Skip to content

Al lo konteni

 SAPIT 16

Sa ki vreman enportan

Sa ki vreman enportan

Ki problenm sa zonm ti annan?

EN ZOUR en zonm ti vin vwar Zezi. I ti konnen Zezi i entelizan, alors i ti dir: ‘Met, dir mon frer donn mwan en pe son bann keksoz.’ Sa zonm ti krwar i devret ganny en pe sa bann keksoz.

Si ou ti Zezi, ki ou ti pou dir li?— Zezi ti vwar ki sa zonm i annan en problenm. I pa ti bezwen sa ki son frer ti annan. Me i pa ti konnen kwa ki vreman enportan dan lavi. Sa ki ti son problenm.

Annou reflesir en kou lo sa. Kwa ki devret pli enportan pour nou? Annan bann zoli zouzou ek lenz nef?—Non. I annan en keksoz ki bokou pli enportan. Sa i en leson ki Zezi ti anvi ansenny dimoun. Alors i ti rakont en zistwar konsernan en zonm ki ti bliye si i annan Bondye. Ou ti a kontan tann sa zistwar?—

Ti annan en zonm ki ti tre ris. I ti annan bokou plantasyon ek bann gran stor. Son plantasyon ti raport bokou. Ti napa ase lespas dan son bann stor pour anmas tou son rekolt. Ki i ti pou fer? I ti dir dan li menm: ‘Mon a kas mon bann stor e mon a fer bann pli gran. Apre mon a met tou mon bann prodwi ek tou mon bann bon keksoz dan sa bann nouvo stor.’

 Sa zonm ris ti krwar sa ti pli bon keksoz pour li fer. I ti krwar i malen akoz i ti anmas en kantite keksoz. I ti dir dan li menm: ‘Mon’n anmas bokou bon keksoz. Sa pou fer mwan bokou bokou lannen. Aprezan mon kapab relaks. Mon a manze, bwar, e fer mon lekor kontan.’ Me fason ki i ti pe get keksoz pa ti bon. Ou konnen akoz?— I ti pe mazin zis son lekor ek sa ki i kontan. I ti’n bliy Bondye.

Ki sa zonm ris pe mazinen?

Alors Bondye ti koz avek sa zonm ris. I ti dir: ‘Get ki mannyer ou bet. Tanto menm ou pou mor. Lekel ki pou ganny tou sa bann keksoz ki ou’n anmase?’ Eski sa zonm ris ti pou servi sa bann keksoz apre ki i’n mor?— Non, en lot dimoun ki ti pou ganny tousala. Zezi ti dir: “La sa ki arive avek en dimoun ki ranmas en trezor pour limenm, me ki pa ris devan Bondye.”Lik 12:13-21.

Ou pa anvi vin parey sa zonm ris ou, non?— Sa ki i ti pli anvi  dan lavi se ganny plis keksoz. Sa ti en gran fot. I ti toultan anvi plis. Me i pa ti “ris devan Bondye.”

Bokou dimoun i parey sa zonm ris. Zot toultan anvi plis. Me sa i kapab anmenn bann gro problenm. Annou pran en legzanp. Pa ou annan zouzou ou?— Dir mwan bann zouzou ki ou annan.— Be si enn ou zanmi i annan en boul oubyen en poupet ki ou napa? I pou byen pour ou fer ou paran aste enn pour ou osi?—

Parfwa ou kapab krwar en zouzou i tre enportan. Me ki i arive avek sa zouzou apre en pe letan?— I vin vye. I kapab kase osi e apre ou nepli anvi zwe avek li ankor. Ou konnen, ou annan en keksoz ki bokou pli presye ki zouzou. Ou konnen kwa?—

Ki ou annan ki pli enportan ki zouzou?

Ou lavi. Ou lavi i tre enportan akoz san lavi, ou pa kapab fer nanryen. Me ou lavi i depan lo fer plezir Bondye, pa i vre?— Alors annou pa fer nou bet parey sa zonm ris ki ti bliy Bondye.

 Pa zis bann zanfan ki kapab fer bann keksoz bet parey sa zonm ris. Bokou gran dimoun i fer sa. I annan dimoun ki toultan anvi ganny plis ki zot annan. Zot annan manze, lenz pour mete, e en landrwa pour reste. Me zot anvi plis ankor. Zot anvi en ta lenz. Zot anvi en pli gro lakaz. Me sa bann keksoz i kout bokou larzan. Alors zot bezwen travay dir pour ganny en kantite larzan. E pli zot ganny larzan, zot anvi plis keksoz ankor.

Serten dimoun i telman pe rod fason pour ganny larzan ki zot napa letan pour pas avek zot fanmiy. Deplis, zot napa letan pour Bondye. Eski zot larzan i kapab kit zot vivan?— Non. Eski zot kapab servi zot larzan apre ki zot in mor?— Non. Akoz ler ou mor, ou pa kapab fer nanryen.Eklezyast 9:5, 10.

Eski sa i vedir ki i mal pour annan larzan?— Non. Nou kapab servi larzan pour aste manze ek lenz. Labib i dir larzan i en proteksyon. (Eklezyast 7:12) Me si nou kontan larzan, la nou pou ganny problenm. Nou pou bet parey sa zonm ris ki ti anmas bokou trezor pour li me ki pa ti ris devan Bondye.

Ki savedir ris devan Bondye?— Savedir met Bondye premye dan nou lavi. I annan dimoun ki dir zot krwar dan Bondye. Zot krwar sa i ase. Me eski zot vreman ris devan Bondye?— Non, zot parey sa zonm ris ki ti bliy Bondye.

Zanmen Zezi ti bliy son Papa dan lesyel. I pa ti sey rod en ta larzan. E i ti napa bokou keksoz. Zezi ti konnen kwa ki vreman enportan dan lavi. Be ou, ou konnen kwa ki vreman enportan?— Ris devan Bondye.

Ki sa pti fiy pe fer ki vreman enportan?

Dir mwan, ki mannyer nou kapab ris devan Bondye?— Nou kapab ris devan Bondye par fer sa ki fer li plezir. Zezi ti dir: “Mon touzour fer sa ki fer li plezir.” (Zan 8:29) Bondye i kontan  ler nou fer bann keksoz ki i anvi nou fer. Aprezan dir mwan, ki bann keksoz ou kapab fer pour fer Bondye plezir?— Ou kapab lir Labib, al renyon, priye, e ed lezot pour aprann konn Bondye. Sa i bann keksoz ki vreman enportan dan lavi.

Zeova ti pran swen avek Zezi akoz i ti ris devan li. I ti donn Zezi en rekonpans. Sa i lavi pour touzour. Si nou fer parey Zezi, Zeova pou kontan nou e pran swen avek nou osi. Alors annou fer parey Zezi e pa zanmen vin parey sa zonm ris ki ti bliy Bondye.

La detrwa teks Labib ki montre sa bon fason ki nou devret vwar keksoz materyel: Proverb 23:4; 28:20; 1 Timote 6:6-10; ek Ebre 13:5.