ESKI en dimoun in deza tant ou pour fer en keksoz mal?— Dwatet i ti sikann ou e dir ou per pour fer sa keksoz. Oubyen petet i ti dir sa keksoz i gou fer e napa nanryen mal avek, non?— Ler en dimoun i fer sa avek nou, i pe sey tant nou.

Ki nou devret fer ler nou ganny tante? Eski nou devret les nou ganny tante e fer sa ki mal?— Sa pa pou fer Zeova kontan. Me ou konnen lekel ki pou kontan?— Wi, Satan ki pou kontan.

Satan i lennmi Bondye e i osi nou lennmi. Nou pa kapab vwar li akoz i en lespri. Me i kapab vwar nou. En zour Satan ti koz avek Zezi, sa Gran Ansennyan, e sey tant li. Annou vwar ki Zezi ti fer. Koumsa nou ava konnen ki fodre fer ler nou ganny tante.

Ki Zezi ti konmans rapel ler i ti batize?

Zezi ti toultan anvi fer sa ki Bondye i oule. Pour montre sa, i ti batize dan Larivyer Zourden. Ti zis apre son batenm ki Satan ti sey tant Li. Labib i dir ki zour Zezi ti batize ‘lesyel ti ouver’ pour li. (Matye 3:16) Petet sa ti vedir ki aprezan Zezi ti kapab rapel bann keksoz ki i ti fer avan, ler i ti pe viv dan lesyel avek Bondye.

 Apre son batenm, Zezi ti al dan dezer pour reflesir lo sa bann keksoz ki i ti’n konmans rapel. I ti reste laba pour karant zour. Tou sa letan, Zezi pa ti manz nanryen. I ti’n bezwen lafen. Alor Satan ti profit sa moman pour tant Zezi.

Ki mannyer Dyab ti servi ros pour tant Zezi?

I ti dir Zezi: “Si ou Garson Bondye donn lord ki sa bann ros a vin dipen.” Dipen! Ti demann li zis sanmenm la! Me eski Zezi ti kapab fer sa bann ros vin dipen?— Wi, i ti kapab. Akoz? Akoz Zezi ti Garson Bondye e i ti annan pouvwar pour fer mirak.

Konmela ou ti dan plas Zezi, eski ou ti pou’n fer ros vin dipen?— Zezi ti lafen. Eski i ti pou mal si i ti fer li kantmenm zis en fwa?— Zezi ti konnen i mal pour servi son pouvwar dan sa fason. I ti’n ganny sa pouvwar pour anmenn dimoun ver Bondye, pa pour servi pour li menm.

Alor Zezi ti dir Satan sa ki’n ekrir dan Labib: “Zonm pa viv zis lo dipen tousel me lo tou parol ki sorti dan labous Bondye.” Zezi ti konnen ki fer plezir Zeova i pli enportan ki ganny manze.

Me Dyab ti sey ankor. I ti anmenn Zezi Zerizalenm e fer li debout anler lo tanp.  Apre Satan ti dir: ‘Si ou Garson Bondye, zet ou lekor anba. Parski i’n ekrir ki lanz Bondye pou protez ou.’

Akoz Satan ti dir sa?— I ti dir sa pour tant Zezi pour fer en keksoz bet. Me ankor enn fwa, Zezi pa ti ekout Satan. I ti dir: “I’n osi ekri: ‘Ou pa devre tant [Zeova] ou Bondye.’” Zezi ti konnen i mal pour teste Zeova par met son lavi an danze.

Me Satan pa ti aret lanmenm. I ti anmenn Zezi lo en montanny byen o. I ti montre li tou sa bann rwayonm, savedir bann gouvernman lo later ek zot laglwar. Apre Satan ti dir Zezi: “Mon a donn ou tousala, si ou azenou e ou ador mwan.”

Mazin sa ki Satan ti pe ofer Zezi. Eski i vre tou sa bann gouvernman imen ti pour Satan?— Si pa ti vre, Zezi ti pou’n dir. Me i pa ti dir ki sa pa vre. Savedir Satan ki pe vreman kontrol tou nasyon lo later. Labib i menm apel li “sef lemonn.”Zan 12:31.

Akoz Satan ti kapab ofer Zezi tou sa bann rwayonm?

Ki ou ti pou fer si Satan ti dir ou ador li e i a donn ou en keksoz?— Zezi ti konnen i mal pour ador Dyab kantmenm i kapab donn ou nenport kwa. Alor Zezi ti dir: ‘Sorti la ale Satan! Labib i dir Zeova ou Bondye ki ou devre adore e li tousel ki ou devre servi!’Matye 4:1-10; Lik 4:1-13.

Ki ou pou fer si ou ganny tante?

Nou osi nou ganny tante dan plizyer fason. Ou kapab dir mwan en fason ki nou ganny tante?— La en legzanp. Fer krwar manmi in fer en bon gato pour deser. I dir ou gato pou manz taler apre dezennen, alor pa touse. Me ou lafen e ou anvi manz en bout sa gato. Eski ou pou obeir ou manmi?— Satan i anvi ou dezobei li.

 Mazin Zezi. I ti lafen li osi. Me i ti konnen ki fer plezir Bondye i pli enportan ki manze. Ou montre ki ou parey Zezi ler ou fer sa ki ou manman i dir ou.

Konmela bann manrmay i donn ou en lapoud pour santi. Zot dir ou sa lapoud pou fer ou santi ou an form. I kapab ki zot pe donn ou drog. Sa lapoud i kapab fer ou malad en kantite e menm touy ou. Oubyen en dimoun  i kapab donn ou en sigaret, ki en drog li osi, e sey tant ou pour fimen. Ki ou pou fer?—

Mazin Zezi. Satan ti sey fer Zezi met son lavi an danze par dir li zet son lekor anba. Me Zezi pa ti fer li. Ki ou ti pou fer si en dimoun i sey tant ou pour fer en keksoz danzere?— Zezi pa ti ekout Satan. Ou osi ou pa devret ekout okenn dimoun ki sey fer ou fer en keksoz mal.

Akoz i mal pour servi zimaz oubyen stati pour ador Bondye?

Petet en zour ou kapab ganny demande pour ador en zimaz oubyen stati. Sa i en keksoz ki Labib i dir nou pa devret fer. (Egzod 20:4, 5) Me petet sa i form parti en seremoni kot lekol. Zot dir ou ou pa pou kapab vin lekol ankor si ou pa fer sa. Ki ou pou fer?—

I fasil pour fer sa ki byen ler tou dimoun pe fer sa ki byen. Me i kapab vreman difisil pour fer sa ki byen ler lezot pe sey fer nou fer sa ki mal. Zot kapab dir sa ki zot pe fer pa sitan mal. Me sa ki pli enportan i: Ki Bondye i dir lo la? Li ki pli konnen.

Alors, nou pa devret zanmen fer keksoz ki Bondye i dir i mal, kantmenm lezot i kapab dir sa ki zot oule. Koumsa, nou pou toultan fer Bondye kontan, e nou pa pou zanmen fer Satan kontan.

Nou kapab trouv plis lenformasyon lo konman pour anpes nou ganny tante pour fer sa ki mal dan Psonm 1:1, 2; Proverb 1:10, 11; Matye 26:41; ek 2 Timote 2:22.