lo Zezi?

3 I enportan pour ou konn laverite lo Zezi. Akoz? Akoz Labib i dir: “Savedir, pour ganny lavi eternel zot bezwen aprann konn ou konman sel vre Bondye ek sa enn ki ou’n anvoye, Zezi Kri.” (Zan 17:3, NW) Wi, konn laverite lo Zeova ek Zezi Kri i kapab fer nou ganny lavi eternel dan paradi isi lo later. (Zan 14:6) Deplis, Zezi in donn pli bon legzanp konman pour viv e konman pour  tret lezot. (Zan 13:34, 35) Dan premye sapit sa liv, nou ti vwar laverite lo Bondye. Aprezan, annou vwar ki Labib i vreman dir lo Zezi Kri.

MESI KI BONDYE TI PROMET

4. Ki sa tit “Mesi” ek “Kris” i vedir?

4 Bokou letan avan Zezi ti ne, Labib ti predir ki Bondye ti pou anvoy en Mesi oubyen Kris. Tou le de tit “Mesi” (ki sorti dan en mo Ebre) ek “Kris” (ki sorti dan en mo Grek) i vedir “sa Enn ki’n ganny swazir.” Bondye ti pou swazir oubyen apwent sa Enn ki i ti’n promet dan en pozisyon spesyal. Plitar dan  bann sapit sa liv, nou pou aprann plis lo rol enportan ki Mesi ti zwe pour akonpli promes Bondye. Nou pou osi aprann konsernan bann byenfe ki Zezi i kapab anmennen pour nou konmela menm. Me avan Zezi ti ne, sirman bokou dimoun ti demann zot lekor, ‘Lekel ki pou vin Mesi?’

5. Ki bann disip Zezi ti konvenki lo son size?

5 Dan premye syek N.L., bann disip Zezi ti vreman konvenki ki li menm sa Mesi ki Bondye ti promet. (Zan 1:41) Enn son bann disip, ki ti apel Simon Pyer, ti dir avek Zezi fransman: “Oumenm Mesi.” (Matye 16:16) Me kwa ki ti fer sa bann disip e nou ozordi asire ki Zezi ti vreman sa Mesi ki Bondye ti promet?

6. Donn en legzanp pour montre konman Zeova in ed bann fidel idantifye Mesi.

6 Bann profet Bondye ki ti viv avan Zezi ti predir bokou detay konsernan Mesi. Sa bann detay ti pou ed lezot idantifye li. Pour donn en legzanp: Meton ou ganny demande pour al zwenn en dimoun ki ou pa konnen lo stenn bis, ouswa lo lasose, oubyen lo erport. Pa i ti pou pli fasil si en dimoun i donn ou serten detay lo sa dimoun? I menm parey avek Mesi. Atraver bann profet dan Labib, Zeova ti donn en deskripsyon ase detaye konsernan sa ki Mesi ti pou fer oubyen pas ladan. Lakonplisman tou sa bann profesi ti pou ed bann fidel byen idantifye li.

7. Nonm de profesi ki ti akonpli an rapor avek Zezi.

7 Annou vwar zis de legzanp. Premyerman, plis ki 700 zan avan, profet Mika ti predir ki Mesi ti pou ne an Betleenm, en pti lavil dan Zide. (Mika 5:2) Kote Zezi ti ne? Dan sanmenm sa lavil! (Matye 2:1, 3-9) Dezyenmman, plizyer syek avan, en profesi dan Danyel 9:25 ti  endike ki lannen Mesi ti pou aparet. Sa i lannen 29 N.L. * Lakonplisman sa de profesi ek lezot ankor i prouve ki Zezi ti sa Mesi ki Bondye ti promet.

Zour Zezi ti batize, i ti vin Mesi oubyen Kris

8, 9. Ki laprev ki montre klerman ki Zezi ti Mesi zour son batenm?

8 Alafen lannen 29 N.L., ti annan en lot laprev kler ki Zezi ti Mesi. Sa lannen, Zezi ti al kot Zan-Batis pour batize dan Larivyer Zourden. Zeova ti’n promet Zan en siny ki ti pou idantifye Mesi. Zan ti vwar sa siny ler Zezi ti batize. Labib i rakont sa ki ti arive: “Zis konman Zezi ti’n fini batize, i ti sorti dan delo. Lesyel ti ouver, i ti war Lespri Bondye desann lo li dan laform en kolonm. En lavwa sorti dan lesyel ti dir, ‘Sa mon Garson byenneme, ki donn mwan bokou lazwa.’” (Matye 3:16, 17) Apre sa ki Zan ti’n tande e vwar arive, i ti konvenki ki Zezi ti’n ganny anvoye par Bondye. (Zan 1:32-34) Sa zour, omoman ki lespri Bondye oubyen son lafors aktif ti desann lo Zezi, i ti vin Mesi oubyen Kris, sa enn ki ti’n ganny apwente konman Lider oubyen Lerwa.—Izai 55:4.

9 Lakonplisman profesi Labib e sa siny ki Zeova li menm ti donnen i montre klerman ki Zezi ti sa Mesi ki I ti promet. Me Labib i reponn de lezot kestyon enportan konsernan Zezi Kri: Kote i sorti e ki kalite dimoun i ti ete?

KOTE ZEZI TI SORTI?

10. Ki Labib i dir konsernan legzistans Zezi avan vin lo later?

10 Labib i dir ki Zezi ti viv dan lesyel avan vin lo later. Mika ti profetize ki Mesi ti pou ne Betleenm e osi i ti pou egziste depi okonmansman menm. (Mika 5:2) Plizyer  fwa, Zezi li menm ti dir ki i ti viv dan lesyel avan ne lo later konman en imen. (Zan 3:13; 6:38, 62; 17:4, 5) Ler Zezi ti en lespri dan lesyel, i ti annan en relasyon spesyal avek Zeova.

11. Konman Labib i montre ki Zezi i garson Zeova ki i pli atase avek?

11 Zezi i garson Zeova ki i pli atase avek. Akoz? Premyerman i ganny apele “premye-ne tou kreasyon,” e sa akoz i premye kreasyon Bondye. * (Kolosyen 1:15) I annan en lot keksoz ki fer sa Garson spesyal. I “sel Garson” Bondye. (Zan 3:16) Bondye i annan lezot garson me zis Zezi ki i’n kree li tousel. Deplis, zis Zezi tousel ki Bondye in servi kan i ti kree tou lezot keksoz. (Kolosyen 1:16) Apre osi, Zezi i ganny apele “Laparol.” (Zan 1:14) Sa i montre nou ki i ti koz pour Bondye par anmenn Son mesaz ek lenstriksyon kot lezot Son bann garson, dan lesyel oubyen lo later.

12. Ki mannyer nou konnen premye Garson Bondye pa egal avek Bondye?

12 Eski premye Garson Bondye i egal avek Bondye, parey serten i krwar? Labib pa dir sa. Parey nou’n vwar dan bann paragraf avan, Garson Bondye ti ganny kree. I kler alors ki i ti annan en konmansman. Tandis ki Zeova li, i napa ni konmansman ni finisyon. (Psonm 90:2) Sa sel Garson Bondye pa’n ni menm deza sey met li egal avek son Papa. Labib i montre klerman ki Papa i pli gran ki son Garson. (Zan 14:28; 1 Korentyen 11:3) Zis Zeova tousel ki “Bondye Tou Pwisan.” (Zenez 17:1) Alors, napa personn ki egal avek li. *

13. Ki Labib i oule dir kan i dir Zezi i “resanblans vizib Bondye ki envizib”?

 13 Zeova ek son premye Garson ti annan en relasyon tre pros pour plizyer bilyon lannen, avan menm ki lesyel ek later ti ganny kree. Zot in bezwen kontan kanmarad en kantite! (Zan 3:35; 14:31) Garson byenneme Bondye ti vin parey son Papa. Se pour sa ki Labib i dir Zezi i “resanblans vizib Bondye ki envizib.” (Kolosyen 1:15) Wi, zis parey en pti garson i kapab parey son papa dan plizyer fason, Garson Bondye ti annan bann kalite ek personnalite son Papa.

14. Ki mannyer sel Garson Bondye ti ne konman en imen?

14 Sel Garson Bondye ti pare pour kit lesyel e vin viv lo later konman en imen. Me petet ou pe demann ou lekor, ‘Konman i posib pour en lespri ne konman en imen?’ Pour sa posib, Zeova ti fer en mirak. I ti transfer lavi son premye Garson dan vant en zenn fiy Zwif ki ti apel Mari. Sa zanfan ti napa en papa imen parey nou. Alors Mari ti donn nesans en garson ki ti parfe e i ti apel li Zezi.—Lik 1:30-35.

KI KALITE DIMOUN ZEZI TI ETE?

15. Akoz nou kapab dir nou konn Zeova pli byen atraver Zezi?

15 Sa ki Zezi ti dir e fer lo later i ed nou konn li byen. Deplis, atraver Zezi nou arive konn Zeova pli byen. Akoz sa? Pa bliye ki Zezi i resanble son Papa dan en fason parfe. Se pour sa ki Zezi ti dir enn son bann disip: “Sa ki’n war mwan in osi war mon Papa.” (Zan 14:9) Sa kat liv Labib ki bokou dimoun i konn zot konman Levanzil—Matye, Mark, Lik, ek Zan—i dir nou bokou lo lavi, aktivite, ek personnalite Zezi Kri.

16. Lo ki mesaz Zezi ti konsantre, e kote son bann lansennyman ti sorti?

 16 Zezi ti renonmen konman en “Ansennyan.” (Zan 1:38; 13:13, NW) Ki i ti ansennyen? Son mesaz ti konsantre lo “Bonn Nouvel konsernan Rwayonm Bondye” dan lesyel. Sa rwayonm pou diriz later antye e anmenn bokou benediksyon pour bann imen obeisan. (Matye 4:23) Me kote sa mesaz ki Zezi ti pe anmennen ti sorti? Zezi li menm ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” (Zan 7:16) Zezi ti konnen son Papa i anvi bann dimoun tann sa bon nouvel konsernan son Rwayonm. Dan Sapit 8, nou pou aprann plis konsernan Rwayonm Bondye e sa ki i pou fer.

17. Kote Zezi ti ansennyen, e akoz i ti fer tou sa ki i kapab pour ansenny lezot?

17 Kote Zezi ti ansennyen? Partou kot i ti vwar dimoun, dan lakanpanny ensi ki dan lavil, dan bann vilaz, dan landrwa piblik, e kot lakaz sa bann dimoun osi. Zezi pa ti ekspekte dimoun pour vin kot li. I ti al kot zot. (Mark 6:56; Lik 19:5, 6) Akoz Zezi ti fer tousala e pas sitan bokou son letan prese e ansennyen? Akoz se sa ki Bondye ti oule i fer. Zezi ti toultan fer sa ki fer son Papa plezir. (Zan 8:28, 29) Me i annan en lot rezon akoz i ti prese. I ti pran pitye pour sa lafoul dimoun ki ti vin vwar li. (Matye 9:35, 36) Zot ti’n ganny neglize par bann ki ti sipoze ansenny zot laverite lo Bondye ek son plan. Zezi ti konnen ki bann dimoun ti vreman bezwen tann sa mesaz konsernan Rwayonm Bondye.

18. Ki ou pli kontan avek Zezi?

18 Zezi ti en dimoun ki ti ranpli avek tandres ek  santiman profon. Lezot dimoun ti vwar li zantiy e fasil pour aprose. Menm bann zanfan ti santi zot alez avek li. (Mark 10:13-16) Zezi pa ti fer lapliferans. I pa ti kontan koripsyon ek lenzistis. (Matye 21:12, 13) Dan son letan, bann madanm pa ti ganny rekonnet e respe. Me li, i ti donn zot sa respe ki zot ti merite. (Zan 4:9, 27) Zezi ti vreman annan bokou limilite. En fwa, i ti lav lipye son bann zapot, en keksoz ki ti normalman fer par en dernyen serviter.

Zezi ti pres partou kot i ti vwar dimoun

19. Ki legzanp ki montre ki Zezi ti konpran bann dimoun ki ti dan bezwen?

19 Zezi ti konpran bann dimoun ki ti dan bezwen. Nou vwar sa sirtou kan i ti fer mirak par pouvwar lespri Bondye pour geri bann dimoun. (Matye 14:14) Par egzanp, en zonm ki ti annan lalep ti vin kot Zezi e dir: “Si ou oule ou kapab pirifye mwan.” Zezi ti santi douler ek soufrans sa zonm. I ti pran pitye pour li e tous li,  an dizan: “Mon oule ganny pirifye.” Sa zonm malad ti geri! (Mark 1:40-42) Ou kapab mazinen ki mannyer sa zonm ti’n bezwen santi?

FIDEL ZISKA LAFEN

20, 21. Konman Zezi in kit en legzanp lobeisans anver Bondye?

20 Zezi in kit pli bon legzanp lobeisans anver Bondye. I ti reste fidel avek son Papa dan nenport sitiasyon kantmenm i ti rankontre diferan lopozisyon e pas tou sort martir. Zezi ti kapab reziste tantasyon Satan avek bokou determinasyon. (Matye 4:1-11) En rafal, menm serten fanmiy Zezi pa ti krwar li e zot ti menm dir, “I’n perdi latet.” (Mark 3:21) Me Zezi pa ti les zot enfliyans li. I ti kontinyen fer travay Bondye. Kantmenm i ti ganny ensilte e maltrete, Zezi ti kontrol son lekor e i pa ti zanmen sey fer ditor bann ki ti opoz li.—1 Pyer 2:21-23.

 21 Zezi ti reste fidel ziska lanmor, en lanmor kriyel e fer mal dan lanmen son bann lennmi. (Filipyen 2:8) Mazin en pe sa ki i ti sibir lavey son lanmor. I ti ganny arete, bann fo temwen ti akiz li, bann ziz koronpi ti kondann li, lafoul ti boufonn li, e bann solda ti tortir li. Lo sa poto ki zot ti’n klout li, i ti rann son dernyen souf e kriye: “Tou in akonpli!” (Zan 19:30) Me trwazyenm zour apre ki Zezi ti’n mor, son Papa dan lesyel ti resisit li konman en lespri. (1 Pyer 3:18) Detrwa semenn apre, i ti retourn dan lesyel. I ti “asiz li dan kote drwat Bondye” e espere ziska i ganny pouvwar konman lerwa.—Ebre 10:12, 13.

22. Ki Zezi ti akonpli ler i ti reste fidel ziska lanmor?

22 Ki Zezi ti akonpli ler i ti reste fidel ziska lanmor? Lanmor Zezi i fer li posib pour nou viv pour touzour lo sa later, ki pou’n vin en paradi. Sa i an armoni avek plan ki Zeova ti annan depi okonmansman. Ki mannyer lanmor Zezi i fer sa posib? Nou pou diskit sa dan lot sapit.

^ par. 7 Pour en leksplikasyon lo profesi Danyel ki’n akonpli konsernan Zezi, vwar “Profesi Danyel i anons Larive Mesi” anba Lezot lenformasyon.

^ par. 11 Zeova i ganny apele Papa akoz i Kreater. (Izai 64:8) Vi ki Zezi in ganny kree par Bondye, i ganny apele Garson Bondye. Pour menm rezon, bann lanz e menm premye zonm, Adan, i ganny apele garson Bondye.—Zob 1:6; Lik 3:38.

^ par. 12 Pour plis laprev ki premye Garson Bondye pa egal avek Bondye, vwar “Laverite lo Papa, Garson, ek Lespri Sen” anba Lezot lenformasyon.