Skip to content

Al lo sa dezyenm lalis

Al lo konteni

Temwen Zeova

Kreol Seselwa

Rwayonm Bondye pe dirize!

 SAPIT 19

Travay konstriksyon ki onor Zeova

Travay konstriksyon ki onor Zeova

PWEN ENPORTAN SA SAPIT

Travay konstriksyon mondyal i promot lentere Rwayonm

1, 2. (a) Ki bann serviter Zeova in kontan fer depi byen lontan? (b) Ki Zeova i vreman apresye?

DEPI byen lontan, bann serviter fidel Zeova in konstri bann batiman ki loue son non. Par egzanp, bann Izraelit ti vreman kontan pour partisip dan konstriksyon tabernak e zot ti zenerezman donn bann materyo pour konstriksyon.​—Egz. 35:30-35; 36:1, 4-7.

2 Pour Zeova, se pa sa bann materyo konstriksyon ki sa keksoz pli enportan pour onor li e i pa ni sa keksoz ki li i vwar pli enportan. (Mat. 23:16, 17) Sa ki Zeova i apresye, sa kado ki onor li plis ki lezot keksoz se sa ladorasyon ki son bann serviter i ofer li, enkli zot leta lespri volonter ek zot travay ki zot fer avek devouman. (Egz. 35:21; Mark 12:41-44; 1 Tim. 6:17-19) Sa realite i vreman remarkab. Akoz? Parski batiman i kapab ganny demolir e rekonstri. Par egzanp, tabernak ek tanp nepli egziste konmela. Sa bann striktir i nepli, me Zeova pa’n oubliy zenerozite ek travay dir son bann serviter fidel ki ti siport konstriksyon sa bann batiman.​—Lir 1 Korentyen 15:58; Ebre 6:10.

3. Ki nou pou repas lo la dan sa sapit?

3 Bann serviter Zeova dan nou letan in osi travay dir pour konstri plizyer landrwa ladorasyon. Sa ki nou’n reisi akonpli anba gidans Lerwa Zezi Kri i vreman enkrwayab! I kler ki Zeova in beni nou zefor. (Ps. 127:1) Dan sa sapit, nou pou revwar serten travay ki’n ganny fer e ki mannyer sa in onor Zeova. Nou pou osi vwar leksperyans serten ki ti enplike dan sa travay.

Konstriksyon bann Lasal Rwayonm

4. (a) Akoz nou bezwen plis landrwa ladorasyon? (b) Akoz i annan mwens biro brans konmela? (Vwar bwat “ Konstriksyon Biro Brans​—Bann bezwen in sanze.”)

4 Parey i’n ganny diskite dan Sapit 16, Zeova i ekspekte ki nou zwenn ansanm pour ador li. (Ebr. 10:25) Nou bann renyon pa zis ranforsi nou lafwa, me i osi ogmant nou lantouzyasm pour predikasyon. Diran sa bann dernyen zour, Zeova i ankor pe akseler sa travay. An rezilta sa, plizyer milye dimoun i vin ver son lorganizasyon sak lannen. (Iza.  60:22) Pli i annan plis sitwayen Rwayonm, pli i vin neseser pour annan plis fasilite lenprimri pour prodwir bann piblikasyon baze lo Labib. Nou osi bezwen plis landrwa ladorasyon.

5. Akoz sa non Lasal Rwayonm i apropriye? (Vwar osi bwat  New Light Church.”)

5 Depi byen boner dan listwar modern pep Zeova, bann Etidyan Labib ti konmans vwar sa nesesite pour annan zot prop landrwa pour fer renyon. I paret ki enn bann premye landrwa ladorasyon ti ganny konstri West Virginia, Leta-z-ini an 1890. Ver 1930, pep Zeova ti’n konstri e repar plizyer lasal, me sa bann landrwa pa ti ankor ganny en non ki disteng zot avek lezot. Me, an 1935, Frer Rutherford ti vizit Awai kot en lasal ti pe ganny konstri ansanm avek en nouvo biro brans. Kan i ti ganny demande ki non zot ti pou donn sa batiman, Frer Rutherford ti reponn: “Ou pa krwar nou devret apel li ‘Lasal Rwayonm’ vi ki sanmenm ki nou pe fer, nou pe pres bon nouvel Rwayonm?” (Mat. 24:14) Sa  non apropriye ti ganny donnen pa zis pour sa landrwa ladorasyon, me pour tou bann landrwa ladorasyon ki ganny servi par Temwen Zeova dan lemonn antye.

6, 7. Ki lefe konstriksyon rapid bann Lasal Rwayonm in annan?

6 Ver 1970, i ti annan plis bezwen pour plis Lasal Rwayonm. Akoz sa, bann frer Leta-z-ini ti devlop en metod rapid e efikas pour konstri bann zoli Lasal Rwayonm dan zis detrwa zour. Ver 1983, apepre 200 sa bann Lasal Rwayonm ti’n ganny konstri Leta-z-ini ek Kanada. Pour akonpli sa travay, bann frer ti konmans form bann komite konstriksyon rezyonal. Sa metod ti mars sitan byen ki an 1986, Konsey Direkter ti formaliz sa laranzman e ver 1987, i ti annan 60 Komite Konstriksyon Rezyonal Leta-z-ini. * Ver 1992, bann Komite Konstriksyon Rezyonal ti osi ganny formen Lafrans, Lalmanny, Larzantin, Lespanny, Lostrali, Meksiko, Sid Afrik ek Zapon. Sa bann frer travayan ki konstri bann Lasal Rwayonm ek Lasal Lasanble i merit nou sipor akoz sa travay ki zot pe fer i form parti zot servis sakre.

7 Sa bann Lasal Rwayonm ki ti ganny konstri sitan vitman ti donn en bon temwannyaz dan kominote kot sa bann konstriksyon ti pe ganny fer. Par egzanp, en zournal Lespanny ti met sa konman gran tit, “Lafwa ki deplas bann montanny.” Ler i ti pe fer komanter lo konstriksyon en Lasal Rwayonm dan lavil Martos, sa zournal ti dir: “Dan en lemonn kot dimoun i egois, ki mannyer i posib pour bann  volonter sorti dan diferan rezyon [Lespanny] vwayaz ziska Martos pour konstri en batiman ki kas tou rikord lo lavites, perfeksyon ek lorganizasyon?” Sa lartik ti reponn sa kestyon par sit parol en Temwen volonter: “I zis akoz nou tou nou en pep ki’n ganny ansennyen par Zeova.”

Konstriksyon dan bann pei kot napa bokou resours

8. An 1999, ki nouvo progranm Konsey Direkter ti aprouve e akoz?

8 Anmezir ventyenm syek ti aprose, bokou dimoun in vin ver lorganizasyon Zeova dan bann pei kot bann frer napa bokou resours. Kongregasyon lokal ti fer sa ki zot kapab pour konstri bann landrwa ladorasyon. Me, dan serten pei, zot ti ganny sikannen e zot ti menm bezwen sibir diskriminasyon akoz nou bann Lasal Rwayonm ti vreman senp konpare avek lezot landrwa ladorasyon. Me, konmansman 1999, Konsey Direkter ti aprouv en progranm pour akseler konstriksyon bann Lasal Rwayonm dan bann pei ki pe devlope. Larzan sorti dan bann pei pli ris ti ganny servi pour kouver bann depans ki i ti pou annan. (Lir 2 Korentyen 8:13-15, NW.) Bann frer ek ser sorti dan lezot pei ti volonter pour ede avek sa travay.

9. Ki latas ki ti paret difisil me kwa ki ti ganny akonplir?

9 O konmansman i ti paret difisil pour fer sa louvraz. En rapor an 2001 ti revele ki plis ki 18,300 Lasal Rwayonm ti neseser dan 88 pei ki ti pe devlope. Lespri sen Bondye ek nou Lerwa Zezi Kri ti pe siport sa travay, alor i pa ti enposib.  (Mat. 19:26) Dan apepre 15 an depi 1999 ziska 2013, pep Bondye in konstri 26,849 Lasal Rwayonm atraver sa progranm. * Zeova i ankor pe kontinyen beni predikasyon ki depi 2013, i ti ankor annan bezwen pour pros 6,500 Lasal Rwayonm dan sa bann pei e konmela, i annan bezwen pour plizyer santenn Lasal an plis sak lannen.

Konstriksyon Lasal Rwayonm dan bann pei ki napa bokou resours i annan son defi

10-12. Ki mannyer konstriksyon Lasal Rwayonm in anmenn loner lo non Zeova?

10 Ki mannyer konstriksyon sa bann nouvo Lasal Rwayonm in onor non Zeova? En rapor sorti kot biro brans Zimbabwe ti dir: “Zis en mwan apre konstriksyon Lasal Rwayonm, lasistans renyon i normalman double.” Dan plizyer pei, i paret ki dimoun i ezite asosye avek nou ziska ki nou ganny en landrwa apropriye pour ladorasyon. Me, enn fwa ki en Lasal Rwayonm in ganny konstri, i deswit annan bokou lasistans e finalman en lot i bezwen ganny konstri. Par kont, se pa zis laparans sa batiman ki atir dimoun ver Zeova. Sa vre lanmour ki ganny demontre par sa bann ki pe konstri sa bann lasal osi i annan en lefe lo lafason ki dimoun i konsider nou lorganizasyon. Annou get detrwa legzanp.

11 Lendonezi. Ler en zonm ki ti pe get konstriksyon en Lasal Rwayonm ti dekouver ki tou bann travayer ti bann volonter, i ti dir: “Zot vreman enkrwayab! Mon’n vwar konman ki sakenn ant zot i travay dan lazwa e avek tou zot leker, menm si zot pa pe ganny peye. Mon krwar pa si i annan en lot lorganizasyon relizye parey zot!”

12 Likrenn. En madanm ki tou le zour ti pas o bor en sit konstriksyon Lasal Rwayonm ti asire ki sa bann travayer ti bann Temwen e ki sa batiman ti bezwen en Lasal Rwayonm. I ti dir: “Mon ser ti’n koz avek mwan lo Temwen Zeova akoz li i enn. Me, ler mon ti get sa travay konstriksyon ki ti pe ganny fer, mon ti santi ki mwan osi mon ti anvi form parti sa fanmir spirityel. Mon ti trouv sa vre lanmour ganny demontre laba.” Sa madanm ti aksepte en letid Labib e i ti batize an 2010.

13, 14. (a) Ki ou’n aprann avek lafason ki en koup marye ti reakte apre ki zot ti’n obzerv bann aktivite ki ti pe ganny fer kot en sit konstriksyon? (b) Ki ou kapab fer pour fer sir ki ou landrwa ladorasyon i onor non Zeova?

13 Larzantin. En koup marye ti apros en frer responsab kot konstriksyon en Lasal Rwayonm. Sa msye ti dir: “Nou ti pe get zot travay e . . . nou’n deside ki nou anvi aprann lo Bondye dan sa landrwa.” Apre i ti demande, “Ki mon devret fer pour kalifye pour asiste renyon isi?” Sa koup ti aksepte en letid Labib ki zot ti ganny ofer avek en kondisyon ki zot fanmir antye i partisipe. Bann frer ti kontan e dakor avek sa kondisyon.

14 Petet ou pa’n ganny sa privilez pour ede dan konstriksyon sa Lasal Rwayonm kot ou ale, me ou ankor kapab fer  keksoz pour ede pour ki ou landrwa ladorasyon i anmenn loner lo non Zeova. Par egzanp, avek lantouzyasm ou kapab envit ou etidyan Labib, dimoun ki ou vizite ek lezot pour asiste renyon avek ou kot Lasal Rwayonm. Ou osi annan sa loportinite pour ede netwaye e mentenir ou landrwa ladorasyon. Si ou kalkil byen ou bidze, ou kapab fer kontribisyon pour bann depans Lasal Rwayonm kot ou asiste ouswa kontribye pour konstriksyon lezot landrwa ladorasyon dan lezot parti lemonn. (Lir 1 Korentyen 16:2.) Tou sa bann aktivite i ede pour loue non Zeova.

Bann travayer ki “ofer zot lekor volonterman”

15-17. (a) Lekel ki fer laplipar sa bann travay konstriksyon? (b) Ki ou’n aprann avek komanter bann koup ki’n travay lo bann proze konstriksyon enternasyonal?

15 Bann frer ek ser lokal ki souvan fer bokou sa bann travay pour konstri Lasal Rwayonm, Lasal Lasanble ek fasilite biro brans. Me, souvandfwa, zot ganny led lezot frer ek ser sorti dan lezot pei ki annan leksperyans dan konstriksyon. Serten sa bann volonter in aziste zot progranm pour ki zot kapab travay lo sa bann proze enternasyonal pour plizyer semenn. Lezot in volonterman pare pour servi pour plizyer lannen, travay lo diferan proze konstriksyon nenport kote zot ganny anvoye.

Timo ek Lina Lappalainen (Vwar paragraf 16)

16 I annan defi pour travay dan konstriksyon enternasyonal, me son rekonpans i vo lapenn. Par egzanp, Timo ek Lina in al dan plizyer pei Lazi, Lerop ek Sid Lanmerik pour travay lo konstriksyon Lasal Rwayonm, Lasal Lasanble ek biro brans. Timo i dir, “Tou le de-z-an mon’n ganny en nouvo landrwa pour al ede diran sa dernyen 30 an.” Lina, ki ti marye avek Timo 25 an pase i dir, “Mon’n servi avek Timo  dan 10 diferan pei. I demann en kantite lenerzi ek letan pour adapte avek nouvo kalite manze, klima, langaz, teritwar predikasyon e pour fer zanmi.” * Eski son zefor ti vo lapenn? Lina i dir, “Bann defi in fer nou ganny plis benediksyon ankor. Nou’n eksperyans lanmour Kretyen ek lospitalite e nou’n santi lanmour Zeova dan lafason ki i ti pe pran swen avek nou. Nou’n osi vwar lakonplisman promes ki Zezi ti fer avek son bann disip dan Mark 10:29, 30. Nou’n ganny san fwa plis frer, ser ek manman spirityel.” Timo i dir, “Nou santi en gran satisfaksyon pour servi nou abilite pour akonplir sa latas pli nob, setadir pour ogmant bann byen nou Lerwa.”

17 Darren ek Sarah ki ti ede lo bann proze konstriksyon Lafrik, Lanmerik Santral, Lazi, Lerop, Sid Lanmerik ek Sid Pasifik i santi ki zot in ganny plis ki sa ki zot in donnen. Malgre bann defi ki zot ti rankontre, Darren i dir: “I ti en gran privilez pour travay avek bann frer sorti dan diferan parti lemonn. Mon’n remarke ki sa lanmour ki nou annan pour Zeova i parey en difil ki fer letour later e ki zwenn nou tou ansanm.” Sarah i dir: “Mon’n aprann sitan kantite avek mon bann frer ek ser sorti dan diferan kiltir! Kan mon vwar bann sakrifis ki zot fer pour servi Zeova, sa i motiv mwan pour kontinyen donn mon meyer.”

18. Ki mannyer sa profesi dan Psonm 110:1-3 in ganny akonplir?

18 Lerwa David ti profetize ki menm si bann sitwayen Rwayonm Bondye ti pou fer fas avek sa bann defi, zot ti pou “ofer zot lekor volonterman” pour promot lentere Rwayonm. (Lir Psonm 110:1-3.) Tou sa ki enplike dan sa travay ki siport Rwayonm i annan en par pour zwe pour akonpli sa parol profetik. (1 Kor. 3:9) Sa kantite biro brans, sa plizyer santenn Lasal Lasanble ek sa plizyer milye Lasal Rwayonm dan lemonn i en laprev konvenkan ki sa Rwayonm i reel e ki i pe dirize la konmela. Pa i vreman en gran privilez ki nou annan pour servi Lerwa Zezi Kri dan en travay ki donn Zeova sa loner ki i vreman merite!

^ par. 6 An 2013, plis ki 230,000 volonter ti ganny aprouve pour travay avek sa 132 Komite Konstriksyon Rezyonal Leta-z-ini. Dan sa pei, tou le-z-an sa bann komite i kordin konstriksyon apepre 75 Lasal Rwayonm e ede aranze ouswa repar apepre 900 lasal.

^ par. 9 Sa sif pa enkli sa kantite Lasal Rwayonm ki’n ganny konstri dan lezot pei ki pa tonm anba sa laranzman.

^ par. 16 Bann serviter enternasyonal i pas lamazorite zot letan lo bann sit konstriksyon, me zot osi siport kongregasyon lokal dan predikasyon dan wikenn ouswa lo tar apremidi.