Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ekout sa Gran Ansennyan

 SAPIT 17

Sa ki fer nou zwaye

Sa ki fer nou zwaye

Akoz Zeova i en ‘Bondye ki zwaye’?

NOU tou nou ti a kontan zwaye, pa i vre?— Me napa bokou dimoun ki vreman santi zot zwaye. Ou konnen akoz?— Akoz zot pa konnen kwa ki fer en dimoun zwaye. Zot krwar ler zot ganny en kantite keksoz, sa pou fer zot zwaye. Me kan zot ganny sa bann keksoz, zot lazwa pa dir pour lontan.

Alor kwa ki kapab fer nou zwaye? Sa Gran Ansennyan ti dir: “I annan plis lazwa pour donnen ki pour resevwar.” (Akt 20:35) Alors, ki fodre nou fer pour nou zwaye?— Nou bezwen donn keksoz lezot e fer keksoz pour zot. Ou ti konn sa ou?—

Annou reflesir lo sa. Eski Zezi ti dir en dimoun pa kontan ler i ganny en kado?— Non, i pa ti dir sa. Pa ou kontan ler ou  ganny en kado?— Tou dimoun i kontan. Nou kontan ler nou ganny bann zoli keksoz.

Me Zezi ti dir i annan plis lazwa ler nou donnen. Lekel ki’n donn plis keksoz lezot ki okenn dimoun?— Zeova.

Labib i dir ki Bondye in “donn tou dimoun, lavi, respirasyon ek tou keksoz.” I osi donn nou lapli ek soley pour ki bann plant i grandi e nou ganny keksoz pour manze. (Akt 14:17; 17:25) Sanmenm Labib i dir ki Zeova i en ‘Bondye ki zwaye’! (1 Timote 1:11, NW) Bondye i zwaye akoz i donn keksoz lezot. Ler nou donnen nou osi nou kapab santi nou zwaye.

Kwa ki pou fer ou pli zwaye olye manz tou ou gato ou menm?

Be ki nou kapab donn lezot dimoun? Ki ou dir ou?— Parfwa en kado i kout larzan. Si ou al rod en kado laboutik, ou pou bezwen peye. Alor si ou anvi donn sa kalite kado, petet ou bezwen anmas ou larzan ziska ou annan ase pour aste sa kado.

Me pa tou kado ki nou bezwen al aste laboutik. Par egzanp, kan i fer so, i demann bwar en bon ver delo fre. Alor kan ou donn en dimoun ki swaf en ver delo fre, i konmsi ou pe donn li en kado. Ou ganny sa lazwa akoz ou’n donnen.

Petet en zour ou pou kapab fer bann pti gato ansanm avek ou manman. I gou fer sa. Me ki ou kapab fer avek ou gato ki pou fer ou pli zwaye olye manz tou ou tousel?— Wi, ou kapab donn en pe ou zanmi. Ou ti a kontan fer sa en zour?—

Sa Gran Ansennyan ek son bann zapot, zot tou zot ti trouv  lazwa kan zot ti donnen. Ou konnen ki zot ti donn lezot dimoun?— Zot ti donn sa pli bon keksoz ki i annan dan lemonn! Zot ti konn laverite lo Bondye, e zot ti kontan pour partaz li avek lezot. Zot ti fer sa gratwit, san aksepte okenn larzan avek personn.

En zour zapot Pol ek son bon zanmi, Lik, ti zwenn en madanm ki ti anvi li osi trouv sa lazwa pour donnen. Zot ti zwenn li obor en larivyer. Pol ek Lik ti al laba akoz zot ti’n tande ki laba ti en landrwa lapriyer. Vre letan zot ti ariv laba, zot ti vwar detrwa madanm la pe priye.

Pol ti konmans koz avek sa bann madanm lo sa bon nouvel konsernan Zeova ek son Rwayonm. Enn parmi zot ti apel Lidi, e i ti byen ekoute. Apre, Lidi ti anvi fer en keksoz pour montre ki i ti vreman kontan sa bon nouvel ki i ti’n tande. I ti sipliy avek Pol ek Lik: “Si zot in aksepte ki mon’n vreman krwar dan Senyer, vin reste kot mwan.” I ti fer zot aksepte son lenvitasyon pour vin kot li.—Akt 16:13-15.

Ki Lidi pe dir Pol ek Lik?

Lidi ti kontan pour sa bann serviter Bondye vin kot li. I ti kontan zot akoz zot ti’n ed li konn Zeova ek Zezi e osi konnen ki i devret fer pour viv pour touzour. I ti kontan pour donn Pol ek Lik en keksoz pour manze ek en landrwa pour reste. Lidi ti zwaye akoz i ti vreman anvi donnen. Sa i en keksoz ki nou pa devret oubliye. En zour, en dimoun i kapab demann ou pour donn en kado en lot dimoun. Si ou pa vreman anvi fer li, ou pa pou ganny sa lazwa ler ou donn sa kado.

Akoz Lidi i kontan pour envit Pol ek Lik kot li?

Par egzanp, fer konmsi ou annan en pe draze e ou anvi manz tou ou tousel. Mon dir ou partaze avek en lot manrmay. Eski ou pou kontan pour donn ou draze?— Aprezan, fer konmsi ou’n zwenn enn ou zanmi ki ou pli kontan. Ou anvi partaz ou draze  avek li, san ki personn i dir ou fer li. Pa ou pou santi ou zwaye apre ki ou’n fer sa?—

Parfwa, telman nou kontan en dimoun nou anvi donn li tou sa ki nou annan e pa kit nanryen pour nou. Koumsa ki nou devret santi anver Zeova si nou kontan li bokou.

Akoz sa madanm mizer ti kontan pour donn tou sa ki i ti annan?

Sa Gran Ansennyan ti konn en madanm mizer ki ti koumsa. I ti vwar li dan tanp Zerizalenm. I ti annan zis de pti pyes larzan, se tou ki i ti annan. Me i ti met tou dan bwat konman en kontribisyon oubyen kado pour tanp. Napa personn ki ti demann li pour fer sa. Laplipar dimoun dan tanp pa ti ni menm konnen si i ti’n fer sa. I ti fer sa akoz i ti anvi e akoz i ti vreman kontan Zeova. I ti santi li zwaye akoz i ti’n kapab donn en keksoz.Lik 21:1-4.

I annan plizyer fason nou kapab donnen. Ou kapab mazin serten fason?— Si nou donnen akoz nou vreman anvi, nou pou santi nou zwaye. Pour sa rezon sa Gran Ansennyan i dir nou: “Donnen.” (Lik 6:38) Si nou donnen, nou pou fer lezot dimoun zwaye. Me nou nou pou pli zwaye ankor!

Annou lir lezot pasaz lo ki mannyer nou santi nou zwaye ler nou donnen: Matye 6:1-4; Lik 14:12-14; ek 2 Korentyen 9:7.