Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ekout sa Gran Ansennyan

 SAPIT 47

Ki mannyer nou konnen Armagedon i pros?

Ki mannyer nou konnen Armagedon i pros?

OU KONNEN kisisa en siny?—Dan Sapit 46, nou ti vwar sa siny ki Bondye ti donnen pour montre ki i pa pou zanmen detrir lemonn par en deliz ankor. Bann zapot Zezi osi ti demann en siny pour zot konnen kan Zezi pou retournen e kan lafen sa lemonn pou arive.Matye 24:3.

Ler Zezi ti pou konmans dirize dan lesyel, bann dimoun lo later pa ti pou kapab vwar li. Zot ti bezwen en siny pour zot konnen kan i konmans dirize. Alors Zezi ti dir son bann disip vey serten keksoz ki ti pou arive isi lo later. Ler sa bann keksoz i arive, savedir i’n retournen e i’n konmans dirize konman Lerwa dan lesyel.

Zezi ti montre son bann disip ki i tre enportan pour zot  veye. I ti dir zot: “Get pye fig, ek tou lezot pye dibwa. De ki zot in reganny fey, zot war e zot konnen zotmenm ki lete [oubyen lasezon] i deza pros.” Nou konnen kan lasezon en fri i pros. Be i parey avek Armagedon. Nou konnen i pros, ler nou vwar sa bann keksoz ki Zezi ti koz lo la.Lik 21:29, 30.

Ki leson Zezi ti pe ansennyen ler i ti koz lo pye fig?

Bann portre lo sa paz ek sa enn deryer, i montre bann keksoz ki Zezi ti dir pou form parti sa siny ki endik nou ki Rwayonm  Bondye i pros. Kan tou sa bann keksoz i arive, Rwayonm Bondye avek Kris konman Lerwa pou kraz tou lezot gouvernman, parey nou ti vwar dan Sapit 46.

Get byen bann portre lo sa de paz, nou pou koz lo la. Dan Matye 24:6-14 ek Lik 21:9-11, ou kapab lir lo sa ki ou vwar lo sa bann portre. Lo sak portre i annan en nimero. Sa nimero i anvoy ou lo sa paragraf ki koz lo sa portre. Aprezan annou gete si nou vwar sa siny ki Zezi ti donnen dan nou letan.

(1) Zezi ti dir: ‘Zot pou tann nouvel lager ek rimer lager; . . . Nasyon pou lager kont nasyon, rwayonm kont rwayonm.’ Ou’n deza tann nouvel lo lager?— Premye lager mondyal ti konmans an 1914 e fini an 1918. Apre dezyenm lager mondyal ti konmans an 1939 e fini an 1945. Zanmen ti’n deza annan lager mondyal avan sa! Ozordi i annan lager partou dan lemonn. I paret ki toulezour nou tann oubyen lir lo lager dan zournal, lo televizyon, ek radyo.

(2) Zezi ti osi dir: ‘Pou annan lafamin . . . dan plizyer landrwa.’ Parey ou konnen, pa tou dimoun ki annan ase manze pour manze. Toulezour en kantite dimoun i mor akoz zot napa ase manze.

(3) Zezi ti osi dir: ‘Dan plizyer landrwa pou annan lepidemi.’ Ou konnen kisisa en lepidemi?— I en maladi ki touy bokou dimoun. En move lepidemi ki ti apel Lafyev Espanyol ti touy apepre 20 milyon dimoun dan zis en lannen. Petet SIDA pou touy plis dimoun ankor. E i osi annan kanser, malad leker, ek lezot maladi ki touy bokou bokou dimoun tou le zan.

 (4) Zezi ti osi koz lo en lot parti sa siny, ler i ti dir: ‘Pou annan . . . tranbleman-de-ter dan plizyer landrwa.’ Ou konnen kisisa en tranbleman-de-ter?— Tranbleman-de-ter i fer later tranble anba ou lipye. Bann lakaz i tonbe e souvan touy bokou dimoun. Depi 1914, i’n annan bokou tranbleman-de-ter tou le zan. Ou’n deza tann koz lo tranbleman-de-ter?—

(5) Zezi ti osi dir pou annan ‘plis move keksoz.’ Sanmenm i annan sitan en kantite vol ek vyolans. Dimoun partou i per pangar voler i antre dan zot lakaz e vole. Zanmen i’n deza annan sitan bokou krim ek vyolans partou dan lemonn parey i annan ozordi.

(6) Zezi ti donn en lot parti sa siny ki tre enportan, ler i ti dir: ‘Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.’ (Matye 24:14) Si ou krwar ‘sa bon nouvel’ i enportan, koz lo la avek lezot. Koumsa ou osi ou a donn lanmen akonpli sa bout dan sa siny.

Serten dimoun i dir sa bann keksoz ki Zezi ti predir in toultan egziste. I vre, me zanmen zot in ariv tou anmenmtan partou dan lemonn. Alors ou konpran ki sa siny i vedir?— I vedir ki ler nou vwar sa bann keksoz pe arive, sa move lemonn pou byento ganny ranplase par nouvo lemonn Bondye.

Ler Zezi ti koz lo sa siny, i ti osi koz lo en sezon spesyal dan lannen. I ti dir: “Priye ki tousala pa ariv pandan sezon liver.” (Matye 24:20) Ki ou krwar Zezi ti oule dir par sa?—

Ki i kapab arive si en dimoun i bezwen sov en dezas pandan  liver, kot letan i fer li pli difisil e menm danzere pour vwayaze?— Si i arive sove, i pou’n fer li avek bokou difikilte. Me i kapab osi mor dan en tanpet. I pou tris si sa i arive zis akoz i ti tro okipe pour li konmans son vwayaz pli boner, non?—

Ki leson Zezi ti pe ansennyen ler i ti koz lo sove pandan sezon liver?

Ou konpran lide ki Zezi ti pe fer resorti, ler i ti dir pa esper liver pour sove?— I ti pe dir nou ki ler nou konnen Armagedon i pros, nou pa devret tarde pour montre ki nou kontan Bondye par servi li. Si nou tarde, i kapab tro tar pour nou. Alors nou pou parey bann dimoun dan letan Deliz ki ti tann Noe me zot pa ti antre dan lars.

Aprezan, nou pou koz lo ki mannyer i pou ete apre gran lager Armagedon. Nou pou vwar ki Bondye in anmase pour tou dimoun ki kontan li e ki pe servi li la konmela.

La lezot verse Labib ki montre ki Armagedon i pros: 2 Timote 3:1-5 ek 2 Pyer 3:3, 4.