Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ou fanmir i kapab ere

 SEKSYON 6

Konman larive en pti baba i sanz maryaz

Konman larive en pti baba i sanz maryaz

“Bann garson i en leritaz sorti kot Zeova.”Psonm 127:3

Nesans en pti baba i kapab eksitan me an menn tan i kapab met bokou presyon lo en koup. Konman en nouvo paran, ou pou etonnen pour vwar ki tou ou letan ek lenerzi pou al dan pran swen avek ou pti baba. Mankman sonmey ek bann sanzman emosyonnel i kapab met serten presyon dan ou relasyon. Ou avek ou konzwen pou bezwen fer bann azisteman pour pran swen avek ou pti baba e osi prezerv ou maryaz. Ki mannyer konsey Labib i kapab ed ou fer fas avek sa sityasyon?

 1 KONPRAN KI MANNYER EN PTI BABA I SANZ OU LAVI

KI LABIB I DIR: “Lanmour i pasyan e i bon.” Osi lanmour “pa rod son prop lentere; i pa pran lakoler.” (1 Korentyen 13:4, 5) I normal pour en nouvo manman donn plis latansyon son pti baba. Me ou msye i kapab santi i pe ganny neglize, alor pa oubliye ki li osi i bezwen ou latansyon. Avek pasyans ek labonte, ou pou kapab fer li santi ki ou ankor bezwen li e ou pou enplik li ler ou pe okip sa zanfan.

“Zot osi bann msye, zot devre viv dan larmoni sakenn avek son madanm.” (1 Pyer 3:7) Konpran ki ou madanm pou bezwen pas plis letan avek ou pti baba. I annan bann nouvo responsabilite e i kapab strese, fatige e menm parfwa tonm dan en depresyon. Parfwa, i kapab ankoler avek ou me esey reste kalm akoz ‘vomye en zonm ki pa ankoler vitman ki en zonm for.’ (Proverb 16:32) Demontre bon zizman e donn li sa sipor ki i bezwen.Proverb 14:29.

KI OU KAPAB FER:

  • Bann papa: Ed ou madanm pour pran swen avek zot pti baba, menm aswar. Redwir lakantite letan ki ou pase dan lezot aktivite pour ou kapab pas plis letan avek ou madanm ek ou pti baba.

  • Bann manman: Kan ou msye i ofer pour ed ou avek ou pti baba, aksepte son led. Si i pa fer li byen, pa kritik li me zantiman montre li ki mannyer pour fer li.

 2 RANFORSI OU RELASYON

KI LABIB I DIR: “Zot devret vin en sel laser.” (Zenez 2:24) Menm si ou annan en nouvo manm dan ou fanmir, pa bliye ki ou ek ou konzwen zot ankor en “sel laser.” Fer tou zefor posib pour gard ou relasyon for.

Madanm, apresye led ek sipor ou msye. Kan ou eksprim ou lapresyasyon sa i kapab vin “en gerizon.” (Proverb 12:18) Msye, dir ou madanm ki kantite ou kontan li e apresye li. Felisit li pour lafason ki i pran swen avek lafanmir.Proverb 31:10, 28.

“Personn pa devret rod son prop lentere, me lentere son prosen.” (1 Korentyen 10:24) Toultan fer sa ki pli bon pour ou konzwen. Konman en koup, pran letan pour koze, ekoute e felisit kanmarad. Pa mazin zis ou lekor lo kote relasyon seksyel. Pran an konsiderasyon bezwen ou konzwen. Labib i dir: “Pa bezwen priv kanmarad amwen ki par konsantman kanmarad.” (1 Korentyen 7:3-5) Alor, diskit onnetman lo sa topik ansanm. Ou pasyans ek konprenezon pou ranforsi ou relasyon.

KI OU KAPAB FER:

  • Pa oubliye fer letan zis pour zot de

  • Fer bann pti keksoz ki fer ou konzwen vwar ki ou kontan li, tel parey ekri li en pti mo oubyen donn li en pti kado

 3 ANSENNY OU PTI BABA

KI LABIB I DIR: “Depi ou lanfans ou konn Lekritir sakre, ki kapab donn ou lasazes ki kondir dan lavi eternel.” (2 Timote 3:15) Plàn sa ki ou pou fer pour ansenny ou pti baba. I annan en abilite enkrwayab pour aprann menm avan i ne. Ou pti baba i kapab rekonnet ou lavwa e reazir dapre ou lemosyon kan i ankor dan ou vant. Lir avek li kan i ankor en pti baba. Kantmenm i pa konpran sa ki ou pe lir, ler i pli gran sa i kapab ed li pour kontan lir.

Ou baba pa zanmen tro pti pour ekout ou koz lo Bondye. Les li ekout ou ler ou pe koz avek Zeova. (Deterononm 11:19) Menm kan ou pe zwe avek li, koz lo bann keksoz ki Bondye in fer. (Psonm 78:3, 4) Anmezir ki ou zanfan i grandir, i pou santi lanmour ki ou annan pour Zeova e i pou aprann kontan Li li osi.

KI OU KAPAB FER:

  • Priye pour ganny lasazes pour ansenny ou pti baba

  • Repet bann mo ek nide kle avek ou pti baba pour ki i konmans aprann byen boner