Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 10

Sa Lerwa i rafin son pep spirityelman

Sa Lerwa i rafin son pep spirityelman

PWEN ENPORTAN SA SAPIT

Akoz e ki mannyer Zezi in rafin e pirifye son bann disip spirityelman

1-3. Ki Zezi ti fer ler i ti vwar ki tanp ti pe ganny sali?

ZEZI ti annan en gran respe pour tanp Zerizalenm akoz i ti konnen ki i ti reprezante. Depi plizyer syek, vre ladorasyon lo later ti ganny fer kot tanp. Me sa ladorasyon, setadir, ladorasyon Zeova sa Bondye sen i devret prop e san defo. Me, zis mazinen ki mannyer Zezi ti santi kan i ti vin kot tanp le 10 Nizan 33 N.L. e vwar ki tanp ti pe ganny sali. Ki ti pe arive?​—Lir Matye 21:12, 13.

2 Dan Lakour bann ki pa ti Zwif, bann marsan voras ek bann ki sanz larzan ti pe profit lo bann adorater ki ti’n vin ofer Zeova zot lofrann. * Zezi ti “sas tou bann ki ti pe aste e vann la. I ti savir latab bann ki ti pe sanz larzan.” (Konpar Neemya 13:7-9.) I ti reprimann sa bann zonm egois ki ti pe fer lakaz son Papa vin en lakaz voler. Dan sa fason, Zezi ti pe demontre respe pour tanp e pour sa ki i ti reprezante. Ladorasyon son papa ti devret reste prop!

3 Plizyer syek pli tar, apre ki i ti’n ganny etablir konman Lerwa, Zezi ti ankor enn fwa pirifye en tanp, enn ki enplik tou sa bann ki anvi ador Zeova dan en fason akseptab. Ki tanp i ti pirifye?

Pirifikasyon “bann garson Levi”

4, 5. (a) Ki mannyer bann disip swazir Zezi ti ganny rafinen e pirifye depi 1914 ziska bann premye mwan 1919? (b) Eski sa i vedir ki pep Bondye ti aret ganny rafinen apre sa? Eksplike.

4 Parey nou ti vwar dan Sapit 2 sa liv, apre ki i ti vin Lerwa an 1914, Zezi ansanm avek son Papa ti enspekte tanp spirityel, sa laranzman pour ladorasyon pir. * Apre sa lenspeksyon, sa Lerwa ti vwar ki bann Kretyen swazir, andotmo, “bann garson Levi” ti pou bezwen ganny rafinen e pirifye. (Mal. 3:1-3) Depi 1914 ziska bann premye mwan 1919, Zeova sa “enn ki rafinen” ti les son pep eksperyans plizyer leprev ek difikilte ki ti rafin e pirifye zot. Erezman, sa bann tes ki ti parey dife ti pirifye bann Kretyen swazir e alor zot ti pare pour siport zot Lerwa.

5 Eski pep Bondye ti aret ganny rafinen e pirifye apre sa? Non. Diran bann dernyen zour, atraver Lerwa sa Rwayonm,  Zeova pe kontinyen ed son bann serviter pour reste prop pour ki zot kapab reste dan tanp spirityel. Dan sa prosen de sapit, nou pou vwar ki mannyer Zeova in rafin zot moralman e ki mannyer i’n amelyor son lorganizasyon. Me, premyerman, annou koz lo zot pirifikasyon spirityel. I vreman ranforsi nou lafwa pour vwar sa ki Zezi in fer, sa ki vizib e sa ki envizib pour arive ed son bann disip reste prop spirityelman.

“Gard zot lekor pir”

6. Ki mannyer lord ki Zeova ti donn bann Zwif egzile i ed nou konpran sinifikasyon pirifikasyon spirityel?

6 Ki savedir reste pir spirityelman? Pour reponn sa kestyon, annou get sa ki Zeova ti dir avek bann Zwif egzile ler zot ti pe kit Babilonn dan sizyenm syek A.N.L. (Lir Izai 52:11.) Sa bann egzile ti pe retourn se zot Zerizalenm premyerman pour rebatir tanp e reetabli vre ladorasyon. (Ezra 1:2-4) Zeova ti oule ki son pep i kit deryer tou bann tras larelizyon bann Babilonnyen. Remarke ki i ti donn zot bann lord enn deryer lot: “Pa tous nanryen enpir,” “sorti parmi li” e “gard zot lekor pir.” Ladorasyon pour Zeova pa ti devret ganny kontaminen avek fo ladorasyon. Alor, ki konklizyon nou kapab tonm lo la? Pirifikasyon spirityel i enplik rezet bann lansennyman ek pratik fo larelizyon.

7. Ki mwayen Zezi in servi pour ed son bann disip reste prop spirityelman?

7 En pti pe letan apre ki i ti’n ganny etablir konman Lerwa, Zezi ti met an plas en mwayen evidan par ki i ti pou ed son bann disip reste prop spirityelman. Sa mwayen se atraver lesklav fidel e pridan ki Zezi ti apwente an 1919. (Mat. 24:45) Ver sa lannen, bann Etidyan Labib ti’n deza fini pirifye zot lekor avek bann lansennyman fo larelizyon. Kantmenm sa, i ti neseser pour zot ganny pirifye plis ankor spirityelman. Atraver lesklav fidel, Kris in gradyelman ed son bann disip konpran serten selebrasyon ek pratik ki zot ti pou bezwen abandonnen. (Prov. 4:18) Annou egzamin serten legzanp.

Eski bann Kretyen i devret selebre Nwel?

8. Ki bann Etidyan Labib ti’n rekonnet depi lontan konsernan Nwel, me kwa ki zot pa ti’n konpran klerman?

8 Depi byen lontan, bann Etidyan Labib ti’n konpran ki selebrasyon Nwel i sorti dan larelizyon payen e ki Zezi pa ti ne le 25 Desanm. Zion’s Watch Tower Desanm 1881 ti dir: “Plizyer milyon ti ganny anmennen dan legliz sorti dan larelizyon payen. Me zis non ki ti sanze, parski bann pret payen ti vin pret kretyen e bann zour lafet ti port bann non kretyen. En legzanp se Nwel (Christmas) i enn sa bann zour lafet.” Watch Tower 1883, anba tit “When Was Jesus Born?,” (Kan ki Zezi ti ne?) ti dir ki Zezi ti ne ver konmansman Oktob. * Pourtan, sa letan, bann Etidyan Labib pa ti vreman  vwar li neseser pour aret fet Nwel. Menm lafanmir Betel Brooklyn ti pe selebre sa lafet. Me, apre 1926, keksoz ti konmans sanze. Akoz?

9. Ki bann Etidyan Labib ti arive rekonnet konsernan Nwel?

9 Apre ki zot ti’n egzamin sa size pli o profon, bann Etidyan Labib ti realize ki lorizin Nwel ensi ki bann pratik ki relye avek sa lafet ti dezonor Bondye. Sa lartik “The Origin of Christmas,” (Lorizin Nwel) dan The Golden Age le 14 Desanm 1927 ti dir ki Nwel i en lafet payen ki baze plis lo plezir e i enplik ladorasyon zidol. Sa lartik ti fer kler ki Kris pa ti’n donn lord pour selebre sa lafet e i ti konklir avek sa parol konsernan Nwel: “Lefet ki lemonn, imen ek Dyab i kontinyen promot e kontinyen selebre sa lafet . . . sa i en levidans ki montre klerman ki bann ki’n dedye antyerman zot lekor dan servis Zeova pa devret selebre sa lafet.” I pa drol ki Desanm sa menm lannen, lafanmir Betel pa ti selebre sa lafet e zot ti nepli fer li ankor.

10. (a) Ki leklersisman konsernan Nwel nou ti gannyen an 1928? (Vwar osi bwat “ Nwel, son lorizin ek son bi.”) (b) Ki lavertisman pep Bondye ti gannyen an rapor avek lezot lafet ek selebrasyon ki zot pa ti devret fer? (Vwar bwat “ Lezot lafet ek selebrasyon i ganny devwale.”)

10 Son lannen swivan, bann Etidyan Labib ti ganny en pli gran leklersisman lo Nwel. Le 12 Desanm 1928, Frer Richard Barber, en manm kot biro prensipal ti fer en diskour lo radyo ki ti denons lorizin payen sa lafet. Ki mannyer pep Bondye ti reakte anver sa gidans kler sorti kot biro prensipal? Frer Charles Brandlein ki rapel zour ki li ek son fanmir ti aret selebre Nwel ti dir: “Eski i ti en problenm pour nou rezet sa bann keksoz payen? Non, pa ditou. . . . I ti konmsi  nou ti pe tir en lenz sal lo nou e zet li.” Avek menm leta lespri, Frer Henry Cantwell ki pli tar ti en sirveyan ki vizit bann kongregasyon ti rapel: “Nou ti kontan ki nou ti’n kapab aret fer en keksoz pour kapab prouv nou lanmour pour Zeova.” Bann disip fidel Kris ti pare pour fer bann sanzman neseser e pa partisip dan okenn lafet ki ti sorti dan bann ladorasyon enpir. *​—Zan 15:19; 17:14.

11. Ki mannyer nou kapab montre nou sipor pour Lerwa Rwayonm Bondye?

11 Pa sa bann Etidyan Labib in kit en bon legzanp pour nou? Ler nou reflesir lo zot legzanp, i byen nou demann nou lekor, ‘Ki mannyer mon konsider bann gidans ki nou gannyen sorti kot biro prensipal Temwen Zeova? Eski mon aksepte sa bann konsey avek rekonesans e aplik sa ki mon aprann?’ Nou lobeisans i montre ki nou pe siport nou Lerwa ki pe servi lesklav fidel pour donn nou nouritir spirityel kan i ler.​—Akt 16:4, 5.

Eski bann Kretyen i devret servi lakrwa?

Senbol lakrwa ek kouronn (Vwar paragraf 12 ek 13)

12. Pour plizyer lannen, ki mannyer bann Etidyan Labib ti konsider lakrwa?

12 Pour plizyer lannen, bann Etidyan Labib ti konsider lakrwa konman en senbol akseptab pour bann Kretyen. Sirman zot pa ti santi ki i ti devret ganny adore akoz zot ti konnen ki i mal pour ador zidol. (1 Kor. 10:14; 1 Zan 5:21) Sanmenm rezon ki depi byen boner dan bann lannen 1883, Watch Tower ti dir fransman ki “tou form ladorasyon zidol i detestab pour Bondye.” Me pourtan, o konmansman, bann  Etidyan Labib pa ti vwar li en problenm pour servi lakrwa dan serten ka kot zot ti vwar li apropriye. Par egzanp, zot ti fyer pour met en pin ki ti annan en lakrwa ek en kouronn lo la konman en badz pour idantifye zot. Pour zot, sa senbol ti pe montre ki si zot ti fidel ziska lanmor, zot ti pou resevwar kouronn lavi. Konmansman 1891, i ti annan senbol en lakrwa ek kouronn lo lapo Watch Tower.

13. Ki leklersisman bann disip Kris ti gannyen konsernan litilizasyon lakrwa? (Vwar osi bwat “ Plis leklersisman konsernan litilizasyon lakrwa.”)

13 Bann Etidyan Labib ti kontan sa senbol lakrwa ek kouronn. Me, konmansman tar dan bann lannen 1920, bann disip Kris ti ptitapti ganny en pli bon konprenezon lo litilizasyon lakrwa. Ler i ti pe reflesir lo en lasanble ki ti ganny fer an 1928, Detroit, Michigan, Leta-z-ini, Frer Grant Suiter, ki pli tar ti lo Konsey Direkter ti rapel: “Dan sa lasanble, sa lakrwa ek kouronn pa ti zis en senbol ki pa ti neseser, me i ti en kontradiksyon.” Diran sa detrwa lannen ki ti swiv, i ti annan plis leklersisman lo sa size. I ti kler ki lakrwa napa en plas dan en ladorasyon ki pir e prop spirityelman.

14. Ki mannyer pep Bondye ti reazir anver bann leklersisman ki zot ti gannyen ptitapti konsernan lakrwa?

14 Ki mannyer pep Bondye ti reazir anver leklersisman ki zot ti gannyen ptitapti konsernan lakrwa? Eski zot ti kontinyen servi sa senbol lakrwa ek kouronn ki ti annan gran valer pour zot? Lela Roberts, en serviter Zeova pour bokou lannen ti dir: “I ti fasil pour pa servi li apre ki nou ti’n konpran sa ki i ti reprezante.” En lot ser fidel ki apel Ursula Serenco ti eksprim menm santiman ki bokou lezot ti annan an dizan: “Nou ti arive rekonnet ki sa ki oparavan nou ti pe servi e konsider konman en senbol ouswa reprezantasyon lanmor nou Senyer ek nou devosyon konman Kretyen ti senpleman en senbol payen. An armoni avek Proverb 4:18, nou ti vreman rekonesan ki semen ti pe ganny eklersi.” Bann serviter fidel Kris pa ti anvi annan nanryen pour fer avek bann pratik fo larelizyon!

15, 16. Ki mannyer nou kapab montre ki nou determinen pour kit lakour tanp spirityel Zeova lo later prop?

15 Nou osi nou annan sa menm determinasyon ozordi. Nou konnen ki Zezi pe servi en mwayen vizib, setadir lesklav fidel e pridan pour ed son pep reste prop spirityelman. Alor, kan bann nouritir spirityel ki nou gannyen i averti nou konsernan bann selebrasyon, lafet ouswa koutim ki sorti dan fo larelizyon, nou devret deswit rezet zot e obeir. Parey nou bann frer ek ser ki ti viv o konmansman prezans Kris, nou determinen pour kit lakour tanp spirityel Zeova lo later prop.

16 Diran bann dernyen zour, Kris in osi fer bann keksoz ki nou pa vwar avek nou de lizye pour arive protez pep Zeova avek bann dimoun ki kapab kontamin nou spirityelman. Ki mannyer i’n fer sa? Annou vwar.

 Separasyon “bann ki move avek bann ki bon”

17, 18. Dan sa parabol lo lasenn, ki savedir (a) zet lasenn dan lanmer, (b) rasanble “tou kalite pwason,” (c) met bann pwason ki bon dan pannyen e (d) zet bann pwason ki pa bon?

17 Lerwa Zezi Kri i vey lo kongregasyon Bondye dan lemonn antye. Dan bann fason ki nou pa kapab konpletman konpran, Kris ek bann lanz pe fer en travay separasyon. Zezi ti dekrir sa travay dan en parabol konsernan lasenn pwason. (Lir Matye 13:47-50.) Ki sa parabol i vedir?

Sa lasenn i reprezant predikasyon ki pe ganny fer dan lemonn antye ki ganny reprezante par lanmer (Vwar paragraf 18)

18 Zet “lasenn . . . dan lanmer.” Sa lasenn i reprezant predikasyon ki pe ganny fer dan lemonn antye ki ganny reprezante par lanmer. “Tou kalite pwason i pri ladan.” Sa bon nouvel i atir tou sort kalite dimoun, bann ki fer bann pa neseser pour vin en vre Kretyen, ensi ki plizyer lezot ki o konmansman i demontre en lentere, me ki pa vreman pran pozisyon pour vre ladorasyon. * Met ‘bann ki bon dan en pannyen.’ Bann ki annan en leker senser i ganny rasanble e met dan kongregasyon ki ganny konpare avek en pannyen, kot zot kapab ador Zeova dan en fason pir. Bann pwason ki “pa bon” i ganny zete. Diran bann dernyen zour, Kris ek bann lanz in separ “bann ki move avek bann ki bon.” * An rezilta sa, bann ki napa sa bon kondisyon leker, andotmo, bann ki petet pa ankor pare pour abandonn bann fo krwayans ek pratik pa ganny sans kontamin kongregasyon. *

19 Ki mannyer ou santi anver sa ki Kris in fer pour protez lapirte pep Bondye e pirifye vre ladorasyon?

19 Eski pa i rekonfortan pour konnen ki nou Lerwa Zezi Kri i protez sa bann ki i pe pran swen avek? Eski pa i osi rekonfortan pour konnen ki son devouman pour vre ladorasyon e pour bann vre adorater i ankor parey i ti ete ler i ti pirifye tanp dan premye syek N.L.? Pa nou vreman rekonesan ki Kris in travay dir pour protez lapirte spirityel pep Bondye ek vre ladorasyon! Nou kapab demontre nou sipor pour sa Lerwa ek son Rwayonm kan nou rezet tou laspe fo larelizyon.

^ par. 2 Bann Zwif viziter ti bezwen servi en serten kalite larzan pour pey taks tanp tou le-z-an e bann sanzer larzan ti sarz zot en fre pour sanz zot larzan. Deplis, i posib ki bann viziter ti bezwen aste zannimo pour zot ofer. Zezi ti apel sa bann marsan “bann voler,” tre probab akoz zot ti sarz bann dimoun bann pri ouswa fre egzorbitan pour zot servis.

^ par. 4 Pep Zeova lo later i ador li dan bann lakour son gran tanp spirityel lo later.

^ par. 8 Sa lartik ti montre ki si Zezi ti ne pandan liver, sa “pa ti an armoni avek sa resi ki dir ki bann berze ti deor avek zot troupo.”​—Lik 2:8.

^ par. 10 Dan en let date le 14 Novanm 1927, Frer Frederick Franz ti ekrir: “Nou pa pou fet Nwel sa lannen. Lafanmir Betel in vote pour ki nou nepli fet Nwel.” Detrwa mwan pli tar, dan en let date le 6 Fevriye 1928, Frer Franz ti ekrir: “Nou Senyer pe pirifye nou ptitapti e separ nou avek bann pese lorganizasyon Dyab ki sorti dan Babilonn.”

^ par. 18 Par egzanp, an 2013 i ti annan en maksimonm 7,965,954 proklanmater e 19,241,252 dimoun ti asiste Memoryal lanmor Kris.

^ par. 18 Separasyon bon pwason ek bann pwason ki pa bon i pa parey avek separasyon mouton ek kabri. (Mat. 25:31-46) Separasyon ouswa zizman final bann mouton ek kabri pou ariv pandan gran ladetres ki pe vini. Ziska sa letan, bann dimoun ki parey pwason ki pa bon i annan sa posibilite pour retourn ver Zeova e ganny met dan kongregasyon Zeova ki ganny konpare avek en pannyen.​—Mal. 3:7.

^ par. 18 Finalman, bann ki pa bon pou ganny zete dan dife senbolik ki vedir ganny detrir.