Skip to content

Al lo sa dezyenm lalis

Al lo konteni

Temwen Zeova

Kreol Seselwa

Ekout sa Gran Ansennyan

 SAPIT 11

Bann lanz Bondye i ed nou

Bann lanz Bondye i ed nou

I ANNAN dimoun ki dir zot krwar zis sa ki zot kapab vwar. Me sa i bet. I annan en kantite keksoz ki egziste me ki nou pa vwar avek nou lizye. Ou kapab nonm enn?—

Par egzanp sa ler ki nou respire. Ki mannyer nou konnen i egziste?— Soufle dan ou lanmen. Ou santi keksoz?— Wi, me selman ou pa vwar nanryen, pa i vre?—

Nou’n deza koz lo bann lespri, ki nou pa kapab vwar. Nou’n aprann ki i annan parmi zot ki bon e i annan ki move. Nonm serten bon lespri ki nou pa kapab trouve.— Wi, i annan Zeova, Zezi, e osi bann bon lanz. Eski i annan bann move lanz osi?— Labib i dir i annan. Dir mwan ki ou’n aprann lo zot.—

Nou konnen ki bann bon lanz ek move lanz i pli for ki nou. Sa Gran Ansennyan ti konn en kantite lo bann lanz. Sa akoz i ti en lanz avan i ti ne konman en pti baba lo later. I ti’n viv ansanm avek lezot lanz dan lesyel. I ti konn bokou zot. Eski tou sa bann lanz i annan en non?—

Nou’n vwar ki Bondye ti donn bann zetwal en non. Alors nou asire ki tou bann lanz i annan zot non zot osi. E nou konnen ki zot kapab koz avek kanmarad akoz Labib i mansyonn ‘langaz bann lanz.’ (1 Korentyen 13:1) Ki ou krwar bann lanz i koz lo la? Eski zot koz lo nou isi lo later?—

Nou konnen ki bann lanz Satan, savedir bann demon, pe sey fer nou dezobei Zeova. Alors zot bezwen koze antre zot ki  mannyer zot kapab fer sa. Zot anvi nou vin parey zot pour ki Zeova pa ava kontan nou osi. Be bann lanz fidel Bondye? Ou krwar zot koz lo nou zot osi?— Be wi. Zot anvi ed nou. Mon ava rakont ou ki mannyer bann lanz Bondye ti ed detrwa dimoun ki ti kontan Zeova e servi li.

Par egzanp, ti annan sa zonm ki ti apel Danyel ki ti pe viv Babilonn. Laba Babilonn, bokou dimoun pa ti kontan Zeova. Zot ti menm fer en lalwa pour pini nenport dimoun ki priy avek Zeova. Me Danyel li, i ti kontinyen priy Zeova. Ou konnen ki zot ti fer avek Danyel?—

Sa bann zonm pa bon ti zet Danyel dan en trou kot ti annan lyon. Danyel ti li tousel dan sa trou avek bann lyon lafen. Ou konnen ki ti arive?— Danyel ti dir: “Bondye  in anvoy son lanz pour ferm lagel sa bann lyon.” Sa bann lyon pa ti fer li nanryen! Bann lanz i kapab fer bann keksoz enkrwayab pour bann serviter Zeova.Danyel 6:18-22.

Ki Bondye ti fer pour sov Danyel?

Annou vwar ki ti arive avek Pyer ler i ti dan prizon. Ou rapel Pyer? I ti zanmi sa Gran Ansennyan, Zezi Kri. Serten dimoun pa ti kontan ler Pyer ti dir zot Zezi ti Garson Bondye. Alors zot ti met Pyer dan prizon. Ti annan bann solda ki ti pe vey Pyer pour fer sir i pa sove. Lekel ki ti pou kapab ed li?—

Pyer ti pe dormi ant de solda, e son lanmen ti dan lasenn.  Me Labib i dir: “Toutakou en lanz Senyer ti aparet e en lalimyer ti kler sa kaso. Lanz ti tous Pyer dan son kote e revey li. ‘Leve vit.’”

Ki mannyer en lanz ti ed Pyer pour sorti dan prizon?

Deswit, sa lasenn ki ti avek lanmen Pyer ti tonbe! Sa lanz ti dir li: ‘Sanze, met ou sandal, e swiv mwan.’ Bann solda pa ti kapab fer nanryen akoz lanz ti pe ed Pyer. Ler zot ti ariv kot baro, en keksoz drol ti arive. Sa baro ti ouver li tousel! Sa lanz ti’n sov Pyer pour li kapab kontinyen prese.Akt 12:3-11.

Eski bann lanz Bondye i kapab ed nou osi?— Wi zot kapab. Me eski sa i vedir ki zot pou toultan anpes nou ganny dimal?— Non, bann lanz pa pou anpes nou ganny dimal si nou nou fer bann keksoz bet. Me parler nou kapab ganny dimal menm si nou pa fer bann keksoz bet. Bann lanz pa’n ganny demande pour anpes sa arive. Plito, Bondye in donn zot en travay spesyal pour fer.

Labib i koz lo en lanz ki pe dir dimoun partou ador Bondye. (Revelasyon 14:6, 7) Ki mannyer sa lanz i dir zot sa? Eski i kriye dan lesyel pour tou dimoun tande?— Non, bann disip Zezi lo later i koz avek bann dimoun lo Bondye, e bann lanz i gid zot dan sa travay. Bann lanz i fer sir ki bann ki vreman anvi konn Bondye i ganny en sans pour tande. Nou kapab partisip dan sa travay nou osi e bann lanz pou ed nou.

Be si bann dimoun ki pa kontan Bondye i fer problenm avek nou? Si zot met nou dan prizon? Eski bann lanz pou vin sov nou?— Zot kapab sov nou, me zot pa fer sa toultan.

Ki sa lanz pe dir Pol?

En letan, Pol ki ti en disip Zezi, ti ganny anprizonnen. I ti bezwen voyaz par bato dan en movetan. Me bann lanz pa ti vin sov  li deswit. Sa i akoz ti annan lezot dimoun ankor ki ti bezwen tann koz lo Bondye. En lanz ti dir: “Pa bezwen per, Pol! Fodre ki ou prezant devan Sezar.” Pol ti bezwen ganny anmennen kot Sezar, en gran dirizan lemonn, pour pres avek li. Bann lanz ti konnen kote Pol ti ete toultan, e zot ti ed li. Zot pou ed nou osi si nou vreman servi Bondye.Akt 27:23-25.

I annan en lot gro travay ki bann lanz pou fer, e zot pou fer li tre byento. Bondye i pros pour detrir bann move dimoun. Tou dimoun ki pa ador sa vre Bondye pou ganny detrir. Bann ki dir zot pa krwar dan bann lanz zis akoz zot pa vwar pou realize ki zot ti mal.2 Tesalonisyen 1:6-8.

Be ki pou arive avek nou?— Si nou lo kote bann lanz Bondye, zot pou ed nou. Me eski nou lo zot kote?— Nou lo zot kote si nou pe servi Zeova. E si nou pe servi Zeova, nou pou dir lezot dimoun servi li zot osi.

Pour aprann plis lo ki mannyer bann lanz i enfliyans lavi bann dimoun, lir Psonm 34:7; Matye 4:11; 18:10; Lik 22:43; ek Akt 8:26-31.