Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ekout sa Gran Ansennyan

 SAPIT 20

Eski ou toultan anvi premye?

Eski ou toultan anvi premye?

OU KONN en dimoun ki toultan anvi premye?— Petet i pous lezot dan laliny pour li vin premye. Ou’n deza vwar sa arive?— Sa Gran Ansennyan ti vwar menm bann gran dimoun anvi pas premye oubyen plas pli enportan. E i pa ti kontan sa ditou. Annou vwar ki ti arive.

Eski ou’n deza vwar en dimoun ki anvi pas premye?

En zour Zezi ti ganny envite en gran repa kot en Farizyen. Bann Farizyen ti bann dimoun enportan, zot ti sef en larelizyon. Apre ki Zezi ti’n arive, i ti obzerv bann envite pe antre e pe swazir pli bon plas. Alors i ti rakont zot en zistwar. Ou ti a kontan tande?—

 Zezi ti dir: ‘Kan ou ganny envite dan en maryaz, pa asiz dan pli bon plas oubyen plas pli enportan.’ Ou konnen akoz Zezi ti dir sa?— I ti eksplike ki petet en dimoun pli enportan in ganny envite. Alors parey ou kapab vwar la lo portre, sa enn ki pe fer sa lafet i kapab vini e dir: ‘Les li asiz la, ou al laba.’ Ki mannyer sa envite pou santi li?— I pou kanmi akoz i pou bezwen leve devan tou sa dimoun e al pran en plas ki pa tro bon.

Zezi ti pe montre ki i pa byen pour nou anvi pli bon plas. Alors i ti dir: “Kan ou ganny envite, al asiz dan dernyen plas, pour ki kan sa dimoun ki’n envit ou i arive i a dir ou, ‘Mon zanmi, monte, pran en pli bon plas.’ Alor, sa i ava en loner pour ou dan prezans tou lezot envite.”Lik 14:1, 7-11.

Ki leson Zezi ti ansennyen ler i ti koz lo bann envite ki oule pli bon plas?

Ou konpran sa leson dan zistwar Zezi?— Annou servi en legzanp pour gete si ou’n konpran. Fer konmsi ou pe antre dan en bis ki plen. Eski ou devret taye pour ganny en plas asize e les bann pli aze debout?— Eski Zezi pou kontan si ou fer sa?—

Si en dimoun i dir Zezi pa fatig li avek sa ki nou fer. Ou pou krwar li?— Zezi ti obzerv byen sa bann dimoun ki ti pe swazir zot plas dan sa gran repa kot sa Farizyen. Ou pa krwar i enterese avek sa ki nou fer ozordi tou?— Ozordi Zezi i dan lesyel e i kapab byen obzerv nou.

Ler en dimoun i anvi pas avan lezot, sa i kapab anmenn en  bann problenm. Lezot dimoun pa kontan e zot kapab konmans dispit. Parfwa sa i arive ler bann manrmay pe pran bis ansanm. Zis kan laport bis i ouver, manrmay i kapab pouse pour antre premye. Zot anvi pli bon plas, obor lafnet. Ki i kapab arive apre?— Problenm antre zot.

Anvi pas premye i kapab anmenn bokou problenm. I ti menm fer annan problenm parmi bann zapot Zezi. Parey nou’n vwar dan Sapit 6 sa liv, zot ti dispit antre zot lekel ki pli enportan. Ki Zezi ti fer?— I ti koriz zot. Me plitar zot ti dispit ankor. Annou vwar ki mannyer sa ti konmanse.

Bann zapot ti pe al Zerizalenm ansanm avek Zezi pour dernyen fwa. Zezi ti pe koz avek zot lo son Rwayonm. Alors Zak  ek Zan ti pe mazin pour vin lerwa avek li. Zot ti menm koz lo sa avek zot manman Salome. (Matye 27:56; Mark 15:40) Alors ler zot ti pe al Zerizalenm, Salome ti vin kot Zezi, tonm azenou devan li, e demann li en faver.

Zezi ti demann li: “Ki ou oule mon fer pour ou?” I ti dir i ti a kontan si Zezi i les son de garson asiz akote li dan son Rwayonm, enn lo son kote drwat e lot lo son kote gos. Ki mannyer ou krwar sa dis lezot zapot ti santi ler zot ti tann sa ki Zak ek Zan ti’n fer zot manman demande?—

Ki Salome ti demann Zezi e ki ti arive apre?

Zot ti byen ankoler. Alors Zezi ti donn zot tou en bon konsey. Zezi ti dir zot ki bann dirizan dan bann pei i kontan gro plas  e kontan lezot vwar zot konman enportan. Zot anvi en pozisyon enportan kot tou dimoun i obeir zot. Me Zezi ti dir son bann disip zot pa devret vin koumsa. Okontrer, Zezi ti dir: “Sa ki oule vin premye parmi zot i bezwen vin lesklav zot tou.” Zis mazin sa!Matye 20:20-28.

Ou konnen ki en lesklav i fer?— I servi lezot dimoun, san ekspekte lezot pour servi li. I pran dernyen plas, pa premye plas. I azir konman sa enn ki mwen enportan, pa konman sa enn ki pli enportan. E pa bliye, Zezi ti dir sa enn ki anvi vin premye i devret azir parey en lesklav anver lezot.

Ki sa i ansenny nou?— Eski en lesklav pou lager pli bon plas asize avek son met? Eski i pou dispit lekel ki pou manz avan? Ki ou dir?— Zezi ti dir en lesklav i fer son met pas avan li.Lik 17:7-10.

Alors ki nou devret fer olye anvi pas premye?— Wi, nou devret vin parey en lesklav pour lezot. Savedir nou devret fer lezot pas avan nou. I osi vedir nou vwar lezot pli enportan ki nou. Ou kapab mazin bann fason kot ou kapab fer lezot pas avan ou?— Ou kapab get lo paz 40 ek 41 pour revwar bann fason ki ou kapab fer lezot pas avan ou par servi zot.

Petet ou rapel ki sa Gran Ansennyan ti fer lezot pas avan li par servi zot. Dernyen sware ki i ti pase avek son bann zapot, i ti menm bese e lav zot lipye. Si nou osi nou fer lezot pas avan nou par servi zot, nou pou fer kontan sa Gran Ansennyan ek son Papa, Zeova.

Annou lir ankor ennde pasaz Labib ki ankouraz nou pour fer lezot pas avan nou: Lik 9:48; Romen 12:3; ek Filipyen 2:3, 4.