Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ki Labib i vreman dir?

 LEZOT LENFORMASYON

Kisisa Zour Zizman?

Kisisa Zour Zizman?

KWA ki vin dan ou lespri ler ou tann Zour Zizman? Bokou dimoun i krwar nou tou nou pou ganny anmennen devan tronn Bondye, enn par enn, e nou pou ganny zize. Serten pou ganny rekonpanse pour al viv dan lesyel, e lezot pou ganny tourmante dan lanfer. Me Labib li menm pa dir tousala. Parol Bondye pa dekrir Zour Zizman konman en moman efreyan, me plito konman en moman lespwar kot tou keksoz pou revin parey avan.

Dan Revelasyon 20:11, 12, nou lir konman zapot Zan i dekrir Zour Zizman: “Mon ti war en gran tronn blan avek sa enn ki ti pe asiz lo la. Later ek lesyel ti disparet devan li e pa ti war zot ankor. E mon ti war bann mor gran konman pti, pe debout devan tronn, e bann liv ti’n ouver. Ti annan osi en lot liv ti’n ouver: liv lavi. Bann mor ti ganny zize dapre sa ki zot ti’n fer, e ki ti’n ganny ekri dan sa bann liv.” Lekel sa Ziz ki ganny dekrir la?

Zeova i sef Ziz limanite. Me i pa fer sa travay li menm. Dapre Akt 17:31, zapot Pol ti dir ki Bondye in “fikse en zour pour li ziz lemonn antye avek lazistis, par en zonm ki i’n swazir.” Sa Ziz ki i’n swazir i Zezi Kri apre ki i ti resisite. (Zan 5:22) Me kan Zour Zizman pou konmanse? Pour konbyen letan i pou dire?

 Liv Revelasyon i montre ki Zour Zizman i konmans apre lager Armagedon, ler sa lemonn Satan pou ganny detrir. * (Revelasyon 16:14, 16; 19:19–20:3) Apre Armagedon, Satan ek son bann demon pou ganny anprizonnen dan en labim pour mil an. Pandan sa letan, sa 144,000 zeritye dan lesyel pou vin ziz e pou “renny avek Kris pandan 1000 an.” (Revelasyon 14:1-3; 20:1-4; Romen 8:17) Zour Zizman pa en levennman ki pou pas vitman dan en lespas 24 er-d-tan. I pou ale pour mil an.

Pandan sa mil an, Zezi Kri pou “ziz bann vivan ek bann mor.” (2 Timote 4:1) Bann “vivan” pou sa “gran lafoul” ki pou sirviv Armagedon. (Revelasyon 7:9-17) Zapot Zan ti osi vwar “bann mor . . . pe debout devan tronn” pour ganny zize. Parey Zezi ti promet, “bann mor ki dan tonbo pou tann lavwa [Kris], e zot pou sorti,” savedir zot pou resisite. (Zan 5:28, 29; Akt 24:15) Me dapre ki keksoz tou sa bann dimoun pou ganny zize?

Dapre vizyon ki zapot Zan ti gannyen, “bann liv ti’n ouver,” e “bann mor ti ganny zize dapre sa ki zot ti’n fer, e ki ti’n ganny ekri dan sa bann liv.” Eski dan sa bann liv ti annan sa ki bann dimoun ti’n fer dan lepase? Non, sa zizman pa pou baze lo sa ki bann dimoun ti fer avan zot ti mor. Ki mannyer nou konn sa? Labib i dir en dimoun ki’n mor in ganny libere avek son pese. (Romen 6:7) Bann ki resisite i reganny lavi avek en rikord prop. Alor sa liv i bezwen pe reprezant lezot keksoz ki Bondye pou demann nou pour fer. Pour viv pour touzour, bann dimoun ki pou sirviv Armagedon ek bann ki pou resisite pou bezwen obeir komannman Bondye, enkli bann nouvo keksoz ki Zeova pou ekspekte nou fer pandan sa mil an. Alor, dimoun pou ganny zize dapre sa ki zot fer pandan Zour Zizman.

 Pandan Zour Zizman, plizyer bilyon dimoun pou ganny loportinite pour aprann konsernan lavolonte Bondye pour premye fwa e pour fer li. Savedir en travay edikasyonnel pou ganny fer lo en gran lesel. Wi, “se ladrwatir ki bann zabitan later pou vreman aprann.” (Izai 26:9) Me pa tou dimoun ki pou anvi fer lavolonte Bondye. Izai 26:10 i dir: “Menm si en dimoun mesan i a ganny faver, i pa pou zanmen aprann ladrwatir. Dan pei ladrwatir i pa pou fer sa ki drwat e i pa pou vwar konman Zeova i gran.” Sa bann move dimoun pou ganny detri pandan Zour Zizman.—Izai 65:20.

Alafen Zour Zizman, bann dimoun ki pou reste vivan pou viv sa kalite lavi ki bann imen parfe i sipoze viv. (Revelasyon 20:5) Alor pandan Zour Zizman, imen pou retourn dan son leta parfe parey ti ete okonmansman. (1 Korentyen 15:24-28) Apre pou annan en dernyen test. Satan pou ganny large e i pou sey trenn bann dimoun avek li pour en dernyen fwa. (Revelasyon 20:3, 7-10) Bann ki reziste li pou vwar sa promes Labib ganny akonpli konpletman: “Bann dimoun drwat pou posed later, e zot pou reste lo la pour touzour.” (Psonm 37:29) Wi, Zour Zizman pou vin en benediksyon pour tou sa ki reste fidel!

^ par. 1 Konsernan Armagedon, silvouple vwar Étude perspicace des Écritures, Volim 1, paz 594-5 ek paz 1037-8 an Angle, paz 63-4 ek paz 1073-75 an Franse. Vwar osi liv Ador sa sel vre Bondye sapit 20. Tou le de pibliye par Temwen Zeova.