Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i vreman dir?

 SAPIT DISET

Apros avek Bondye par lapriyer

Apros avek Bondye par lapriyer
  • Akoz nou devret priy Bondye?

  • Ki nou bezwen fer pour Bondye ekout nou lapriyer?

  • Ki mannyer Bondye i ekout nou lapriyer?

“Sa enn ki’n fer lesyel ek later” i pare pour ekout nou lapriyer

1, 2. Akoz nou devret vwar li en loner pour priy avek Zeova, e akoz nou bezwen konnen ki Labib i dir lo lapriyer?

LATER i vreman ptipti konpare avek sa gran liniver. Pour Zeova, “ki’n fer lesyel ek later,” bann nasyon i parey en pti gout delo dan en seo. (Psonm 115:15; Izai 40:15) Pourtan Labib i dir: “Zeova i pros avek tou bann ki kriy li, avek tou bann ki kriy li avek senserite. I pou akonpli dezir tou bann ki annan lakrent pour li, e kan zot kriy osekour i pou tande.” (Psonm 145:18, 19) Zis mazinen ki sa i vedir! Sa Kreater ki tou pwisan i pros avek nou e i pou tann nou si nou “kriy li avek senserite.” Pa i en loner pour priy avek Bondye!

2 Me si nou anvi Zeova ekout nou lapriyer, nou bezwen priy li mannyer i oule. Ki mannyer nou kapab fer sa si nou pa konn sa ki Labib i dir lo lapriyer? I tre enportan pour nou konnen ki Labib i dir lo sa size, parski lapriyer i ed nou vin pli pros avek Zeova.

AKOZ PRIY ZEOVA?

3. Nonm en rezon enportan akoz nou devret priy Zeova.

3 En rezon enportan akoz nou devret priy Zeova i akoz  i envit nou pour fer li. Dan son Parol, i ankouraz nou: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Filipyen 4:6, 7) Lapriyer i en provizyon fer pour nou par sa Enn ki pli o dan liniver. Annou pa negliz li!

4. Ki mannyer priye regilyerman i fer nou relasyon avek Zeova pli solid?

4 En lot rezon pour priye i ki ler nou priy Zeova regilyerman, nou relasyon avek li i vin pli for. Bann vre zanmi pa koz avek kanmarad zis ler zot bezwen keksoz. Okontrer bann bon zanmi i enterese avek kanmarad, e zot lanmitye i vin pli for kan zot eksprim zot panse, lenkyetid, ek santiman san ezite. I en pe parey avek nou relasyon avek Zeova. Atraver sa liv, ou’n aprann bokou lo sa ki Labib i dir konsernan Zeova, son personnalite, ek son plan. Ou’n arive konn li konman en dimoun reel. Lapriyer i donn ou loportinite pour eksprim ou panse ek  santiman pli profon avek ou Papa dan lesyel. Ler ou fer sa, ou vin pli pros avek Zeova.—Zak 4:8.

KI KONDISYON NOU BEZWEN RANPLI?

5. Kwa ki montre ki Zeova pa ekout tou lapriyer?

5 Eski Zeova i ekout tou lapriyer? Get sa ki i ti dir bann Izraelit rebel dan letan profet Izai: “Kantmenm zot fer zot kantite lapriyer, mon pa pe ekoute; zot lanmen i plen avek disan.” (Izai 1:15) Alors serten keksoz ki nou fer i kapab fer Bondye pa ekout nou lapriyer. Pour Bondye ekout nou lapriyer, i annan serten kondisyon nou bezwen ranpli.

6. Ki sa premye kondisyon pour Bondye ekout nou lapriyer, e ki mannyer nou montre nou ranpli sa kondisyon?

6 Premye kondisyon se ki nou bezwen annan lafwa. (Mark 11:24) Zapot Pol ti ekrir: “San lafwa personn pa kapab fer plezir Bondye. Sa ki apros kot Bondye i devre krwar ki i egziste e ki i rekonpans tou bann ki rod li.” (Ebre 11:6) Annan en vre lafwa pa vedir zis konnen ki Bondye i egziste e ki i tann nou lapriyer e reponn nou. Nou aksyon i prouve si nou annan lafwa. Nou bezwen montre ki nou annan lafwa par lafason ki nou viv toulezour.—Zak 2:26.

7. (a) Akoz nou bezwen montre respe kan nou koz avek Zeova dan lapriyer? (b) Ki mannyer nou kapab montre limilite ek senserite kan nou priy Bondye?

7 Zeova i osi ekspekte nou pour priy li avek limilite ek senserite. Pa nou annan rezon pour abes nou letan nou pe koz avek Zeova? Kan en dimoun i ganny loportinite pour koz avek en minis oubyen en prezidan, i fer li avek respe, akoz i rekonnet son o pozisyon. Konbyen plis respe nou bezwen montre kan nou priy Zeova! (Psonm 138:6) Apre tou, se li ki “Bondye Tou Pwisan.” (Zenez 17:1) Kan nou priy Bondye, fason ki nou koz avek li i  bezwen montre ki nou rekonnet nou pozisyon devan li. Limilite pou osi pous nou pour priy avek senserite, dir sa ki lo nou leker, olye repet menm keksoz toulezour.—Matye 6:7, 8, NW.

8. Ki mannyer nou kapab azir an armoni avek nou lapriyer?

8 Azir an armoni avek nou lapriyer i en lot kondisyon pour Bondye ekout nou lapriyer. Zeova i ekspekte nou fer nou par pour realiz sa ki nou demande. Par egzanp, si nou priye, “Donn nou sak zour nou dipen,” nou bezwen fer zefor pour fer nenport ki travay nou gannyen. (Matye 6:11; 2 Tesalonisyen 3:10) Si nou demann led dan lapriyer pour sirmont en febles, nou bezwen fer sir nou evit okenn sitiasyon ki kapab fer nou ganny tante. (Kolosyen 3:5) Apard sa bann kondisyon, i annan lezot kestyon konsernan lapriyer ki nou bezwen konn son larepons.

REPONN SERTEN KESTYON LO LAPRIYER

9. Avek ki nou devret priye, e atraver ki?

9 Avek ki nou devret priye? Zezi ti ansenny son bann disip pour priy avek “nou Papa ki dan lesyel.” (Matye 6:9) Alors nou lapriyer i bezwen ganny adrese zis avek Zeova. Me Zeova i oule nou rekonnet pozisyon son sel Garson, Zezi Kri. Parey nou ti vwar dan Sapit 5, Zezi ti ganny anvoye lo later konman en pri pour sov nou dan pese ek lanmor. (Zan 3:16; Romen 5:12) I’n ganny apwente konman Gran Pret ek Ziz. (Zan 5:22; Ebre 6:20) Se pour sa ki Labib i demann nou pour ofer nou lapriyer atraver Zezi. Zezi li menm ti dir: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6) Pour Zeova ekout nou lapriyer, nou bezwen priy zis avek li atraver son Garson.

10. Akoz nou pa bezwen pozisyonn nou dan okenn fason spesifik ler nou priye?

 10 Eski nou devret pozisyonn nou dan en fason spesifik pour priye? Non. Zeova pa demann nou pour pozisyonn nou dan okenn fason spesifik, ni met nou lanmen dan en serten fason letan nou priye. Labib i fer vwar ki i annan plizyer fason nou kapab pozisyonn nou ler nou priye. Nou kapab asize, prosternen, azenou, e debout. (1 Kronik 17:16; Neemya 8:6; Danyel 6:10; Mark 11:25) Sa ki vreman enportan se pa en pozisyon spesyal ki lezot i kapab vwar, me en bon latitid. Nou menm kapab fer en lapriyer an silans partou kot nou ete, petet pandan ki nou pe fer serten keksoz dan lazournen oubyen ler nou dan en danze. Zeova i tann bann lapriyer koumsa, menm si petet lezot otour nou pa ni menm remarke nou pe priye.—Neemya 2:1-6.

11. Nonm serten keksoz personnel ki nou kapab priy lo la.

11 Lo ki nou kapab priye? Labib i dir: “Si nou demann keksoz dapre son lavolonte, [Zeova] pou ekout nou.” (1 Zan 5:14) Alors nou kapab priy pour nenport keksoz ki an akor avek lavolonte Bondye. Eski i son lavolonte pour priy konsernan nou problenm personnel? Byensir! Priy Zeova i parey ler nou pe koz avek en zanmi pros. Nou kapab koz fran, e ‘devid nou leker’ avek Bondye. (Psonm 62:8) I byen pour nou demann li son lespri sen, akoz i pou ed nou fer sa ki byen. (Lik 11:13) Nou kapab osi demann li gidans pour fer bann bon desizyon e lafors pour fer fas avek bann difikilte. (Zak 1:5) Nou devret demann pardon ler nou fer pese, vi ki Kris in mor pour nou. (Efezyen 1:3, 7) Me nou pa devret priy zis lo nou bann keksoz personnel. Nou devret enkli lezot dimoun osi dan nou lapriyer. Par egzanp, nou fanmiy e osi nou bann frer ek ser Kretyen.—Akt 12:5; Kolosyen 4:12.

12. Ki mannyer nou kapab donn Zeova plas pli enportan dan nou lapriyer?

 12 Bann keksoz konsernan Zeova i devret ganny premye plas dan nou lapriyer. Nou annan tou rezon pour loue e remersye li senserman pour tou bann bon keksoz ki i fer pour nou. (1 Kronik 29:10-13) Zezi ti donn en model lapriyer, ki trouve dan Matye 6:9-13. Dan sa lapriyer, i ti ansenny nou pour priye ki non sen Bondye i ganny glorifye, savedir ki lezot i vwar li konman en keksoz sakre oubyen sen. Apre, i ti demande ki Rwayonm Bondye i ganny etabli e son lavolonte i ganny akonpli lo later parey dan lesyel. Selman apre ki i ti’n mansyonn sa bann topik enportan konsernan Zeova ki Zezi ti koz lo bann keksoz personnel. Si nou fer parey nou osi, savedir nou donn Bondye plas pli enportan dan nou lapriyer, nou montre ki nou pa zis enterese avek nou byennet.

13. Ki Labib i dir konsernan grander nou lapriyer?

13 Ki grander nou lapriyer i devret ete? Labib pa met okenn restriksyon lo grander nou lapriyer personnel ouswa lo lapriyer ki ganny fer pour en group dimoun. En lapriyer i kapab kourt parey nou lapriyer ki nou fer avan manze, ouswa i kapab long parey ler nou pe devid nou leker avek Zeova. (1 Samyel 1:12, 15) Parkont, Zezi ti repros bann dimoun ki ti krwar zot pli byen ki lezot, ki ti fer bann gran gran lapriyer zis pour fer lezot vwar. (Lik 20:46, 47) Sa bann kalite lapriyer pa enpresyonn Zeova. Sa ki enportan se ki nou dir sa ki lo nou leker. Alor, grander en lapriyer i varye, depandan lo nou bezwen ek sirkonstans.

Zeova i tann ou lapriyer nenport ki ler

14. Ki Labib i oule dir ler i ankouraz nou pour “priye tou letan,” e akoz sa i rekonfort nou?

14 Ki kantite fwa nou devret priye? Labib i ankouraz nou pour “touzour priye,” e pour “priye tou letan.” (Lik  18:1; Romen 12:12; 1 Tesalonisyen 5:17) Me sa pa vedir ki nou bezwen priy Zeova toudilon lazournen. Plito, Labib pe ankouraz nou pour priye regilyerman, pour kontinyen remersye Zeova pour son labonte anver nou e pour rod son gidans, rekonfor, ek lafors. Pa i rekonfort nou pour konnen ki Zeova pa met okenn restriksyon lo grander nou lapriyer oubyen kantite fwa ki nou koz avek li? Si nou vreman apresye sa privilez ki nou annan pour priye, nou pou vwar bokou loportinite pour priy nou Papa dan lesyel.

15. Akoz nou devret dir “Amenn” alafen sak lapriyer personnel oubyen lapriyer ki ganny ofer pour en group?

15 Akoz nou devret dir “Amenn” alafen sak lapriyer? Sa mo “amenn” i vedir “sirman” oubyen “dakor.” Bann legzanp dan Labib i montre ki i apropriye pour dir “Amenn” kan nou fini nou lapriyer personnel oubyen apre en lapriyer in ganny ofer pour en group dimoun. (1 Kronik 16:36; Psonm 41:13) Ler nou dir “Amenn” alafen nou prop lapriyer, nou montre ki nou senser dan sa ki nou’n dir. Kan nou dir “Amenn” dousman oubyen for alafen en lapriyer ki’n ganny ofer pour en group dimoun, nou montre ki nou dakor avek sa ki’n ganny dir dan sa lapriyer.—1 Korentyen 14:16.

KI MANNYER BONDYE I REPONN NOU LAPRIYER

16. Ki konfyans nou kapab annan an rapor avek lapriyer?

16 Eski Zeova i vreman reponn lapriyer? Wi, i reponn! Nou annan bon rezon pour vreman krwar ki Zeova, “ki ekout lapriyer,” i reponn lapriyer senser bann dimoun. (Psonm 65:2) Larepons Zeova pour nou lapriyer i kapab vin dan diferan fason.

17. Akoz nou kapab dir ki Bondye i servi son bann lanz ek serviter lo later pour reponn nou lapriyer?

17 Zeova i servi son bann lanz ek son bann serviter  lo later pour reponn nou lapriyer. (Ebre 1:13, 14) I annan bokou leksperyans kot bann dimoun ti priy Bondye pour ed zot konpran Labib e en pti moman apre bann serviter Zeova ti kontakte zot. Sa bann leksperyans i montre ki bann lanz pe diriz sa travay pour pres lo Rwayonm Bondye. (Revelasyon 14:6) Pour reponn nou lapriyer, Zeova i kapab fer en Kretyen ed nou dan en moman kot nou vreman dan bezwen.—Proverb 12:25; Zak 2:16.

Konman en larepons pour nou lapriyer, Zeova i kapab fer en Kretyen ed nou

18. Ki mannyer Zeova i servi son lespri sen ek son Parol pour reponn lapriyer son bann serviter?

 18 Zeova i osi servi son lespri sen ek son Parol, Labib, pour reponn lapriyer son bann serviter. I kapab reponn nou ler nou demann li led pour fer fas avek bann difikilte par donn nou gidans ek lafors atraver son lespri sen. (2 Korentyen 4:7) Souvannfwa ler nou demann Zeova gidans, nou trouv larepons nou lapriyer dan Labib kot Zeova i ed nou fer bann bon desizyon. Nou kapab trouv bann bon pasaz Labib ler nou pe fer nou letid personnel oubyen ler nou pe lir bann piblikasyon Kretyen, parey sa liv. En komanter dan renyon oubyen en remark fer par en ansyen ki enterese avek nou byennet, i kapab atir nou latansyon lo bann pwen dan Labib ki merit en bon refleksyon.—Galat 6:1.

19. Ki nou devret gard antet si parler nou lapriyer pa paret pe ganny reponn?

19 Si i paret ki Zeova pe tarde reponn nou lapriyer, sa pa zanmen vedir ki i pa kapab reponn nou. Annou pa bliye ki Zeova i reponn lapriyer ki an akor avek son lavolonte e dan son letan ki li i vwar apropriye. I konn sa ki nou bezwen e i konnen konman pour pran swen avek nou, plis ki nou. Souvannfwa i les nou ‘kontinyen demande, rode, e frape.’ (Lik 11:5-10) Ler nou persevere  koumsa, i montre Bondye ki nou vreman anvi sa keksoz e nou annan en vre lafwa. Deplis, Zeova i kapab reponn nou lapriyer dan en fason ki pa evidan pour nou. Par egzanp, ler nou priy konsernan en serten difikilte ki nou pe pas ladan, i kapab reponn par donn nou lafors pour siporte, me pa par retir sa difikilte net.—Filipyen 4:13.

20. Akoz nou devret profit byen sa privilez pour priye?

20 Pa nou rekonesan ki Kreater liniver i pros avek tou bann ki kriy li dan lapriyer! (Psonm 145:18) I en gran loner pour koz avek Zeova. Alor annou profit byen sa privilez. Si nou fer sa, nou pou vin pli pros avek Zeova, ki ekout lapriyer, e nou pou ere.