Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ekout sa Gran Ansennyan

 SAPIT 15

En leson lo labonte

En leson lo labonte

ESKI i byen pour mazin an mal lo en dimoun avan nou vreman konn li?— Non. Akoz sa pou vedir ki nou pa kontan sa dimoun zis akoz i pa parey nou oubyen akoz i pa koz menm langaz avek nou.

Ou krwar i byen fer sa?— Non. I pa byen e i pa zantiy pour fer koumsa. Nou pa devret tret en dimoun dan en move fason zis akoz i pa parey nou.

Reflesir. Eski ou konn okenn dimoun ki son kouler lapo pa parey pour ou oubyen i pa koz menm langaz avek ou?— Petet ou konn serten dimoun ki diferan akoz zot in ganny en aksidan oubyen akoz zot annan en maladi. Eski ou zantiy e bon anver bann ki diferan avek ou?—

Ki mannyer nou devret tret bann ki pa parey nou?

Si nou ekout sa Gran Ansennyan, Zezi Kri, nou pou bon anver tou dimoun. Pei kot en dimoun i sorti oubyen kouler son lapo pa devret vin en problenm pour nou. I pa devret anpes nou zantiy avek sa dimoun. Kantmenm pa tou dimoun ki krwar sa, i en leson ki Zezi ti ansennyen. Annou koz lo la.

En Zwif ki pa ti tro kontan bann dimoun sorti dan lezot pei, ti vin kot Zezi e demann li, ‘Ki fodre mon fer pour viv pour touzour?’ Zezi ti konnen sa zonm ti pe sey fer li dir nou devret bon zis avek bann dimoun menm ras oubyen menm nasyonalite avek nou. Alors olye reponn sa kestyon li menm, Zezi ti demann sa zonm: ‘Ki Lalwa Bondye i dir nou devret fer?’

 Sa zonm ti reponn: ‘Fodre ou kontan Zeova ou Bondye avek tou ou leker, e kontan ou prosen parey ou menm.’ Zezi ti dir: ‘Ou’n byen reponn. Kontinyen fer tousala e ou a viv pour touzour.’

Me sa zonm li i pa ti anvi zantiy oubyen bon avek bann dimoun ki diferan avek li. Alors i ti sey rod en leskiz. I ti demann Zezi: “Lekel mon prosen?” Petet i ti anvi Zezi dir: “Ou prosen i ou bann zanmi” oubyen “Zot bann dimoun ki parey ou.” Pour reponn sa kestyon, Zezi ti rakont en zistwar lo en Zwif ek en Samariten. Ekout byen.

En zonm ti pe desann lo semen sorti lavil Zerizalenm pour al Zeriko. Sa zonm ti en Zwif. Bann voler ti atak li lo semen. Zot ti bat li e pran son larzan ek son lenz. Zot ti kit li demi mor obor semen.

En pti pe letan plitar, en pret ti desann lo sa menm semen. I ti vwar sa zonm avek tou son blesir lo li. Si ou ti dan son plas, ki ou ti pou’n fer?— Be sa pret li, i ti sanz kote semen e  kontinyen desann. I pa ti ni arete. I pa ti fer nanryen pour ed sa zonm.

Apre en lot zonm byen relizye ti desann lo sa semen li osi. I ti en Levit ki ti servi dan tanp Zerizalenm. Eski i ti arete pour ed li?— Non. I ti fer parey sa pret.

Finalman, en Samariten ti vini. Ou vwar li pe vini laba dan kontour?— I ti vwar sa Zwif la ater avek tou sa blesir lo li. Me bann Samariten ek bann Zwif, zot pa ti kontan kanmarad ditou zot. (Zan 4:9) Alors, eski sa Samariten ti les sa zonm la ater li osi? Eski i ti dir: ‘Akfer ed en Zwif? Si mwan ki ti la ater, i pa ti pou ed mwan li.’

Akoz nou kapab dir ki sa Samariten ti en bon prosen?

 Sa Samariten ti get sa zonm la ater obor semen, e i ti pran lapenn pour li. I pa ti kapab les li mor la ater. Alors i ti desann lo son bourik, apros kot sa zonm, e konmans okip son blesir. I ti vid delwil ek diven lo la pour ede geri son blesir. Apre i ti met en bann lo la.

Sa Samariten ti lev sa zonm blese dousman e met li lo son bourik. Apre zot ti desann dousman dousman lo semen ziska zot ti ariv kot en pti lotel. La sa Samariten ti lwe en landrwa pour sa zonm reste, e i ti pran byen swen avek li.

Aprezan Zezi ti demann sa zonm ki i ti pe koz avek: ‘Dapre ou, lekel parmi sa trwa zonm ki’n azir konman en bon prosen?’ Ki ou dir ou? Eski i sa pret, sa Levit, oubyen sa Samariten?—

Sa zonm ti reponn: ‘Sa zonm ki’n arete e pran swen avek sa zonm blese.’ Zezi ti dir: ‘Ou’n byen reponn. Ale, e fer parey ou osi.’Lik 10:25-37.

Pa sa i en zoli zistwar? I fer nou byen konpran lekel ki nou prosen. Zot pa zis nou bon zanmi. Zot  pa zis dimoun ki menm kouler avek nou oubyen ki koz menm langaz avek nou. Zezi ti ansenny nou pour bon avek tou dimoun, san gete kote zot sorti, ki zot parey, oubyen ki langaz zot koze.

Koumsa ki Zeova i ete. I kontan nou tou parey. Zezi ti dir: ‘Ou Papa dan lesyel i fer son soley lev lo bann move dimoun e osi lo bann bon dimoun. I fer son lapli tonm lo bann bon dimoun e osi lo move dimoun.’ Nou osi nou bezwen bon anver tou dimoun zis parey Bondye.Matye 5:44-48.

Ki mannyer ou kapab vin en bon prosen anver lezot?

Alors, si ou vwar en dimoun ki’n ganny blese, ki ou pou fer?— Be si sa dimoun i sorti dan en lot pei oubyen i pa menm kouler avek ou? Kantmenm sa, i ou prosen e ou devret ed li. Si ou tro pti pour ed li, demann led en dimoun pli gran ki ou. Oubyen ou kapab demann led en gard oubyen en mis lekol. Si ou fer sa, ou pou parey sa zonm Samariten.

Sa Gran Ansennyan i anvi nou bon avek lezot. I anvi nou ed lezot, san gete ki zot ete. Sanmenm sa i ti rakont sa zistwar lo sa bon Samariten.

Konsernan vin bon avek dimoun san get zot ras oubyen nasyonalite, lir Proverb 19:22; Akt 10:34, 35; ek 17:26.